Mmebusɛm 26 - New Revised Asante Twi Bible

Nkwaseafoɔ, anihafoɔ ne nkɔnkɔnsafoɔ

¹ Sɛ ahuhuberɛ mu sukyerɛmma ne twaberɛ mu nsuo teɛ no, sɛ animuonyam mfata ɔkwasea ne no.

² Sɛdeɛ apatuprɛ kyini na asomfenakatakyi tuo no, saa ara na nnuabɔ hunu remma mu.

³ Pɔnkɔabaa fata ɔpɔnkɔ, nnareka fata afunumu, ɛnna abaa nso fata ɔkwasea akyire.

⁴ Mmua ɔkwasea n’agyimisɛm so, na wo nso woanyɛ sɛ ɔno.

⁵ Bua ɔkwasea wɔ n’agyimisɛm so, na wanyɛ n’ani so onyansafoɔ.

⁶ Deɛ ɔde asɛm soma ɔkwasea no twitwa ɔno ara ne nan, na ɔnom mmusuo.

⁷ Sɛdeɛ apakye nan sensɛne hɔ no, sɛdeɛ nkwaseafoɔ anomu abebusɛm teɛ ne no.

⁸ Sɛdeɛ abohene boaa teɛ aboɔkuo soɔ no, sɛ deɛ ɔhyɛ ɔkwasea animuonyam teɛ ne no.

⁹ Sɛdeɛ nkasɛɛ poma teɛ wɔ nsaboni nsam no, sɛ nkwaseafoɔ anomu abebusɛm teɛ ne no.

¹⁰ Deɛ ɔbɔ ɔkwasea ne anantefoɔ paa no te sɛ agyantoni a ɔpira nnipa nyinaa.

¹¹ Sɛdeɛ ɔkraman sane kɔ ne feɛ ho no, sɛ ɔkwasea ti n’agyimisɛm mu ne no.

¹² Wohunu onipa a ɔyɛ ɔno ara n’ani so nyansafoɔ a, anidasoɔ wɔ hɔ ma ɔkwasea sene no.

¹³ Ɔkwadwofoɔ se: Ɛserɛ-mu-sɛe wɔ ɔkwan mu, gyata wɔ mmɔntene so!

¹⁴ Sɛdeɛ ɛpono dane ne ho ne mpontɛre soɔ no, saa ara na ɔkwadwofoɔ nso yɛ wɔ ne kɛtɛ soɔ.

¹⁵ Ɔkwadwofoɔ de ne nsa bɔ ayowa mu, ɛyɛ n’ani ha sɛ ɔde bɛhyɛ n’anomu.

¹⁶ Ɔkwadwofoɔ yɛ n’ani so nyansafoɔ sene nnipa baason a wɔkyerɛ adeɛ a ɛsɛ.

¹⁷ Deɛ ɔretwam na ɔde ne ho fra asɛm a ɛmfa ne ho mu te sɛ deɛ ɔsɔ ɔkraman aso mu.

¹⁸ Sɛdeɛ ɔbɔdamfoɔ a ɔto nnyansramma, agyan ne owuo teɛ no,

¹⁹ sɛ onipa a ɔgyegye ne yɔnko, na ɔka sɛ: Agorɔ na meredie, teɛ ne no.

²⁰ Nnyina sa a, ogya dum, na sɛ asomsɛmkani nni hɔ a, tɔkwa to twa.

²¹ Sɛdeɛ gyabidie ma nsramma na nnyina ma ogya no, saa ara na ɔbarima tɔkwapɛfoɔ ma ɔko ano sɔ.

²² Asomsɛmkani nsɛm te sɛ mfremfremadeɛ, na ɛsiane kɔ yam mpia mu.

²³ Ano fremfrem ne amumuyɛ akoma te sɛ dwetɛ fi a wɔde adura kuruwago ho.

²⁴ Deɛ ɔtane obie no de n’ano kyerɛ asɛm bi, na ne mu deɛ, ɔsiesie nkontompo.

²⁵ Sɛ ɔka adɔkɔdɔkɔsɛm a, nnye no nni, na akyiwadeɛ nson wɔ n’akomam.

²⁶ Nitan de nnaadaa kata ne ho, nanso asafo mu wɔbɛyi ne bɔne adi.

²⁷ Deɛ ɔtu amena bɛhwe ɛno ara mu, na deɛ ɔmuni ɔboɔ no, ɛbɛsane aba ne so.

²⁸ Tɛkyerɛma torofoɔ tane wɔn a apira wɔn, na ano a ɛdɛfɛdɛfɛ de ɔsɛeɛ ba.