Hiob 37 - New Revised Asante Twi Bible

¹ Aane, yei ho na m’akoma tutuo, na ɛpopo firi n’afa.

² Tie na montie ne nne huuyɛ, ne mmobom a ɛfiri n’anomu no.

³ Ɔgyaa mu ɔsoro ase nyinaa, na ne hann kɔduru asase anoano.

⁴ Aprannaa bobom di akyire, ɔde ne kɛseyɛ nne no bobom. Sɛ wɔte ne nne a, ɔrensianka wɔn.

⁵ Onyankopɔn de ne nne prannaa bobom ma no yɛ nwanwa, ɔyɛ adeɛ akɛseɛ a yɛnhunu mu,

⁶ na ɔka kyerɛ sukyerɛmma sɛ: Tɔ gu asase so! ne osukɛseɛ nso saa ara sɛ: Tue! ne n’ahoɔden suo akɛseɛ no.

⁷ Ɔsɔ nnipa nyinaa nsa ano, sɛ nnipa a ɔbɔɔ wɔn nyinaa nhunu de.

⁸ Ɛnna mmoadoma kɔ wɔn atu mu, na wɔtenatena wɔn tenabea.

⁹ Ahum firi mpiakyire hɔ ba, na awɔ nso firi atifi fam.

¹⁰ Nyankopɔn home na ɛma nsuo nkyenkyeneeɛ, na ɛma nsuo a ɛtrɛ nso da.

¹¹ Nsuo ara nko na ɔde soa mununkum, ɔtrɛ ne hann mununkum no mu.

¹² Na ɔma no di kyinhyia sɛdeɛ n’akwankyerɛ teɛ, sɛ ɛnkɔyɛ deɛ ɔhyɛ no nyinaa, wiase nyinaa ne asase ani;

¹³ sɛ ɛyɛ atenetene nti oo, sɛ ɛyɛ n’asase nti oo, sɛ ɛyɛ n’adɔeɛ so oo, ɔma no ba ara.

¹⁴ Hiob, yɛ aso wɔ yei ho, gyina hɔ dwene Nyankopɔn anwanwadeɛ ho.

¹⁵ Wonim berɛ a Onyankopɔn susuo ho, na ɔma ne mununkum mu hann hyerɛn?

¹⁶ Wonim mununkum nkariiɛ, nimdeɛ mu mudifoɔ no anwanwadeɛ no?

¹⁷ Sɛdeɛ wo ntadeɛ mu hyeɛ, berɛ a anafoɔ mframa ma asase yɛ dinn no?

¹⁸ Wo ne no na ɛde ewiem tɔnn a ɛwɔ hɔ pintinn sɛ ahwehwɛ a wɔaguo no trɛɛ hɔ?

¹⁹ Ma yɛnhunu deɛ yɛnka nkyerɛ no; esum nti yɛrenhunu deɛ yɛnka.

²⁰ Wɔnka nkyerɛ no sɛ mɛkasa? Anaasɛ obi bɛpɛ sɛ wɔmene no?

²¹ Na afei wɔnhunu hann sɛ ɛhyerɛn hyɛnn ewiem tɔnn, na mframa twam a, ɛma ewiem hɔ te.

²² Atifi fam asase so na sika firi ba, Nyankopɔn ho na animuonyam a ɛyɛ hu wɔ.

²³ Otumfoɔ deɛ, yɛnhu no; ɔyɛ tumi mu ɔkɛseɛ, na ɔrenkyea atemmuo ne tenenee a ɛdɔɔso.

²⁴ Enti nnipa suro no, ɔmmu akoma mu nyansafoɔ biara.