Hiob 40 - New Revised Asante Twi Bible

Hiob brɛ ne ho ase, AWURADE asɛm a ɛtɔ so mmienu. Susono ne ɔdɛnkyɛmmirampɔn

¹ Na AWURADE buaa Hiob sɛ:

² Ɔtɛnyifoɔ bi ne Otumfoɔ no bɛham anaa? Deɛ ɔne Onyankopɔn gye akyinnyeɛ no, ɔmmua ɛ!

³ Na Hiob gyee AWURADE so sɛ:

⁴ Hwɛ, mesua, ɛdeɛn na memfa memmua woɔ? Me nsa na mede meto m’ano.

⁵ Makasa prɛko, na merentia so; ne mprenu, na merenkɔ so bio.

⁶ Ɛnna AWURADE firi ahum no mu buaa Hiob sɛ:

⁷ Bɔ w’asene sɛ ɔbarima ɛ, mɛbisa wo, na woakyerɛ me.

⁸ Wobɛdane m’atemmuo no ani? Wobɛbu me fɔ na woadi bem?

⁹ Wowɔ nsa sɛ Nyankopɔn deɛ, na wobɛtumi de nne a ɛte sɛ ne deɛ abom?

¹⁰ Ɛnneɛ fa tumidie ne kɛseyɛ hyehyɛ wo ho, na fira ɔhyerɛn ne animuonyam,

¹¹ hwie w’abufuo mmorosoɔ no gu, na hwɛ ɔhantanni biara na brɛ no ase.

¹² Hwɛ ahantanfoɔ nyinaa na brɛ wɔn ase, na tiatia abɔnefoɔ so wɔ wɔn tenabea hɔ.

¹³ Fa wɔn nyinaa sie dɔteɛ mu, na ma wɔn anim ntintim ahuntaeɛm,

¹⁴ ɛnneɛ na me nso mɛkamfo wo sɛ wo ara wo nifa na agye woɔ.

¹⁵ Hwɛ susono a meyɛɛ no ne wo, ewira na ɔdi no sɛ nantwie.

¹⁶ Hwɛ ne tumi a ɛwɔ n’asene mu ne n’ahoɔden a ɛwɔ ne yafunu ntini mu.

¹⁷ Ɔkoa ne dua sɛ tweneduro, ne srɛ mu nhoma nso toatoa mu.

¹⁸ Ne nnompe te sɛ kɔbere mfrafraeɛ dorobɛn, ne nkasɛɛ te sɛ adaban.

¹⁹ Ɔno ne Nyankopɔn akwan mfitiaseɛ, ne yɛfoɔ nko ara na ɔtumi de afena ka no.

²⁰ Na mmepɔ so aduane ma no, na wiram mmoadoma nyinaa goro hɔnom.

²¹ Nkasɛɛnkasɛɛ nnua ase na ɔda, demmire ne ɔwora ahuntaeɛm.

²² Nkasɛɛnkasɛɛ nnua nwunu kata ne so, nsunoa nnua twa ne ho hyia.

²³ Hwɛ, asuo ano yɛ den mpo a, ne ho mpopo; sɛ Yordan bu ba n’ano mpo a, ne bo da ne yam ara.

²⁴ Wɔbɛtumi akye no animono, na wɔde fidie ahwire ne hwenem?