Atemmufo 9 - New Revised Asante Twi Bible

Abimelek nnebɔne ne ne sɛeɛ

¹ Ɛnna Yerubaal ba Abimelek sii mu kɔɔ Sekem ne na nuanom nkyɛn, na ɔka kyerɛɛ wɔn ne ne na n’agya fie abusua nyinaa sɛ:

² Monka ngu Sekemfoɔ nyinaa aso mu sɛ: Deɛ ɛwɔ he na ɛyɛ ma mo, sɛ Yerubaal mmammarima aduɔson no nyinaa bɛdi mo soɔ anaa ɔbaako? Na monkae sɛ mo dompe ne mo nam ne me.

³ Ɛnna ne na nuanom no kaa ne ho nsɛm yi nyinaa guu Sekemfoɔ nyinaa aso mu; na wɔn akoma dane dii Abimelek akyi, na wɔse: Yɛn nua ne no.

⁴ Na wɔfaa Baal-berit fie nnwetɛbena aduɔson de maa no; na Abimelek de bɔɔ nnipa ahuhufoɔ animharefoɔ bi paa maa wɔdii n’akyi.

⁵ Na ɔbaa n’agya fie Ofra bɛkunkumm ne nuanom, Yerubaal mmammarima aduɔson no, ɔboɔ baako so; nanso ɛkaa Yerubaal babarima kumaa Yotam, ɛfiri sɛ ɔde ne ho siee.

⁶ Na Sekemfoɔ no nyinaa ne abankɛseɛ mufoɔ nyinaa bɛhyiae, na wɔkɔ kɔsii Abimelek hene nkaeɛboɔ dupɔn a ɛwɔ Sekem no ase.

⁷ Na wɔkɔka kyerɛɛ Yotam no, ɔsii mu kɔgyinaa Gerisim bepɔ atifi, na ɔmaa ne nne so teaa mu ka kyerɛɛ wɔn sɛ: Sekemfoɔ, montie me, na Onyankopɔn nso ntie mo.

⁸ Da bi nnua kɔɔ sɛ wɔrekɔsra obi ngo asi wɔn so hene, na wɔka kyerɛɛ ngodua sɛ: Di yɛn so hene.

⁹ Na ngodua ka kyerɛɛ wɔn sɛ: Mennya me sradeɛ a wɔde hyɛ Onyankopɔn ne nnipa animuonyam no hɔ, na menkɔkyini nnua so anaa?

¹⁰ Na nnua no ka kyerɛɛ borɔdɔma sɛ: Wo deɛ, bra bɛdi yɛn so hene.

¹¹ Na borɔdɔma ka kyerɛɛ wɔn sɛ: Mennya me dɛ ne m’aba pa no hɔ, na menkɔkyini nnua so anaa?

¹² Na nnua no ka kyerɛɛ bobe sɛ: Wo deɛ, bra bɛdi yɛn so hene.

¹³ Na bobe ka kyerɛɛ wɔn sɛ: Mennya me nsa a ɛgye anyame ne nnipa ani no hɔ, na menkɔkyini nnua so anaa?

¹⁴ Ɛnna nnua no nyinaa ka kyerɛɛ nkasɛɛ sɛ: Wo deɛ, bra bɛdi yɛn so hene.

¹⁵ Na nkasɛɛ ka kyerɛɛ nnua no sɛ: Sɛ nokorɛ mu na moresra me ngo asi me mo so hene a, ɛnneɛ mommra mmɛhyɛ me nwunu ase; na sɛ ɛnte saa a, ogya mfiri nkasɛɛ mu mmɛhye Lebanon ntweneduro no.

¹⁶ Na afei, sɛ modii no nokorɛ ne pɛyɛ mu sɛ mode Abimelek sii hene, na sɛ mo ne Yerubaal ne ne fie adi no yie, na sɛ ne nsa ano adwuma ho adeɛ na mode ayɛ no yi a, —

¹⁷ sɛ m’agya ko maa mo na ɔde ne nkwa too ne nsam, na ɔgyee mo firii Midian nsam,

¹⁸ na mo deɛ, moasɔre atia m’agya fie nnɛ akum ne mma, mmarima aduɔson ɔboɔ baako so, na mode n’afenaa ba Abimelek asi Sekemfoɔ so hene, sɛ mo nua ne no nti, —

¹⁹ ɛnneɛ, sɛ nokorɛ ne tenenee mu na mo ne Yerubaal ne ne fie adi nnɛ yi a, mo ani nnye Abimelek ho, na ɔno nso ani nnye mo ho.

