Hiob 18 - New Revised Asante Twi Bible

Bildad kasa sɛ abɔnefoɔ bɛsɛe

¹ Ɛnna Suhini Bildad buaa sɛ:

² Mobɛkɔ nsɛnkeka so akɔsi da bɛn? Monnwene ho, na ɛno akyiri no, yɛakasa.

³ Adɛn na wɔbu yɛn sɛ anantwie, na yɛyɛ mo ani so sɛ tibɔnkɔso anaa?

⁴ Wo a wotete wo ho w’abufuo mu. Wo nti na wɔbɛgya asase, na wɔatu ɔbotan afiri ne sibea anaa?

⁵ Nanso ɔbɔnefoɔ kanea bɛdum, na ne gyaframa renhyerɛn.

⁶ Hann bɛduru sum, ne ntomadan mu, na ne kanea adum wɔ ne so;

⁷ n’ahoɔden anammɔn ano bɛmoa, na n’agyinatuo ahwe no ase.

⁸ Na ɔno ara ne nan bɛka no ato atena mu, na wanante mfidie so.

⁹ Nsɛmma bɛsɔ ne nantin, na nkyehoma akyekyere no.

¹⁰ Wɔde kantankoraa bɛhunta fam ama no, na wɔasum no fidie ɔkwan so.

¹¹ Ehu bɛkuta no mmaa nyinaa ahyia, na ati no n’anammɔn mu.

¹² Ɛkɔm bɛsɛe n’ahoɔden, na mmusuo rebɛma no asunti.

¹³ Ɛbɛdi ne honam akwaa, aane, owuo abakan bɛdi n’akwaa.

¹⁴ Wɔbɛtu n’anidasoɔ afiri ne ntomadan mu, na wɔde no akɔ ahudeɛ mu hene no nkyɛn.

¹⁵ Deɛ ɛnyɛ ne dea bɛtena ne ntomadan mu, wɔbɛbɔ sɔfe apete ne tenabea.

¹⁶ Ne nhini bɛwuwu wɔ aseɛ, na ne mman adwinnwan wɔ soro.

¹⁷ Ne nkaeɛ bɛsɛe afiri asase so, na ɔrennya din asase ani.

¹⁸ Wɔbɛsum no afiri hann mu akɔ sum mu, na wɔapam no afiri wiase.

¹⁹ Ɔrennya mma anaa mmanana ne man mu, n’aseni biara renka n’atenaeɛ.

²⁰ Ne da bɛyɛ wɔn a wɔwɔ atɔeɛ ahodwiri, sɛdeɛ ehu kutaa wɔn a wɔwɔ apueeɛ no.

²¹ Ampa ara sɛdeɛ amumuyɛfoɔ tenabea teɛ ne no, ne deɛ ɔnnim Onyankopɔn no nso kyɛfa nie.