Hiob 28 - New Revised Asante Twi Bible

Ɛhe na nyansa firi? Mpeepee Nyankopɔn nyansa mu

¹ Aane dwetɛ wɔ ne nkommena, na afa wɔ hɔ ma sika a wɔhorɔ.

² Dadeɛ nso wɔtu no fam, na wɔnane aboɔ yɛ kɔbere.

³ Onipa ma esum to twa, na ɔhwehwɛ kɔduru akyirikyiri pɛ sum kabii ne sunsum mu aboɔ.

⁴ Ɔtu nkoron deɛ obi nteɛ hɔ, anammɔn a ɛtwam werɛ firi no, ɔsensɛne hɔ, ɔdi ahim deɛ ɔdasani biara nnie hɔ.

⁵ Asase wɔ hɔ yi, aduane firi mu ba, na n’ase nso, ɔdane ani sɛ ogya.

⁶ Hoaboɔ dabea ne n’aboɔ no mu, na sikafuturo nso wɔ hɔ.

⁷ Ɛyɛ ɔkwan a ɔkɔdeɛ nnim, na akorɔma ani nhunuu da,

⁸ anworanwora mmoa ntiatiaa soɔ, na gyatabire mfaa hɔ.

⁹ Ɔtene ne nsa ka ɔbohemmaa, ɔbutu mmepɔ wɔ ne nhini mu.

¹⁰ Ɔtwitwa aka abotan mu, na n’ani hwɛ aboɔdenneɛ nyinaa.

¹¹ Ɔsisi asuasu kwan na ansosɔ, na adeɛ a ahunta no, ɔyi ba hann mu.

¹² Na nyansa deɛ, ɛhe na wɔbɛhu no, na ɛhe na nhunumu afa wɔ?

¹³ Ɔdasani nnim ne boɔ, na wɔnhu no ateasefoɔ asase so.

¹⁴ Ebunu donkodonko ka sɛ: Ɛnni me mu. Na ɛpo ka sɛ: Ɛnni me hɔ.

¹⁵ Wɔmfa sika amapa nsi ananmu nnye, na wɔnkari dwetɛ ntua ne tiri boɔ.

¹⁶ Wɔnkari no Ofir sika so ntɔ, wɔmfa apopobibireboɔ a ne boɔ yɛ den ne hoaboɔ ntɔ.

¹⁷ Wɔmfa sika ne ahwehwɛ nto ho, na wɔmfa sika nnwinneɛ nsesa.

¹⁸ Wɔmmɔ nhwene panin ne aboɔ a ɛhyerɛn din, na nyansa boɔ sene nhwene pa deɛ.

¹⁹ Etiopia asase so akrateboɔ ne no nsɛ, na wɔmfa sika amapa nkyerɛ ne boɔ.

²⁰ Ɛnneɛ na ɛhe na nyansa firi ba? Na ɛhe na nhunumu tenabea wɔ?

²¹ Wɔde ahunta ateasefoɔ nyinaa aniwa, wɔakata so ɔsoro nnomaa anim.

²² Ɔyera amena ne owuo ka sɛ: Yɛde yɛn aso ate ne nka.

²³ Onyankopɔn na ɔhunu ne kwan mu, na ɔno na ɔnim ne tenabea;

²⁴ na ɔno na ɔhwɛ asase awieeɛ, ɔsoro ase nyinaa nso, ɔhunu.

²⁵ Ɔhyɛɛ mframa duro too hɔ, na ɔhyɛɛ nsuo sɛ ne nsusuiɛ teɛ no,

²⁶ berɛ a ɔhyɛɛ osuo ahyɛdeɛ, na ɔyɛɛ ɔkwan maa n’aprannaa asraman no,

²⁷ ɛno na ɔhunuiɛ na ɔyii no adie; ɔde sii hɔ na ɔpeepee mu.

²⁸ Na ɔka kyerɛɛ onipa sɛ: Hwɛ, AWURADE ho suro, ɛno ne nyansa, na bɔne ho dwanneɛ ne nhunumu.