Hiob 19 - New Revised Asante Twi Bible

Hiob nim sɛ Onyankopɔn bɛgye no

¹ Na Hiob gyee so sɛ:

² Mobɛha me kra akɔsi da bɛn, na mode nsɛm abubu me pasaa?

³ Mprɛdu nie a moasopa me, mo ani nwu mpo sɛ moho me werɛ?

⁴ Na mpo, sɛ ampa sɛ mafom a, me so na mfomsoɔ no da.

⁵ Sɛ ampa sɛ moma mo ho so tia me, na moyi me m’ahohora ho atɛn a,

⁶ ɛnneɛ monhunu sɛ Onyankopɔn na wakyea me kwan ama me, na ɔde n’asau atwa me ho ahyia.

⁷ Hwɛ, ayayadeɛ nti, meteam, nso wɔnnye me so. Mesu mefrɛ mmoa, nanso ɔgyeɛ biara mma.

⁸ Ɔde ban atwa me kwan mu, na mentumi mensene, na me kwan so aduru sum.

⁹ Wayi m’animuonyam afiri me so, na wahotiri me tiri so abotire.

¹⁰ Wabubu me afa nyinaa a menni hɔ bio, na watu m’anidasoɔ ase sɛ dua.

¹¹ Wama n’abufuo afram me so, na ɔbu me sɛ n’atamfo mu baako.

¹² N’asafo ahodoɔ bɔɔ mu bae, na wɔbɔɔ wɔn akwan wɔ me so, na wɔkyeree nsraban twaa me ntomadan ho hyiae.

¹³ Wayi me nuanom afiri me ho kɔ akyirikyiri, na wɔn a wɔni me adanedane me ahɔhoɔ koraa;

¹⁴ m’abusuafoɔ atwe wɔn ho kɔ, na wɔn a meni wɔn werɛ afiri me;

¹⁵ wɔn a wɔbɛtena me fie ne me mmaawa bu me sɛ ɔhɔhoɔ, madane wɔn ani so ɔnanani;

¹⁶ mefrɛ m’akoa, na ɔmmua me, mede m’ano mepa no kyɛw mpo.

¹⁷ Me yere mpo kyiri me home, na me yafumma mpo mpɛ m’ahomeguo.

¹⁸ Ntɔtɔfefewa mpo bu me animtia, mese meresɔre a, wɔkasa tia me.

¹⁹ Me ho yɛ me nnamfo pa nyinaa nwunu, na m’adɔfo adane wɔn ani atia me.

²⁰ Me nnompe femfam me wedeɛ ne me nam ho, na me se ho wedeɛ nko na mede afiri mu afire.

²¹ Monhu me mmɔbɔ, monhu me mmɔbɔ, me yɔnkonom, na Nyankopɔn nsa aka me.

²² Adɛn nti na moti me sɛ Onyankopɔn, na me nam nso mmee mo?

²³ O, sɛ anka wɔretwerɛ me nsɛm ɛ! Sɛ wɔde rehyɛ nwoma mu ɛ!

²⁴ Sɛ wɔde dadeɛ adetwerɛdeɛ ne sumpii rekurukyire ɔbotan mu na atena hɔ daa ɛ!

²⁵ Na me deɛ, menim sɛ me gyefoɔ te ase, na awieeɛ no ɔbɛdi m’asɛm ama me wɔ asase so.

²⁶ Na wɔasɛe me wedeɛ seyie akyiri no, na mɛfiri me honam mu afi ahunu Onyankopɔn;

²⁷ Ɔno na me ara mɛhwɛ no mafa, na m’aniwa bɛhunu, na ɛnyɛ ɔhɔhoɔ bi. Me sawa resa wɔ me mu.

²⁸ Sɛ mose: Sɛdeɛ yɛbɛsi apamo no afa! Ne, yɛahunu asɛm no ase wɔ ne hɔ, a,

²⁹ monsuro afena, ɛfiri sɛ abufuhyeɛ de afena asotwe ba, na moahunu sɛ atemmuo wɔ hɔ.