Hebrifo 13 - New Revised Asante Twi Bible

Ɔsom a ɛsɔ Nyankopɔn ani

¹ Onuadɔ ntena hɔ daa.

² Ahɔhoyɛ nso, mommma mo ani mmpa so; ɛfiri sɛ yei so na ebinom nam yɛɛ abɔfoɔ hɔhoɔ a wɔn ani nni soɔ.

³ Monkae nneduafoɔ, sɛdeɛ mo ne wɔn na ɛda afiase, ne wɔn a wɔhunu amane biara, sɛ mo ara nso moda so wɔ honam mu yi.

⁴ Wɔnni awadeɛ ni, ade nyinaa mu, na wɔnngu awadeɛ mpa ho fi; ɛfiri sɛ nnwamamfoɔ ne awaresɛefoɔ deɛ, Onyankopɔn bɛbu wɔn atɛn.

⁵ Mommma sikanibereɛ mmma mo abrabɔ mu, na mo ani nsɔ deɛ mowɔ no; ɛfiri sɛ ɔno ara aka sɛ: Merennya wo, nanso merempa wo da.

⁶ Na ɛma yɛde nnamyɛ ka sɛ: Awurade ne me boafoɔ, merensuro. Onipa bɛtumi ayɛ me deɛn?

⁷ Monkae mo mpanimfoɔ a wɔaka Nyankopɔn asɛm akyerɛ mo. Monhwɛ wɔn abrabɔ awieeɛ nsua wɔn gyidie.

⁸ Yesu Kristo te sɛdeɛ ɔteɛ nnora, ɛnnɛ, ɛne daapem nyinaa.

⁹ Mommma nkyerɛkyerɛ ahodoɔ ne nsɛm foforɔ mmfa mo nnkyinkyini, na ɛyɛ sɛ wɔde adom hyɛ akoma den, na ɛnyɛ nnuane a wɔn a wɔdiiɛ no nni ho mfasoɔ biara.

¹⁰ Yɛwɔ afɔrebukyia a wɔn a wɔsom ntomadan no nni ho kwan sɛ wɔdi ho biribie.

¹¹ Na mmoa a bɔne nti ɔsɔfo panin de wɔn mogya kɔ kronkron mu no, wɔhye wɔn afunu nsra no akyiri.

¹² Na Yesu nso, deɛ ɛbɛyɛ na ɔde ɔno ara ne mogya ate ɔman no ho nti, ɔhunuu amane, kuro no pono akyi.

¹³ Ɛno nti momma yɛmfiri adi nkɔ ne nkyɛn nsraban no akyiri nkɔsoa n’ahohora.

¹⁴ Na yɛnni kuro a ɛwɔ hɔ daa wɔ ha, na mmom deɛ ɛbɛba no akyiri kwan na yɛhwehwɛ.

¹⁵ Enti momma yɛmfa ne so mmɔ Nyankopɔn ayeyie afɔdeɛ daa, ɛne anofafa a ɛbɔ no abodin no.

¹⁶ Na yieyɛ ne adekyɛ na mommma mo ani mmpa soɔ, ɛfiri sɛ saa afɔrebɔ no sɔ Nyankopɔn ani.

¹⁷ Montie mo mpanimfoɔ na mommrɛ mo ho ase mma wɔn, ɛfiri sɛ wɔn na wɔwɛn mo kra sɛ wɔn a wɔbɛbu ho akonta, na wɔde anigyeɛ ayɛ, na ɛnyɛ ahomeguo; ɛfiri sɛ yei nyɛ mfasoɔ biara mma mo.

¹⁸ Mommɔ mpaeɛ mma yɛn; ɛfiri sɛ yɛnim pefee sɛ yɛwɔ ahonim pa, pɛ sɛ yɛbɔ yɛn bra yie nnoɔma nyinaa mu.

¹⁹ Na mesrɛ mo ara yie sɛ monyɛ yei, na wɔagyae me ama mo ntɛm pa.

Nhyira

²⁰ Na asomdwoeɛ Nyankopɔn a ɔnam daa apam no mogya soɔ, ayi nnwan no hwɛfoɔ kɛseɛ a ɔne yɛn Awurade Yesu afiri awufoɔ mu no,

²¹ ɔnsiesie mo adepa biara mu mma monyɛ deɛ ɔpɛ, na ɔmfa Yesu Kristo so nyɛ mo mu ade a ɛsɔ n’ani. Ɔno na animuonyam nka no daa daa. Amen.

Afotuo ne nkyea a ɛdi akyire

²² Anuanom, mesrɛ mo sɛ, montie afotusɛm yi; ɛfiri sɛ matwerɛ no nsɛm tiaa bi mamane mo.

²³ Monhunu sɛ wɔagyaa yɛn nua Timoteo; na sɛ ɔba ntɛm pa a, me ne no bɛba abɛhu mo.

²⁴ Monkyea mo mpanimfoɔ nyinaa ne ahotefoɔ nyinaa. Wɔn a wɔfiri Italia kyea mo.

²⁵ Adom nka mo nyinaa. [Amen.]