Mateo 21 - New Revised Asante Twi Bible

Yesu hyɛne Yerusalem nkunimdie mu

¹ Na wɔbɛnee Yerusalem na wɔduruu Betfage, Ngo Bepɔ ho no, Yesu somaa asuafoɔ baanu

² see wɔn sɛ: Monkɔ akuraa a ɛda mo anim yi ase, na ntɛm ara mobɛhunu afunumu a wɔasa no homa ne ne ba; monsane wɔn mfa wɔn mmrɛ me!

³ Na sɛ obi bisa mo a, monka sɛ: Wɔn ho hia ma Awurade; na ntɛm ara ɔbɛma mode wɔn aba.

⁴ Na yei nyinaa sii, na deɛ odiyifoɔ no kaeɛ no aba mu sɛ:

⁵ Monka nkyerɛ Sion babaa sɛ: Hwɛ, wo hene reba wo nkyɛn, ɔdwo, na ɔte afunumu ne afunumu a ɔsoa nnoɔma ba so.

Yesu hyɛne Yerusalem

⁶ Na asuafoɔ no kɔ kɔyɛɛ sɛdeɛ Yesu hyɛɛ wɔn no

⁷ de afunumu no ne ne ba no baeɛ, na wɔde wɔn ntadeɛ guguu wɔn so, na ɔtenaa so.

⁸ Na nkurɔfokuo no mu pii de wɔn ntadeɛ sesɛɛ kwan no mu, na ebinom nso twitwaa dua mman, na wɔde sesɛɛ kwan no mu.

⁹ Na nkurɔfoɔ akuakuo a wɔdi kan ne wɔn a wɔdi akyire teateaa mu sɛ: Hosiana, Dawid ba no! Nhyira ne deɛ ɔnam Awurade din mu reba no! Hosiana wɔ sorosoro nohoa!

¹⁰ Na ɔduruu Yerusalem no, kuro mu no nyinaa bɔɔ twi sɛ: Hwan ni?

¹¹ Na nkurɔfoɔ akuakuo no se: Oyi ne Yesu, odiyifoɔ a ɔfiri Nasaret a ɛwɔ Galilea no.

Yesu pam adwadifoɔ firi asɔrefie

¹² Na Yesu kɔɔ asɔrefie, na ɔkɔpamm wɔn a wɔtɔn ne wɔn a wɔtɔ firii asɔrefie hɔ, na ɔkaa sikasesafoɔ apono ne wɔn a wɔtɔn mmorɔnoma nkonnwa butui.

¹³ Na ɔsee wɔn sɛ: Wɔatwerɛ sɛ: Wɔbɛfrɛ me fie mpaebɔfie, na mo deɛ, mode ayɛ adwotwafoɔ bɔn.

¹⁴ Na anifirafoɔ ne mpakye baa ne nkyɛn asɔrefie hɔ, na ɔsaa wɔn yadeɛ.

¹⁵ Na asɔfoɔ mpanimfoɔ ne Atwerɛfoɔ no hunuu anwanwadeɛ a ɔyɛeɛ, ne mmɔfra a wɔteateaa mu asɔrefie sɛ: Hosiana Dawid ba no no, anyɛ wɔn abodwo,

¹⁶ na wɔbisaa no sɛ: Wote deɛ yeinom reka no? Na Yesu see wɔn sɛ: Aane. Monkenkanee pɛn sɛ: Nkɔkoaa ne wɔn a wɔnom nufoɔ ano mu na woasiesie ayeyie, anaa?

¹⁷ Na ɔgyaa wɔn hɔ firii kuro no mu kɔɔ Betania kɔtenaa hɔ.

Ɔdome borɔdɔma dua

¹⁸ Na anɔpa a Yesu resane aba kuro no mu no, na ɛkɔm de no.

¹⁹ Na ɔhunuu borɔdɔma bi kwan so no, ɔkɔɔ ho, na wanhunu hwee wɔ so sɛ ahahan nko ara. Na ɔsee no sɛ: Worenso aba bio ara da! Na amonom hɔ ara na borɔdɔma no poeɛ.

²⁰ Na asuafoɔ no hunuiɛ no, ɛyɛɛ wɔn nwanwa, na wɔkaa sɛ: Ɛyɛɛ dɛn na amonom ha yi ara borɔdɔma yi apoɔ yi?

²¹ Na Yesu bua see wɔn sɛ: Nokorɛ mese mo sɛ, mowɔ gyidie na monnye akyinnyeɛ a, anka ɛnyɛ borɔdɔma yi deɛ nko na mobɛyɛ, na anka mobɛka akyerɛ bepɔ yi sɛ: Tutu na kɔhwe po mu! na ɛbɛyɛ.

²² Na biribiara a mobɛbisa mpaebɔ mu na mogye die no, mobɛnya.

Mpanimfoɔ no animguaseɛ

²³ Na ɔduruu asɔrefie na ɔrekyerɛkyerɛ no, asɔfoɔ mpanimfoɔ ne ɔman no mu mpanimfoɔ baa ne nkyɛn bɛkaa sɛ: Tumi bɛn na wode yɛ nnoɔma yi, na hwan na ɔmaa wo saa tumi yi?

