Nnwom 113 - New Revised Asante Twi Bible

Onyankopɔn dom ahobrɛasefoɔ

¹ Monyi AWURADE ayɛ! Mo AWURADE nkoa, monyi ayɛ, monyi AWURADE din ayɛ.

² Nhyira nka AWURADE din mfiri nnɛ nkɔsi daa.

³ Ɛfiri owiapueeɛ kɔpem n’atɔeɛ, AWURADE din sɛ ayeyie.

⁴ Wɔama AWURADE so amanaman nyinaa so, n’animuonyam tra ɔsoro.

⁵ Hwan na ɔte sɛ AWURADE yɛn Nyankopɔn a ne tenabea wɔ soro,

⁶ na ɔbrɛ ne ho ase hwɛ fam, ɔsoro ne asase soɔ?

⁷ Ɔma mmɔborɔni so firi mfuturo mu, na ɔma ohiani so firi sumina so,

⁸ sɛ ɔde no bɛtena mmapɔmma nkyɛn, ne man mu mmapɔmma.

⁹ Ɔma ɔbaabonini nya efie tena mu, na ɔyɛ ɔbaatan a n’ani gyeɛ. Monyi AWURADE ayɛ!