Nnwom 128 - New Revised Asante Twi Bible

Efie ahotɔ

Ɔsoroforɔ dwom.

¹ Nhyira ne obiara a ɔsuro AWURADE, na ɔfa n’akwan soɔ.

² Na wobɛdi wo nsa ano adwuma, nhyira ne wo, na ɛbɛsi wo yie.

³ Wo yere yɛ sɛ obobe a ɛso, wo fie mpia mu, wo mma yɛ sɛ ngodua a wɔatetɛ atwa wo pono ho ahyia.

⁴ Hwɛ, sɛdeɛ wɔhyira onipa a ɔsuro AWURADE nie.

⁵ AWURADE mfiri Sion nhyira wo, na hunu Yerusalem yiedie wo nkwa nna nyinaa,

⁶ aane, na hunu wo mma mma. Asomdwoeɛ mmra Israel so.