Mmebusɛm 17 - New Revised Asante Twi Bible

Ɔkasa mu nyansa ne nkwaseasɛm

¹ Kɔntɔmoa wesee a asomdwoeɛ wɔ mu yɛ sene efie a afɔrebɔdeɛ a wɔko ho ayɛ no ma.

² Akoa nimdefoɔ bɛdi ɔba a ɔyɛ aniwudeɛ so, na ɔbɛnya agyapadeɛ mu kyɛfa wɔ anuanom mu.

³ Kyɛmferɛ wɔ hɔ ma dwetɛ, na fononoo wɔ hɔ ma sika, na deɛ ɔsɔ akoma hwɛ ne AWURADE.

⁴ Ɔdebɔneyɛni tie ahuhudeɛ ano, ɔtorofoɔ yɛ aso ma mmusubɔ tɛkyerɛma.

⁵ Deɛ ɔyi ohiani ahi gu ne yɛfoɔ anim ase, deɛ n’ani gye amaneɛ ho no, ne ho renyɛ tɔtorɔtɔɔ.

⁶ Nkɔkoraa abotire ne mma mma, na mma animuonyam ne wɔn agyanom.

⁷ Kasantrasoɔ mfata ogyegyentwie, na nkantom sɛ atorɔ ano bɛfata ɔdehyeɛ.

⁸ Ayɛyɛ te sɛ aboɔden boɔ wɔ deɛ ɔnya no ani so, baabiara a ɛfa no ɛma no yɛ yie.

⁹ Deɛ ɔkata mfomsoɔ soɔ no hwehwɛ ɔdɔ, na deɛ ɔti asɛm mu no tete nnamfo ntam.

¹⁰ Nkaanim hyɛne nhunumufoɔ mu kyɛne sɛ wɔbɔ ɔkwasea mmaa ɔha.

¹¹ Atuateɛ nko na ɔbɔne rehwehwɛ, na wɔbɛsoma ɔbɔfoɔ tirimuɔdenfoɔ akɔ ne so.

¹² Ma osisire a wɔafa ne mma nhyia wo mmom, na ɛnyɛ ɔkwasea n’agyimisɛm mu.

¹³ Deɛ ɔde bɔne hyɛ papa ananmu no, bɔne rempa ne fie da.

¹⁴ Ntɔkwa mfitiaseɛ te sɛ nsuo ano tue, enti ɔham mu nnya nyɛɛ den no, gyae.

¹⁵ Deɛ ɔbu ɔbɔnefoɔ bem ne deɛ ɔbu ɔteneneeni fɔ no, AWURADE akyiwadeɛ ne wɔn baanu nyinaa.

¹⁶ Adɛn nti na sika wɔ ɔkwasea nsam, sɛ ɔde bɛtɔ nyansa, berɛ a ɔnni tire?

¹⁷ Adamfo dɔ berɛ nyinaa mu, na onua, wɔwoo no maa ahohiahia.

¹⁸ Onipa a ɔnni tire na ɔdi akagyinamu, na ɔdi ne ɔhɔhoɔ agyinamu.

¹⁹ Deɛ ɔpɛ ntɔkwa no pɛ mmarato, deɛ ɔma ne dan ano korɔn mmorosoɔ no hwehwɛ n’ankasa ne pira.

²⁰ Akoma mu kontonkyifoɔ nhunu papa, na tɛkyerɛma danedanefoɔ hwe bɔne mu.

²¹ Deɛ ɔwo ɔkwasea no, ɔwo nya awerɛhoɔ, na anigyeɛ biara nni hɔ mma ogyegyentwie agya.

²² Anigyeɛ akoma yɛ aduro pa, na honhom a ɛdi yea no deɛ, ɛwe nnompe mu.

²³ Ɔbɔnefoɔ gye ayɛyɛdeɛ firi kokoam, sɛ ɔrebɛdane atemmuo akwan ani.

²⁴ Nyansa wɔ nhunumufoɔ anim, na ɔkwasea deɛ, n’ani da asase ano nohoa.

²⁵ Ɔba kwasea yɛ n’agya awerɛhoɔ ne ne na a ɔwoo no bɔnwono.

²⁶ Sɛ wɔgye ɔteneneeni hɔ mmaratodeɛ a, ɛnyɛ, na sɛ wɔhwe adɛɛfoɔ a, ɛnyɛ koraa.

²⁷ Deɛ ɔdodo ne nsɛm ho hunu nimdeɛ, na deɛ ne honhom dwoɔ yɛ nhunumu nipa.

²⁸ Ogyimifoɔ mpo, ɔmua n’ano a, wɔbu no nyansafoɔ, aane, deɛ ɔka n’ano tom no, ɔyɛ nhunumuni.