²⁰ Na sɛ ɛnte saa a, ogya mfiri Abimelek mu mmɛhye Sekemfoɔ ne abankɛseɛ mufoɔ, na ogya nso mfiri Sekemfoɔ ne abankɛseɛ mufoɔ mu mmɛhye Abimelek.

²¹ Na Yotam twee ne ho dwane kɔɔ Beer kɔtenaa hɔ, ne nua Abimelek ho suro nti.

²² Na Abimelek dii Israel so mfeɛ mmiɛnsa.

²³ Ɛnna Onyankopɔn somaa honhommɔne bi baa Abimelek ne Sekemfoɔ ntam, na Sekemfoɔ twitwaa Abimelek nkontompo,

²⁴ na Yerubaal mma aduɔson no ho mmusuo aba, na wɔn mogya abua wɔn nua Abimelek a ɔkumm wɔn no ne Sekemfoɔ a wɔhyɛɛ ne nsa den sɛ ɔnkum ne nuanom no atifi.

²⁵ Na Sekemfoɔ maa nnipa kɔtɛɛ no mmepɔ atifi, na wɔbɔɔ wɔn a wɔbɛfaa wɔn nkyɛn ɔkwan no soɔ nyinaa apoo. Na wɔkɔka kyerɛɛ Abimelek.

²⁶ Na Ebed ba Gaal ne ne nuanom ba bɛsene kɔɔ Sekem; na Sekemfoɔ no de wɔn ani too ne so.

²⁷ Na wɔfirii adi kɔɔ mfuo mu kɔtetee wɔn bobe nturo mu aba na wɔkyikyii nsa, na wɔtoo anigyeɛ nnwom, na wɔkɔɔ wɔn nyame fie, na wɔdidi nomee, na wɔdomee Abimelek.

²⁸ Na Ebed ba Gaal kaa sɛ: Hwan ne Abimelek, na hwan ne Sekem a yɛnsom no? Ɛnyɛ Yerubaal ba ne no na Sebul yɛ ne safohene? Monsom Sekem agya Hamor mmarima no ɛ, na ɛdeɛn nti na yɛn deɛ, yɛnsom no?

²⁹ Na hwan na ɔde ɔman yi bɛhyɛ me nsa na anka matu Abimelek soɔ. Na ɔka kyerɛɛ Abimelek sɛ: Ma wo dɔm nnɔɔso na firi bra.

³⁰ Na kuro no so safohene Sebul tee Ebed ba Gaal nsɛm no, na ne bo fuiɛ,

³¹ na ɔnam aseɛ somaa abɔfoɔ maa wɔkɔɔ Abimelek nkyɛn sɛ: Hwɛ, Ebed ba Gaal ne ne nuanom aba Sekem, na hwɛ, wɔrehwanyan ɔman no atia wo.

³² Na afei sɔre anadwo, wo ne nnipa a wɔka wo ho no, na kɔtɛ wira mu.

³³ Na anɔpa a owia repue no, sɔre ntɛm bɛto hyɛ kuro no so, na hwɛ, ɔno ne nnipa a wɔka ne ho no bɛfiri adi abɛhyia wo, na woayɛ no sɛdeɛ wobɛtumi.

³⁴ Ɛnna Abimelek ne ɛdɔm a wɔka ne ho no nyinaa sɔree anadwo, na wɔnam akuo nnan bɛtetɛɛ Sekem.

³⁵ Na Ebed ba Gaal firii adi kɔgyinaa kuro no pono ano. Na Abimelek ne nnipa a wɔka ne ho no sɔre firii atɛeɛ hɔ.

³⁶ Na Gaal hunuu nnipa no, ɔka kyerɛɛ Sebul sɛ: Hwɛ, nkurɔfoɔ bi firi mmepɔ no atifi resiane. Na Sebul ka kyerɛɛ no sɛ: Mmepɔ no sunsum na wohunu sɛ nnipa no.

³⁷ Na Gaal kaa bio sɛ: Hwɛ, ɔman bi firi asase funuma mu resiane ba, na ekuo baako firi Akɔmfoɔ Dupɔn kwan so reba.

