Hiob 30 - New Revised Asante Twi Bible

Hiob kyerɛ ne seesei asetena a ɛyɛ mmɔborɔ

¹ Na afei wɔn a mekyɛne wɔn panin koraa sere me, wɔn a mepo wɔn agyanom sɛ mede wɔn bɛhyɛ me nkraman a wɔhwɛ me nnwankuo so mu,

² wɔn nsam tumi nso bɛyɛ me dɛn, wɔn a wɔn ahoɔden asa?

³ Ohia ne ɛkɔm nti wɔatwintwam, wɔwewe nkyɛkyerɛ so deɛ ɛhɔ yɛ sakasaka, kusuu ne basabasa.

⁴ Wɔtete nkyenhahan wɔ nnuaa so, na ɛserɛ so nnuaa nhini ne wɔn aduane.

⁵ Wɔatu wɔn afiri nnipa mu, wɔhuro wɔn sɛ owifoɔ.

⁶ Mmonhwa a ɛhɔ yɛ hu mu na wɔteteɛ, ɛfam ne abotan mu ntokuro mu.

⁷ Nnua ntam na wɔbobom, nsansono ase na wɔsam.

⁸ Agyegyentwie mma ne wɔn, wɔn a wɔnni din mma nso, wɔapam wɔn afiri asase so.

⁹ Na afei madane wɔn sankuo dwom, na mayɛ wɔn sɛmɔdɛ.

¹⁰ Wɔkyiri me, wɔma me ne wɔn ntam twe, na wɔnkame sɛ wɔtoto ntasuo gu m’ani soɔ.

¹¹ Na ɛnam sɛ Onyankopɔn asane me homa, na wabrɛ me aseɛ nti, wɔn nso ato ahohyɛsoɔ atwene wɔ m’anim.

¹² Me nifa so na ahuhufoɔ no asɔreɛ, wɔsum me fidie, na wɔdane wɔn sɛeɛ akwan ba me so.

¹³ Wɔdwiri me kwan, wɔboa me sɛeɛ, nso obiara biara nsianka wɔn.

¹⁴ Wɔba sɛ obuba a emu trɛ, wɔnam huuyɛ no mu munimuni ba.

¹⁵ Ahuyideɛ adane hwɛ me so, wɔpamo me bakomadie sɛ mframa, na me yiedie asene kɔ sɛ mununkum.

¹⁶ Na afei me kra nane gu me mu, amanehunu nna asosɔ me mu.

¹⁷ Anadwo hodwo me nnompe wɔ me mu, na yea a ɛwe me no nnyae.

¹⁸ Emu den nko ara nti m’atadeɛ asakyera, ɛmia me sɛ me kamisaa kɔn.

¹⁹ Wato me atwene atɛkyɛ mu, me ho ayɛ sɛ dɔteɛ ne nso.

²⁰ Mesu mefrɛ wo, na wonnye me so, megyina hɔ, na wohwɛ me haa.

²¹ Woadane ayɛ sɛ otirimuɔdenfoɔ ama me, wode wo nsa a ɛyɛ den ne me di asie.

²² Woma me so ma metena mframa so kɔ, na woma menane huuyɛ mu.

²³ Na menim sɛ wode me bɛsane ama owuo ne efie a ateasefoɔ hyia mu no.

²⁴ Nanso obi ntene ne nsa nhwehwɛ ɔgyeɛ nkunkumaboɔkuo mu, na sɛ obi reyera a, ɔnsu mfrɛ ɔboafoɔ anaa?

²⁵ Mansu mamma deɛ ɔwɔ amaneɛ mu, ohiani anyɛ me kra mmɔbɔ anaa?

²⁶ Na metwɛn adepa, nso bɔne na aba, na m’ani daa hann so, na esum kabii aba.

²⁷ Me yamuadeɛ huru, na ɛnnyae, amanehunu nna ato me.

²⁸ Mabiri tumm na menenam, nso ɛmfiri awia; mesɔre badwa mu na meteam.

²⁹ Madane ɛserɛ so akraman nua ne sohoribereɛ adamfo.

³⁰ Me wedeɛ abiri rewae afiri me ho, na ahuhuro nti me nnompe ahye.

³¹ Na me sankuo adane abooboo, na me tɛntɛbɛn adane asufoɔ nne.