Nnwom 20 - New Revised Asante Twi Bible

Nkonimdie ho adesrɛ

Wɔde ma dwonkyerɛfoɔ. Dawid dwom.

¹ AWURADE ntie wo hiada, Yakob Nyankopɔn din mmɔ wo ho ban,

² ɔmfiri kronkron mu hɔ mmɛboa wo, na ɔmfiri Bepɔ Sion mmɛhyɛ wo den.

³ Ɔnkae w’aduane afɔdeɛ nyinaa, na wo hyeɛ afɔdeɛ nsɔ n’ani.

⁴ Ɔmma wo deɛ w’akoma pɛ, na ɔmma wo tirim asɛm nyinaa mmra mu.

⁵ Ma yɛmmɔ ose wɔ wo nkonimdie ho, na yɛn Nyankopɔn din mu na yɛhim yɛn frankaa: AWURADE mma deɛ wosrɛ nyinaa mmra mu.

⁶ Afei mahunu sɛ AWURADE boa deɛ wasra no no, ɔgye no so, ne soro kronkronbea hɔ, ɔde ne nifa ahoɔdenneɛ gye no.

⁷ Ebinom kamfo nteaseɛnam, na ebinom kamfo apɔnkɔ, na yɛn deɛ, yɛkamfo AWURADE yɛn Nyankopɔn din.

⁸ Wɔn deɛ, wɔbubu duedue so hwehwe ase, na yɛn deɛ, yɛasɔre gyina hɔ kyirebenn.

⁹ AWURADE, gye ɔhene nkwa. Ɔbɛtie yɛn, da a yɛfrɛ no yi ara mu.