Nnwom 108 - New Revised Asante Twi Bible

Adɔeɛ ho ayeyie ne mmoa ho adesrɛ

Dawid dwom.

¹ M’akoma atim, Onyankopɔn, m’akoma atim! Mɛto dwom, na mayi ayɛ! Me kra nyane!

² Bɛnta ne sankuten, monyane, mɛnyane anɔpahema.

³ AWURADE, mɛda wo ase, aman mu, na mɛto ayeyie dwom mama wo, aman mu.

⁴ Na w’adɔeɛ so tra ɔsoro, na wo nokorɛ duru ewiem tɔnn.

⁵ Onyankopɔn, ma wo ho so tra ɔsoro, na ma w’animuonyam so asase nyinaa so.

⁶ Deɛ ɛbɛyɛ na woagye w’adɔfo nti, fa wo nifa gye yɛn nkwa, na gye me so.

⁷ Onyankopɔn akasa ne kronkronyɛ mu: Medi ahurisie, mɛkyɛ Sekem mu, na masusu Sukot bonhwa.

⁸ Gilead wɔ me, Manase wɔ me, na Efraim yɛ me tiri so dadeɛ kyɛ, Yuda yɛ m’ahempoma.

⁹ Moab yɛ me dwaresɛn, Edom so na mɛto me mpaboa maguo, Filistifoɔ asase so na mɛbɔ ose.

¹⁰ Hwan na ɔde me bɛkɔ kuro denden no mu, hwan na ɔbɛgya me akɔ Edom?

¹¹ Onyankopɔn, ɛnyɛ wo na woasum yɛn aguo yi, na wo, Onyankopɔn, ne yɛn dɔm ankɔ?

¹² Bɛboa yɛn firi ahohia mu, na onipa mmoa yɛ ɔkwa.

¹³ Yɛde Onyankopɔn na ɛbɛyɛ mmaninneɛ, na ɔno na ɔbɛtiatia yɛn ahohiahiafoɔ soɔ.