Nnwom 46 - New Revised Asante Twi Bible

“Yɛn Nyankopɔn ne abankɛseɛ”

Wɔde ma dwonkyerɛfoɔ. Kora mma dwom. Wɔnto no “Alamot” sankuo nne so.

¹ Onyankopɔn yɛ yɛn dwanekɔbea ne ahoɔden, ahohia mu boafoɔ pa a wɔanya no nhunuiɛ.

² Enti sɛ asase ani dane butu, na mmepɔ tutu gu po bunu mu,

³ na emu nsuo woro na ɛhuru na n’asorɔkyeɛ ma mmepɔ woso mpo a, yɛrensuro.

⁴ Asuo bi, ne mmɔmu ma Nyankopɔn kuro ani gye, ɔsorosoroni tenabea kronkron no.

⁵ Onyankopɔn te mfimfini, ɛnwoso, Onyankopɔn boa no anɔpahema.

⁶ Amanaman yɛ hoo, ahennie wosowoso, ɔma ne nne so ma asase nane.

⁷ Asafo AWURADE ne yɛn wɔ hɔ, Yakob Nyankopɔn ne yɛn abankɛseɛ.

⁸ Mommra mmɛhwɛ AWURADE nnwuma, ɔsɛeɛ ko a wama no aba asase soɔ.

⁹ Ɔma akodie gyae kɔsi asase ano, ɔbubu tadua mu na ɔtwitwa pea mu asinasini, ɔde ogya hye nteaseɛnam.

¹⁰ Monyɛ komm na monhunu sɛ mene Onyankopɔn. Wɔmma me so amanaman mu, wɔmma me so asase so.

¹¹ Asafo AWURADE ne yɛn wɔ hɔ, Yakob Nyankopɔn ne yɛn abankɛseɛ.