Nnwom 47 - New Revised Asante Twi Bible

Onyankopɔn di hene

Wɔde ma dwonkyerɛfoɔ. Kora mma dwom.

¹ Aman nyinaa, mommɔ mo nsam, momfa anigyeɛ nhuro mmɔ ose mma Onyankopɔn.

² Na AWURADE a ɔwɔ sorosoro no ho yɛ hu, ɔyɛ ɔhenkɛseɛ asase nyinaa so.

³ Ɔbrɛ aman ase de hyɛ yɛn ase, na ɔde nkurɔfoɔ hyɛ yɛn nan ase.

⁴ Ɔyi yɛn apɛgyadeɛ ma yɛn, Yakob a ɔdɔ no no animuonyam.

⁵ Onyankopɔn de anigyeɛ huro kɔ ɔsoro, AWURADE de totorobɛnto gyegyeɛ kɔ.

⁶ Monto Nyankopɔn dwom, monto ayeyie dwom, monto dwom mma yɛn hene, monto ayeyie dwom.

⁷ Na Onyankopɔn ne asase nyinaa so hene, mommɔ sankuo nto nnweneho dwom.

⁸ Onyankopɔn di amanaman so hene, Onyankopɔn te n’ahennwa kronkron so.

⁹ Aman ahene boaboa wɔn ho ano, Abraham Nyankopɔn man. Na asase so akyɛm yɛ Onyankopɔn dea, wɔama no so kɛse.