³⁸ Na Sebul ka kyerɛɛ no sɛ: Afei, ɛhe na w’ano a ɛkaa sɛ: Hwan ne Abimelek a yɛnsom no no wɔ? Ɛnyɛ nnipa a wobuu wɔn akumaa no nie? Afei firi adi ɛ, na wo ne wɔn nkɔko.

³⁹ Na Gaal firii adi dii Sekemfoɔ no anim, na ɔne Abimelek kɔkoe.

⁴⁰ Na Abimelek pamm no, na ɔdwanee n’anim, na atɔfoɔ bebree totɔe de kɔsii kuro no pono ano.

⁴¹ Na Abimelek tenaa Aruma; na Sebul pamm Gaal ne ne nuanom no sɛ wɔnntena Sekem.

⁴² Na adeɛ kyeeɛ no, nkurɔfoɔ no firii adi kɔɔ wira mu; wɔkɔka kyerɛɛ Abimelek.

⁴³ Na ɔfaa nnipa no buu wɔn mu akuo mmiɛnsa, na ɔkɔtɛɛ wiram. Na ɔhwɛe, na hwɛ, na nkurɔfoɔ no refiri adi afiri kuro no mu, na ɔsɔre tiaa wɔn kunkumm wɔn.

⁴⁴ Na Abimelek ne asafokuo a wɔka ne ho no bɔɔ kirididi kɔgyinaa kuro no pono ano, na asafokuo mmienu no to hyɛɛ wɔn a wɔwɔ wiram no nyinaa so kunkumm wɔn.

⁴⁵ Na Abimelek ne kuro no koo da mu no nyinaa, na ɔfaa kuro no, na ɔkumm nnipa a wɔwɔ mu no, na ɔbɔɔ kuro no, na ɔde nkyene petee so.

⁴⁶ Na Sekem abankɛseɛ mufoɔ nyinaa teeɛ no, wɔkɔɔ onyame Berit fie aban mu.

⁴⁷ Na wɔkɔka kyerɛɛ Abimelek sɛ Sekem aban mufoɔ nyinaa aboaboa wɔn ano.

⁴⁸ Ɛnna Abimelek foro kɔɔ Salmon bepɔ soɔ, ɔne nkurɔfoɔ a wɔka ne ho no nyinaa, na Abimelek faa akuma kuraa ne nsam na ɔkɔtwaa dua mman, na ɔmaa so bɔɔ ne kɔn ho, na ɔka kyerɛɛ ɛdɔm a wɔka ne ho no sɛ: Deɛ moahunu sɛ mayɛ yi, monka mo ho nyɛ sɛdeɛ mayɛ no.

⁴⁹ Na nnipa no nyinaa twitwaa nnua mman de dii Abimelek akyi de bɛguu aban no ho, na wɔde gya too aban no mu guu wɔn so. Na Sekem abankɛseɛ no mu nnipa nyinaa nso wuwuiɛ, mmarima ne mmaa bɛyɛ apem.

⁵⁰ Ɛnna Abimelek sii mu kɔɔ Tebes kɔkyeree Tebes so nsraban, na ɔfae.

⁵¹ Na abantenten denden bi wɔ kuro no mu, na ɛhɔ na mmarima ne mmaa nyinaa ne kuro no mufoɔ nyinaa dwanedwane kɔeɛ na wɔtoo wɔn ho mu, na wɔforo kɔɔ aban no atifi.

⁵² Na Abimelek duruu aban no ho bɛkoe, na ɔtwe pinii aban no pono ano sɛ ɔde ogya rebɛhye.

⁵³ Na ɔbaa bi too ayuyammoba bɔɔ Abimelek tiri de pɛkyɛɛ ne tikwankoraa.

⁵⁴ Ɛnna ɔfrɛɛ n’akoa a ɔso n’akodeɛ ntɛm ka kyerɛɛ no sɛ: Twe wo nkrantɛ ku me, na wɔanka no me ho sɛ ɔbaa na ɔkumm no. Na n’abɔfra no wɔɔ no maa no tɔree.

⁵⁵ Na Israel mmarima no hunuu sɛ Abimelek atɔ no, wɔn nyinaa kɔɔ wɔn tenabea.

⁵⁶ Na Onyankopɔn tuaa Abimelek bɔne a ɔyɛɛ n’agya, sɛ ɔkumm ne nuanom aduɔson no so ka.

⁵⁷ Na Sekem mmarima no bɔne nyinaa nso, Onyankopɔn maa no buaa wɔn atifi, na Yerubaal ba Yotam nnome no baa wɔn so.