Hiob 14 - New Revised Asante Twi Bible

Hiob di onipa mmɔborɔyɛ ho abooboo

¹ Onipa a ɔbaa awo no, ne nna yɛ tiaa bi, na ɔhaw ma.

² Ɔpue sɛ nhwiren, na wɔtwa. Ɔdwane sɛ sunsum, na ɔnnyina.

³ Na yei so na woabue w’ani, na wode me rekɔ atemmuo mu w’anim?

⁴ Hwan na ɔbɛnya ɔhoteni, wɔn a wɔn ho akum no mu? Obiara nni hɔ.

⁵ Sɛ wɔahyɛ me nna ato hɔ, na n’abosome dodoɔ wɔ wo tirim, na woatwa hyeɛ a ɔrensiane ho ama no a,

⁶ ɛnneɛ yi w’ani firi ne so na ɔnhome nkɔsi sɛ ɔbɛwie ne da sɛ ɔpaani.

⁷ Na dua mpo, anidasoɔ wɔ hɔ ma no, sɛ wɔtwa a, ɛbɛfefɛ, na ne nnubaa remmɔ no:

⁸ Sɛ ne nhini kyenkyen ɛfam, na ne dunsini wu dɔteɛ mu a,

⁹ nsuo hwa nti ɛfefɛ, na ɛyiyi mman sɛ dua a wɔatɛ.

¹⁰ Na ɔdasani deɛ, ɔwu, na ɔbea hɔ, na onipa gyaa mu, na ɔwɔ he?

¹¹ Na sɛdeɛ nsuo firi ɔtadeɛ mu na ɛdɔ mpumpunadeɛ, na asuo nso mem na ɛweɛ no,

¹² saa ara na onipa kɔda hɔ, na ɔnsɔreɛ. Ɔsoro nnya ntwaa mu yi, wɔrennyane, na wɔrempusu wɔn mfiri wɔn nna mu.

¹³ O, sɛ wode me resie Asamando ɛ, sɛ wode me rehunta akɔsi sɛ w’abufuo bɛsane akorɔ ɛ, sɛ wohyɛ me da na wokae me ɛ!

¹⁴ Sɛ onipa wu a, ɔbɛtena ase bio anaa? Anka m’akodie nna nyinaa mɛtwɛn akɔsi sɛ me nsakyera bɛba.

¹⁵ Anka wobɛfrɛ, na me nso magye wo so, anka w’ani bɛgyina wo nsa ano adwuma no.

¹⁶ Nanso afei deɛ, wokan m’anammɔn, na wonyi w’ani mfiri me bɔne so.

¹⁷ Wɔasɔ me mmarato ano de ahyɛ kotokuo mu, na woakyekyere me bɔne ano.

¹⁸ Ampa ara bepɔ mpo hwe ase yera, na ɔbotan nso twe firi n’afa.

¹⁹ Na sɛdeɛ aboɔ nso, nsuo hono no, na ne yire pra fam dɔteɛ kɔ, saa ara na ɔdasani anidasoɔ nso woma no yera.

²⁰ Wotintim ne so ma no twam kɔ, wosakyera n’anim na wosum no kɔ.

²¹ Ne mma nya animuonyam mpo a, ɔnnim, wɔbrɛ wɔn ase nso a, ɔnhunu mma wɔn.

²² Ɔno ara ne honam yea nko na ɔteɛ, na ne kra di ɔno ara ne ho abooboo.