Hiob 11 - New Revised Asante Twi Bible

Sofar asɛnka a ɛdi kan. Ɛsɛ Hiob sɛ ɔbrɛ ne ho ase Nyankopɔn anim

¹ Ɛnna Naamani Sofar gyee so sɛ:

² Wɔremmua nsɛm dodoɔ yi, anaasɛ wɔmma ɔbarima tɛkyerɛmakyene nni bem anaa?

³ Wo kasa worɔworɔ bɛma nnipa amua wɔn ano anaa? Na sɛ wodi fɛw a, obi renhyɛ wo aniwuo anaa?

⁴ Na woaka sɛ: Me nkyerɛkyerɛ yɛ gyenegyene, na me ho te wɔ Onyankopɔn anim.

⁵ O, anka ma Onyankopɔn nkasa na ɔmmue n’ano nkyerɛ wo;

⁶ na ɔnka wo nyansa ahuntasɛm, sɛ emu dɔ yie, na hunu sɛ Onyankopɔn yi n’ani firi w’amumuyɛ no bi so.

⁷ Wobɛhwehwɛ ahunu Onyankopɔn anaasɛ wobɛhunu akɔduru Otumfoɔ pɛyɛ mu anaa?

⁸ Ɛkorɔn sɛ ɔsoro, — ɛdeɛn na wobɛyɛ? Ɛyɛ kuronkuron sɛ Asamando, — ɛdeɛn na wonim?

⁹ Ne nsusuiɛ ware sene asase, na ɛtrɛ sene ɛpo.

¹⁰ Sɛ ɔtwam ba na ɔde nnipa gu nnua mu na ɔhyia asennie a, ɛnneɛ hwan na ɔbɛsianka no?

¹¹ Na ɔno na ɔnim nnipa ahuhufoɔ, na ɔhunu abusudeɛ, nanso ɔmmu.

¹² Na onipa tibɔnkɔso nya nyansa akoma a, na ɛte sɛdeɛ wɔawo afunumu ba onipa.

¹³ Sɛ wo deɛ, wosiesie w’akoma, na wotrɛ wo nsam kyerɛ no a,

¹⁴ sɛ amumuyɛ wɔ wo nsam a, yi kɔ akyiri, na mma abusudeɛ nntena wo ntomadan mu.

¹⁵ Ɛno na wobɛma w’ani so a wonni dɛm, na wobɛtim pintinn a worensuro.

¹⁶ Na wo werɛ bɛfiri wo haw, wobɛkae no sɛ nsuo a asene.

¹⁷ Na wo nkwa nna bɛyɛ sɛ awia ketee, esum bɛdane sɛ adekyeeɛ.

¹⁸ Na wobɛnya abotɔyam sɛ anidasoɔ wɔ hɔ, na wobɛhwɛ wo ho ahyia na woada dwoodwoo.

¹⁹ Wobɛda ahome, na obi renyi wo hu, na nnipa bebree bɛhwehwɛ wo hɔ adom.

²⁰ Na abɔnefoɔ deɛ wɔn ani so bɛsi na dwanekɔbea abɔ wɔn, na wɔn anidasoɔ bɛdane wɔn wuo.