Hiob 12 - New Revised Asante Twi Bible

Hiob ma mmuaeɛ

¹ Na Hiob gyee so sɛ:

² Yoo! Mone ɔman no nne, na mowu a, nyansa bɛwu.

³ Me nso, mewɔ nteaseɛ sɛ mo ara, me deɛ, mentɔ mu mo anim. Na hwan na ɔnnim nnoɔma a ɛte sɛɛ yi?

⁴ Deɛ ne yɔnko sere no ne me, deɛ ɔsu frɛɛ Onyankopɔn na ɔgyee no soɔ, wɔsere ɔteneneeni a ɔdi mu no.

⁵ Deɛ ɔte hɔ dwoodwoo no tirim deɛ, animtiabuo na ɛfata amanehunu, ɛne deɛ wasiesie ama wɔn a wɔn nan watirie.

⁶ Amimfoɔ ntomadan si hɔ dwoodwoo, na wɔn a wɔhuru Nyankopɔn boɔ te hɔ komm, wɔn a wɔkura wɔn nyame wɔ wɔn nsam no.

⁷ Na yei deɛ, bisa mmoa ɛ, na wɔnkyerɛ wo, ne ɔsoro nnomaa nso, na wɔnka nkyerɛ wo.

⁸ Anaasɛ bisa asase hwɛ, na ɛnkyerɛ wo, na ɛpo mu mpataa nka nkyerɛ wo.

⁹ Hwan na ɔrenhunu yei nyinaa mu sɛ AWURADE nsa na ɛyɛɛ yeinom?

¹⁰ Ne nsam na ɔteasefoɔ biara kra wɔ, ne adasamma nyinaa ahonhom.

¹¹ Ɛnyɛ aso na ɛsɔ nsɛm hwɛ, na dodom nso ka aduane hwɛ?

¹² Nkɔkoraayɛ mu na nyansa wɔ, na onyinkyerɛ ma nhunumu.

¹³ Ɔno nkyɛn na nyansa ne mmaninneɛ wɔ, ɔno na afotuo ne nhunumu wɔ no.

¹⁴ Hwɛ, ɔdwiri, na wɔrento, ɔto onipa mu, na wɔremmue.

¹⁵ Hwɛ, ɔsianka nsuo ma no we, nanso ɔgyaa mu ma no butu asase.

¹⁶ Ɔno nkyɛn na ahoɔden ne nyansa wɔ, deɛ wɔdaadaa no ne ɔdaadaafoɔ nyinaa yɛ ne dea.

¹⁷ Ɔpa apamfoɔ ho de wɔn kɔ, na ɔma atemmufoɔ dane nkwaseafoɔ;

¹⁸ ɔsane ahemfo nkyehoma, na ɔde nhoma kyekyere wɔn asene.

¹⁹ Ɔpa asɔfoɔ ho de wɔn kɔ, na ɔde wɔn a wɔatim no hwe fam;

²⁰ ɔma anotefoɔ gyae kasa na ɔgye mpanimfoɔ nimdeɛ;

²¹ ɔde animtiabuo gu mmapɔmma so, na ɔhodwo nnɔmmarima abɔsoɔ mu.

²² Ɔyi adeɛ kuronkuron adi firi sum mu; na ɔde sum kabii firi ba hann mu;

²³ ɔma aman dɔɔso, na ɔsɛe wɔn; ɔtrɛ amanaman mu, na ɔtu wɔn kɔ,

²⁴ ɔgye asase so aman mu atitire akoma. Na ɔma wɔkyini asasesofoɔ a ɔkwan nni hɔ so.

²⁵ Wɔkeka sum a hann nni hɔ mu, na ɔma wɔkyini sɛ nsaboni.