Nnwom 107 - New Revised Asante Twi Bible

NWOMA A ƐTƆ SO NNUM ( Nnwom 107—150 ) Wɔn a wɔagye wɔn nkwa no aseda dwom

¹ Monna AWURADE ase, na ɔyɛ, na n’adɔeɛ wɔ hɔ daa.

² Ma wɔn a AWURADE agye wɔn nka saa, wɔn a wagye wɔn afiri ɔhohiahiafoɔ nsam,

³ na waboaboa wɔn ano afiri nsase soɔ, afiri apueeɛ ne atɔeɛ, afiri atifi fam ne anafoɔ fam.

⁴ Wɔkyinkyinii anwea pradada so, nkyɛkyerɛ a ɛnni kwan so, wɔanhunu kuro biara antena mu.

⁵ Ɛkɔm dee wɔn, sukɔm dee wɔn, wɔn kra tɔɔ piti wɔ wɔn mu.

⁶ Na wɔsu frɛɛ AWURADE, wɔn ahohia mu, na ɔgyee wɔn firii wɔn ahokyere mu,

⁷ na ɔde wɔn faa ɔkwantenenee so sɛ wɔnkɔ kuro a wɔbɛtumi atena mu so.

⁸ Wɔnkamfo AWURADE, n’adɔeɛ ho, ne n’anwanwadeɛ, nnipa mma mu,

⁹ sɛ wama ɔkra a ne ho aweɛ ameeɛ, na ɔde adepa ahyɛ ɔkra a ɛkɔm de no ma.

¹⁰ Wɔn a wɔtenaa sum ne sum kabii mu, na wɔkyeree wɔn guu amaneɛ ne dadeɛ nkɔnsɔnkɔnsɔn mu,

¹¹ ɛfiri sɛ wɔtee Nyankopɔn nsɛm ho atua, na wɔbuu ɔsorosoroni no agyina animtia,

¹² na ɔde ɔhaw brɛɛ wɔn akoma ase, wɔhwehwee ase a ɔboafoɔ bi nni hɔ.

¹³ Na wɔsu frɛɛ AWURADE, wɔn ahohia mu, na ɔgyee wɔn firii wɔn ahokyere mu.

¹⁴ Ɔyii wɔn firii sum ne sum kabii mu, na ɔbubuu wɔn mpokyerɛ mu.

¹⁵ Wɔnkamfo AWURADE, n’adɔeɛ ho, ne n’anwanwadeɛ, nnipa mma mu,

¹⁶ sɛ wabubu kɔbere mfrafraeɛ apono, na watwitwa adaban mu asinasini.

¹⁷ Agyegyentwie, wɔn mmarato kwan ne wɔn amumuyɛ nti wɔhunuu amane.

¹⁸ Wɔn kra kyiri aduane nyinaa na wɔbɛn owuo aboboano.

¹⁹ Na wɔsu frɛɛ AWURADE wɔn ahohia mu, na ɔgyee wɔn firii wɔn ahokyere mu.

²⁰ Ɔmaa n’asɛm bɛsaa wɔn yadeɛ, na ɔyii wɔn firii wɔn amena mu.

²¹ Wɔnkamfo AWURADE, n’adɔeɛ ho, ne n’anwanwadeɛ, nnipa mma mu,

²² na wɔmmɔ aseda afɔdeɛ, na wɔmfa ahurisie dwom nka ne nneyɛɛ.

²³ Wɔn a wɔsiane kɔ ɛpo so ahyɛn mu na wɔkɔdi nsuo akɛseɛ mu dwuma no,

²⁴ wɔn na wɔhunuu AWURADE nneyɛɛ, ne n’anwanwadeɛ ebunu mu,

²⁵ na ɔka maa ahum kɛseɛ tui, na ɛmaa n’asorɔkyeɛ so.

²⁶ Wɔforo kɔɔ soro, na wɔsiane kɔɔ bunu donkodonko mu, ahohia nti wɔn kra hodwoe.

²⁷ Wɔkyim kɔ bae tɔɔ ntintan sɛ asabofoɔ, na wɔn nyansa nyinaa sae wɔn tirim.

²⁸ Na wɔsu frɛɛ AWURADE, wɔn ahohia mu, na ɔgyee wɔn firii wɔn ahokyere mu.

²⁹ Ɔmaa ahum no yɛɛ komm, na asorɔkyeɛ no yɛɛ dinn.

³⁰ Na wɔn ani gyee sɛ ano adwo komm, na ɔde wɔn kɔɔ wɔn agyinaeɛ a wɔhwehwɛɛ hɔ no:

³¹ Wɔnkamfo AWURADE, n’adɔeɛ ho ne n’anwanwadeɛ, nnipa mma mu,

³² na wɔmma no so ɔman ahyiaeɛ mu, na wɔnyi no ayɛ mpanimfoɔ dwabɔ mu.

³³ Ɔdanee asutene maa no yɛɛ anwea pradada ne nsuo aniwa maa no yɛɛ nkyɛkyerɛ.

³⁴ Asase a ɛma aduane danee asase kɛsɛɛ, wɔn a wɔte soɔ no bɔneyɛ nti.

³⁵ Ɔdanee anwea pradada maa no yɛɛ ɔtadeɛ, ne nkyɛkyerɛ maa no yɛɛ nsuo aniwa,

³⁶ na ɔmaa wɔn a ɛkɔm dee wɔn kɔtenaa hɔ, na wɔkyekyeree kuro tenaa mu,

³⁷ na wɔyɛɛ mfuo, na wɔtetɛɛ bobe nturo, na wɔnyaa nnɔbaeɛ pii.

³⁸ Na ɔhyiraa wɔn maa wɔn ase kyenee bebree, na wamma wɔn afieboa so anhwan.

³⁹ Ɛnna afei wɔn so hwaneeɛ, na wɔbrɛɛ wɔn ase, ɛnam nhyɛsoɔ, ɔhaw ne awerɛhoɔhyɛ nti.

⁴⁰ Ɔde animtiabuo gu mmapɔmma so, na ɔma wɔkyini asase fo a ɔkwan nni hɔ so.

⁴¹ Na ɔmaa ohiani so firii amanehunu mu, na ɔyɛɛ wɔn mmusua sɛ nnwankuo.

⁴² Teneneefoɔ bɛhunu, na wɔn ani agye, na amumuyɛ nyinaa bɛmua n’ano.

⁴³ Obiara a ɔyɛ onyansafoɔ no, ma no mmu yeinom, na ma wɔnwene AWURADE adɔeɛ ho.