Nnwom 125 - New Revised Asante Twi Bible

Israel dwanekɔbea

Ɔsoroforɔ dwom.

¹ Wɔn a wɔde wɔn ho to AWURADE soɔ no te sɛ Sion bepɔ, ɛnhinhim, na ɛsi hɔ daa.

² Sɛdeɛ Yerusalem, mmepɔ atwa ho ahyia no, saa ara na AWURADE atwa ne man ho ahyia firi seesei de kɔsi daa.

³ Na bɔne ahempoma rentena ateneneefoɔ kyɛfa so, na ateneneefoɔ antene wɔn nsa ansɔ amumuyɛ mu.

⁴ AWURADE, yɛ wɔn a wɔyɛ no yie, ne wɔn a wɔtene wɔ wɔn akoma mu.

⁵ Na wɔn a wɔmane kɔ wɔn akwan nkontonkyi soɔ deɛ, AWURADE de wɔn bɛfra amumuyɛfoɔ akɔ. Asomdwoeɛ mmra Israel so.