Hiob 33 - New Revised Asante Twi Bible

¹ Na afei, Hiob, tie me kasa ɛ, na yɛ aso ma me nsɛm nyinaa.

² Hwɛ, mabue m’ano, me tɛkyerɛma rekasa me dodom.

³ M’akomam teeyɛ ne me nsɛm, m’ano ka nimdeɛ kronkron.

⁴ Nyankopɔn honhom na ɛyɛɛ me, na Otumfoɔ no ahome na ɛmaa me nkwa.

⁵ Sɛ wobɛtumi a, yi ano kyerɛ me; Siesie wo ho m’anim, sɔre gyina.

⁶ Hwɛ, me nso meyɛ Nyankopɔn deɛ sɛ wo ara, anwommoɔ mu na wɔtii me nso firiiɛ.

⁷ Hwɛ, me ho hu rentu w’akoma, na me nhyɛsoɔ renyɛ wo so duru.

⁸ Ampa, woaka no m’aso mu, na nsɛm nne na metee sɛ wose:

⁹ Me deɛ, me ho te, mmarato nni me ho; me ho yɛ tɔtorɔtɔɔ, amumuyɛ biara nni me ho.

¹⁰ Hwɛ, ɔhunu ntɔkwa nsɛm wɔ me ho, ɔbu me sɛ ne tamfo.

¹¹ Ɔde me nan hyɛ mpokyerɛ mu, ɔkari m’akwan nyinaa.

¹² Hwɛ, yei mu na wontene, merebua wo; na Onyankopɔn so sene ɔdasani.

¹³ Adɛn nti na wo ne no ham, sɛ ɔmmua ne nsɛm nyinaa ho?

¹⁴ Nso Onyankopɔn kasa prɛko ne deɛ ɛtia mprenu, nanso onipa nnwene ho.

¹⁵ Daeɛ mu, anadwo adehunu mu, nnahɔɔ a atɔ nnipa soɔ mu, mpa so nnaeɛ mu,

¹⁶ emu na ɔbue nnipa aso, na ɔsɔ wɔn atenetene ano,

¹⁷ sɛ ɔbɛsane onipa afiri ne nneyɛɛ ho, na wayi ahantan ahunta onipa,

¹⁸ na watwe ne kra afiri Amena mu, ne ne nkwa nso na antɔ afena ano.

¹⁹ Na wɔde yea twe n’aso ne mpa so ne ne nnompe mu daa aperedie.

²⁰ Na ne nkwa ma aduane fono no, na ne kra po akɔnnɔduane.

²¹ Ne honam afɔn ama no ayɛ hununa, na ne nnompe a anka wɔnhunu mpo ada adi.

²² Na ne kra bɛn ɔsɛeɛ Amena, na ne nkwa nso bɛn akumfoɔ.

²³ Sɛ ɔbɔfoɔ dimafoɔ wɔ hɔ ma no, apem no mu ɔbaako, sɛ ɔrekyerɛ onipa deɛ ɛtene ma no a,

²⁴ ɛno na ɔhu no mmɔbɔ ka sɛ: Kɔgye no, na wankɔ ɔsɛeɛ Amena no mu, na manya agyedeɛ, a,

²⁵ ɛnneɛ ne honam yɛ sɔɔsɔɔ sɛ mmɔfra deɛ, ɔsane kɔ ne mmeranteberɛ mu.

²⁶ Ɔkoto Onyankopɔn a, n’ani sɔ no, na ɔhunu n’anim anigyeɛ mu, na ɔdane ɔdasani tenenee ma no,

²⁷ na ɔto dwom kyerɛ nnipa sɛ: Mayɛ bɔne, na makyea deɛ ɛtene no, nanso ɔne me anni no sɛdeɛ ɛfata me.

²⁸ Wagye me kra na ankɔ ɔsɛeɛ Amena mu, na me nkwa rehunu hann no.

²⁹ Hwɛ, yeinom nyinaa na Onyankopɔn yɛ mprenu ne mprɛnsa wɔ onipa ho,

³⁰ sɛ ɔbɛsane ne kra afiri ɔsɛeɛ Amena ho, na wanya hann, nkwa hann no mu.

³¹ Yɛ aso, Hiob, na tie me; yɛ komm, na menkasa.

³² Sɛ nsɛm bi wɔ hɔ a, yi ano kyerɛ me, kasa, na wo bemdie bɛyɛ me fɛ.

³³ Sɛ ɛnte saa a, ɛnneɛ tie me ara, yɛ komm, na menkyerɛ wo nyansa.