²⁴ Na Yesu bua see wɔn sɛ: Me nso mɛbisa mo asɛm baako a, sɛ moyi m’ano a, me nso mɛka tumi a mede meyɛ nnoɔma yi makyerɛ mo:

²⁵ Yohane asubɔ no, ɛfiri he? Ɛfiri soro anaasɛ ɛfiri nnipa? Na wɔsusuu wɔn mu sɛ: Sɛ yɛka sɛ ɛfiri soro a, ɔbɛse yɛn sɛ: Adɛn nti na moannye no annie?

²⁶ Na sɛ yɛka sɛ ɛfiri nnipa a, yɛsuro nkurɔfokuo no; ɛfiri sɛ wɔn nyinaa bu Yohane sɛ odiyifoɔ.

²⁷ Na wɔbuaa Yesu sɛ: Yɛnnim. Na ɔno nso ka kyerɛɛ wɔn sɛ: Me nso merenka tumi ko a mede meyɛ yeinom menkyerɛ mo.

Ɔsetie ne asoɔden

²⁸ Na modwene yei ho sɛn? Ɔbarima bi wɔ mma baanu; na ɔkɔɔ deɛ ɔdi kan no hɔ sɛ: Ɔba, nnɛ kɔyɛ me bobe turo mu adwuma!

²⁹ Na ɔba no buaa sɛ: Merenkɔ! Na akyire yi, ɔsesaa n’adwene, na ɔkɔeɛ.

³⁰ Na ɔkɔɔ deɛ ɔka ho no hɔ, kɔkaa saa ara kyerɛɛ no. Na ɔbuaa sɛ: Owura mɛkɔ! nanso wankɔ.

³¹ Wɔn baanu yi mu hwan na ɔyɛɛ deɛ n’agya pɛ? Na wɔse: Deɛ ɔdi kan no. Yesu see wɔn sɛ: Nokorɛ mese mo sɛ, togyefoɔ ne nnwamamfoɔ redi mo anim akɔ Nyankopɔn ahennie mu.

³² Na Yohane nam tenenee kwan mu baa mo nkyɛn, na moannye no anni; na togyefoɔ ne nnwamamfoɔ na wɔgyee no diiɛ, na mo nso mohunuiɛ no, moannu mo ho akyire yi annye no anni.

Akuafoɔ bɔne no

³³ Montie ɛbɛ foforɔ! Afuowura bi wɔ hɔ a ɔyɛɛ bobe turo, na ɔgyee ho ban hyiae, na ɔtuu mu nsa-kyi-amena, na ɔtoo aban tentene, na ɔde hyɛɛ ahwɛsofoɔ bi nsa, na ɔgyaa hɔ kɔɔ baabi.

³⁴ Na aduaba berɛ duruiɛ no, ɔsomaa ne nkoa kɔɔ ahwɛsofoɔ no nkyɛn sɛ wɔnkɔgye n’aduaba mmra.

³⁵ Na ahwɛsofoɔ no faa ne nkoa no, na wɔhwee bi, na wɔkumm bi, na wɔsii bi aboɔ.

³⁶ Bio, ɔsomaa nkoa foforɔ a wɔdɔɔso sene akane deɛ no; nanso wɔyɛɛ wɔn saa ara.

³⁷ Na akyire yi, ɔsomaa ne ba kɔɔ wɔn nkyɛn sɛ: Wɔbɛfɛre me ba.

³⁸ Nanso ahwɛsofoɔ no hunuu ɔba no no, wɔkekaa wɔn mu sɛ: Oyi ne ɔdedifoɔ no; mommra mma yɛnkum no, na n’apɛgyadeɛ no nyɛ yɛn deɛ.

³⁹ Na wɔfaa no twee no firi bobe turo no mu hɔ kɔkumm no.

⁴⁰ Enti da a bobe turo wura no bɛba no, ɛdeɛn na ɔbɛyɛ ahwɛsofoɔ no?

⁴¹ Wɔka kyerɛɛ no sɛ: Ɔbɛsɛe nnipa bɔne no pasaa, na ɔde bobe turo no ama ahwɛsofoɔ foforɔ a wɔde aduaba bɛbrɛ no ne berɛ mu.

⁴² Yesu see wɔn sɛ: Monkenkanee twerɛ nsɛm no mu pɛn sɛ: Ɔboɔ a abantofoɔ apoɔ no, ɛno ara na abɛyɛ ɔdan no ntweaso tiboɔ; yei firi Awurade na ɛyɛ nwanwa yɛn ani so?

⁴³ Yei nti mese mo sɛ: Wɔbɛgye Nyankopɔn ahennie no afiri mo nsam de akɔma ɔman a wɔde mu aduaba bɛba.

⁴⁴ Na deɛ ɔbɛhwe ɔboɔ yi soɔ no, ne mu bɛbubu, na deɛ ɛbɛhwe ne soɔ no ɛbɛpɛkyɛ no.

⁴⁵ Na asɔfoɔ mpanimfoɔ ne Farisifoɔ no tee ne mmebuo no, wɔhunuu sɛ wɔn ho asɛm na ɔreka.

⁴⁶ Na wɔhwehwɛɛ sɛ wɔkyere no nanso na wɔsuroo nkurɔfoɔ akuakuo no, ɛfiri sɛ na wɔbu no sɛ odiyifoɔ.