Nnwom 109 - New Revised Asante Twi Bible

Atamfoɔ bɔne no nnue!

Wɔde ma dwonkyerɛfoɔ. Dawid dwom.

¹ M’ayeyie Nyankopɔn, mmua w’ano.

² Na abɔnefoɔ ne nkontompofoɔ abue wɔn ano atia me, wɔde tɛkyerɛma torofoɔ akeka me ho nsɛm,

³ na wɔde nitansɛm atwa me ho ahyia, na wɔne me di ako kwa.

⁴ Wɔtane me de hyɛ me dɔ ananmu, na me deɛ, mpaeɛ ara na mebɔ.

⁵ Na wɔde bɔne hyɛ me papa ananmu, na wɔkyiri me de hyɛ me dɔ ananmu.

⁶ Fa ɔbɔnefoɔ si ne so, na ma Satan nnyina ne nifa.

⁷ Wɔbu no atɛn a, ma no nni fɔ, na ma ne mpaebɔ nnane no bɔne.

⁸ Ma ne nna nsua, na ne hwɛ adwuma no, ma obi mfa,

⁹ ne mma nyɛ nwisiaa, na ne yere nnane okunafoɔ,

¹⁰ na ne mma nkyinkyini nsrɛsrɛ adeɛ, na wɔmfiri wɔn amamfo so nkɔhwehwɛ aduane.

¹¹ Ma ɔpempensifoɔ nsa nka deɛ ɔwɔ nyinaa, na ananafoɔ mfom n’adwumadeɛ.

¹² Mma obiara adɔeɛ nnkyɛre mmma no, na obiara nnnom ne nwisiaa.

¹³ Ma wɔnhye n’ase, ma wɔn din ngu awoɔ ntoatoasoɔ a ɛdi soɔ yi mu.

¹⁴ Wɔnkae n’agyanom amumuyɛ AWURADE anim, na ne na bɔne nso, wɔmmpepa.

¹⁵ Ɛntena AWURADE anim daa, na ɔntwa wɔn ho nkaeɛ mfiri asase so.

¹⁶ Ɛsiane sɛ wankae sɛ ɔbɛyɛ adɔeɛ, na ɔtaa onipa mmɔborɔni ne ohiani ne deɛ n’akoma abubuo, sɛ ɔbɛku wɔn.

¹⁷ Ɛnam sɛ ɔdɔɔ nnuabɔ nti, aba ne so, sɛ wampɛ nhyira nti, ɛne no ntam twe.

¹⁸ Ɔhyɛɛ nnome sɛ n’atadeɛ, na ɛkɔɔ ne yam sɛ nsuo, ne ne nnompe mu sɛ ngo.

¹⁹ Ma no nyɛ no sɛ ntoma a ɔfira ne abɔsoɔ a ɔde kyekyere ne ho daa.

²⁰ Yei ne me ho asɛmpɛfoɔ akatua a ɛfiri AWURADE nsam, ne wɔn a wɔka me kra ho asɛmmɔne no deɛ.

²¹ Na wo, O Onyankopɔn ne m’AWURADE, wo din nti di ma me, na w’adɔeɛ no yɛ, yi me!

²² Na meyɛ mmɔborɔni ne ohiani, na m’akoma apira wɔ me mu.

²³ Mekɔ sɛ sunsum a ɛrekɔtɔ, woawoso me atwene sɛ ntutummɛ.

²⁴ Abuada nti me nkotodwe popo, na me honam afɔn, emu sradeɛ asa.

²⁵ Na me deɛ, madane ahohora mama wɔn, wɔhwɛ me a, wɔwoso wɔn ti.

²⁶ Boa me, AWURADE, me Nyankopɔn, gye me sɛdeɛ w’adɔeɛ teɛ,

²⁷ na wɔnhunu sɛ wo nsa ni, sɛ wo, AWURADE, na woyɛeɛ.

²⁸ Wɔn deɛ, wɔdome, na wo deɛ, wohyira. Wɔsɔre, na wɔn ani wu, na w’akoa deɛ, n’ani gye.

²⁹ Me ho asɛmpɛfoɔ bɛhyɛ aniwuo, na wɔafira wɔn ahohora sɛ ntoma.

³⁰ Mede m’ano bɛkamfo AWURADE pii, mɛto ayeyie dwom mama no nnipa bebree mu,

³¹ sɛ ɔgyina ohiani nifa, na ɔregye no afiri wɔn a wɔbu ne kra atɛn nsam.