Hiob 24 - New Revised Asante Twi Bible

Adɛn nti na Onyankopɔn ntea abɔnefoɔ ntɛm so

¹ Adɛn nti na Otumfoɔ nhyɛ berɛ ntua abɔnefoɔ ka, na wɔn a wɔni no no nhunu saa berɛ no?

² Ebinom deɛ wɔtwe ɛhyeɛ, wɔfom mmoakuo fa yɛne wɔn.

³ Wɔka nwisiaa afunumu kɔ, wɔgye akunafoɔ nantwie awowa.

⁴ Wɔsum ahiafoɔ firi ɔkwan so; asase so amanehunufoɔ bom hunta.

⁵ Hwɛ, sɛ anwea pradada so mfunumu firi adie no, saa ara na wɔkɔ wɔn dwumadie so kɔpɛ aduane, ɛserɛ so na wɔnya aduane ma mmɔfra.

⁶ Mfuo so na wɔtwa mmoa aduane, na wɔdi ɔbɔnefoɔ bobe turo mu mpɛpɛ.

⁷ Wɔde adagya na ɛda, wɔnni ntoma, na wɔnni nkataho awɔ mu.

⁸ Mmepɔ so sutorɔ fɔ wɔn, na ɛnam sɛ wɔnni dwanekɔbea nti, wɔyɛ ɔbotan atuu.

⁹ Wɔte agyanka firi nufoɔ ano, na wɔgye mmɔborɔni hɔ awowa.

¹⁰ Wɔma wɔnenam adagya a wɔnni ntoma, na wɔde ɛkɔm soasoa ayuo afiafi.

¹¹ Wɔkyi ngo wɔn afasuo mu, wɔtiatia nsa-kyi-amena so, nso wɔdi sukɔm.

¹² Nkuro mu nso na mmarima apinisie fire, na wɔn a wɔapira wɔn akra su frɛ, nanso Onyankopɔn mfa n’ani nkari amumuyɛsɛm no.

¹³ Ebinom ayɛ hann anim atuatefoɔ, wɔnhwɛ n’akwan, na wɔntena n’atempɔn mu.

¹⁴ Nhema na owudini sɔreɛ, ɔkum ɔmanehunufoɔ ne ohiani, na anadwo ɔyɛ sɛ owifoɔ.

¹⁵ Na ɔwaresɛefoɔ ani twɛn sum berɛ, ɔka sɛ: Ani biara renhu me. Na ɔde nkataho kata n’anim.

¹⁶ Esum mu na wɔhwirehwire adan mu; wɔto wɔn ho pono mu awia, wɔnnim hann.

¹⁷ Na wɔn nyinaa, esum kabii yɛ wɔn sɛ anɔpa, ɛfiri sɛ wɔne esum kabii mu ahuyideɛ yɛ nnamfo.

¹⁸ Ne ho yɛ hare wɔ nsuo ani; wɔadome ne kyɛfa asase so, ɔnnane n’ani nkɔ bobe nturo kwan so.

¹⁹ Ɔhyeɛ ne ahuhuro na ɛnane sukyerɛmma nsuo, saa ara nso na Asamando pra wɔn a wɔyɛ bɔne kɔ.

²⁰ Ɔyafunu a ɛwoo no no werɛ firi no, mmoaa fefe no. Wɔnkae no koraa bio, na wɔbɛbubu amumuyɛ sɛ dua.

²¹ Ɔdidii obonini a ɔnwoɔ mpo ho, na wanyɛ ɔbaa kunafoɔ yie.

²² Nanso Onyankopɔn de ne tumi yi atumfoɔ firi hɔ; wɔtumi nya asetena pa deɛ, nanso wɔnni nkwa ho anidasoɔ biara.

²³ Ɔma wɔtena hɔ dwoodwoo, na wɔde wɔn ho to ɛno so, nanso na n’ani hwɛ wɔn akwan.

²⁴ Wɔduru deɛ ɛkorɔn, nso kakraa bi pɛ, na wɔnni hɔ; wɔgyaa mu na wɔsie wɔn sɛ nnipa nyinaa, na wɔtwitwa wɔn sɛ ayuo mmɛtem.

²⁵ Sɛ ɛnte saa a, hwan na ɔbɛyi me ɔtorofoɔ, na wakyerɛ sɛ m’asɛm no nni mu?