4 Mose 29 - New Revised Asante Twi Bible

Totorobɛnto afahyɛ afɔdeɛ

¹ Na bosome a ɛtɔ so nson no da a ɛdi kan no, monhyia nhyia kronkron; monnyɛ adwumaden biara; ɛnyɛ mo totorobɛntohyɛn da.

² Na mommɔ ɔhyeɛ afɔdeɛ a ɛyi hwa hwanhwam ma AWURADE: Nantwinini baako, odwennini baako, nnwanten mma a wɔadi afe afe nson a wɔdi mu;

³ ne ɛho aduane afɔdeɛ: Esiam a wɔde ngo afɔre abupɛn du mu mmiɛnsa nka nantwinini no ho, abupɛn du mu mmienu nka odwennini no ho,

⁴ na abupɛn du mu baako nka nnwammaa nson no mu koro biara ho;

⁵ ne ɔpapo baako a wɔde bɛbɔ bɔne ho afɔdeɛ de apata ama mo;

⁶ ɛsono bosome foforɔ so hyeɛ afɔdeɛ, ne ɛho aduane afɔdeɛ, ne daa ɔhyeɛ afɔdeɛ ne ɛho aduane afɔdeɛ, ne ɛho ahwiesa sɛdeɛ ɛteteɛ; na ɛnyɛ AWURADE gya afɔdeɛ a ɛyi hwa hwanhwam.

Nnipa asebrɛ da afɔdeɛ

⁷ Na bosome a ɛtɔ so nson no ara da a ɛtɔ so du no, monhyia nhyia kronkron, na monni mmuada; monnyɛ adwuma biara;

⁸ na momfa ɔhyeɛ afɔdeɛ a ɛyi hwa hwanhwam mmrɛ AWURADE: Nantwinini baako, odwennini baako, nnwanten mma a wɔadi afe afe nson a wɔdi mu;

⁹ ne ɛho aduane afɔdeɛ esiam a wɔde ngo afɔre abupɛn du mu mmiɛnsa nka nantwinini no ho, abupɛn du mu mmienu nka odwennini no ho,

¹⁰ abupɛn du mu baako nka nnwammaa nson no mu koro biara ho;

¹¹ ne bɔne ho afɔdeɛ papo baako, ɛsono bɔne ho afɔdeɛ ne daa ɔhyeɛ afɔdeɛ ne ɛho aduane afɔdeɛ ne ɛho ahwiesa.

Asese afahyɛ afɔdeɛ

¹² Na bosome a ɛtɔ so nson no da a ɛtɔ so dunum no, monhyia nhyia kronkron; monnyɛ adwumaden biara na monhyɛ fa nnanson mma AWURADE.

¹³ Na momfa ɔhyeɛ afɔdeɛ, ogya afɔdeɛ a ɛyi hwa hwanhwam mmrɛ AWURADE: Anantwinini dummiɛnsa, adwennini mmienu, nnwanten mma a wɔadi afe afe dunan a wɔdi mu;

¹⁴ ne ɛho aduane afɔdeɛ; esiam abupɛn du mu mmiɛnsa a wɔde ngo afɔre nka anantwinini dummiɛnsa no mu koro biara ho, abupɛn du mu mmienu nka adwennini mmienu no ho,

¹⁵ na abupɛn du mu baako nka nnwammaa dunan no mu koro biara ho;

¹⁶ ne bɔne ho afɔdeɛ papo baako; ɛsono daa ɔhyeɛ afɔdeɛ, ɛho aduane ne ɛho ahwiesa.

¹⁷ Na da a ɛtɔ so mmienu no: Anantwinini dummienu, adwennini mmienu, nnwanten mma a wɔadi afe afe dunan a wɔdi mu;

¹⁸ ne anantwinini, adwennini ne nnwammaa no ho aduane afɔdeɛ ne ahwiesa, wɔn dodoɔ sɛdeɛ ɛteɛ wɔ mmara no mu;

¹⁹ ne bɔne ho afɔdeɛ papo baako; ɛsono daa ɔhyeɛ afɔdeɛ ne ɛho aduane afɔdeɛ ne ɛho ahwiesa.

²⁰ Na ɛda a ɛtɔ so mmiɛnsa no: Anantwinini dubaako, adwennini mmienu, nnwanten mma a wɔadi afe afe dunan a wɔdi mu;

²¹ ne anantwie, adwennini ne nnwammaa no ho aduane afɔdeɛ ne ahwiesa, wɔn dodoɔ sɛdeɛ ɛteɛ wɔ mmara no mu;

²² ne bɔne ho afɔdeɛ papo baako; ɛsono daa ɔhyeɛ afɔdeɛ ne ɛho aduane afɔdeɛ ne ɛho ahwiesa.

²³ Na da a ɛtɔ so nnan no; anantwinini du, adwennini mmienu, nnwanten mma a wɔadi afe afe dunan a wɔdi mu;

²⁴ ne anantwinini, adwennini ne nnwammaa no ho aduane afɔdeɛ ne ahwiesa, wɔn dodoɔ sɛdeɛ ɛteɛ wɔ mmara no mu;

²⁵ ne bɔne ho afɔdeɛ papo baako, ɛsono daa ɔhyeɛ afɔdeɛ ne ɛho aduane afɔdeɛ ne ɛho ahwiesa.

²⁶ Na da a ɛtɔ so nnum no; anantwinini nkron, adwennini mmienu, nnwanten mma a wɔadi afe afe dunan a wɔdi mu;

²⁷ ne anantwinini, adwennini ne nnwammaa no ho aduane afɔdeɛ ne ahwiesa, wɔn dodoɔ sɛdeɛ ɛteɛ wɔ mmara no mu;

²⁸ ne bɔne ho afɔdeɛ papo baako; ɛsono daa ɔhyeɛ afɔdeɛ ne ɛho aduane afɔdeɛ ne ɛho ahwiesa.

²⁹ Na da a ɛtɔ so nsia no; anantwinini nwɔtwe, adwennini mmienu, nnwanten mma a wɔadi afe afe dunan a wɔdi mu;

³⁰ ne anantwinini, adwennini ne nnwammaa no ho aduane afɔdeɛ ne ahwiesa, wɔn dodoɔ sɛdeɛ ɛteɛ wɔ mmara no mu;

³¹ ne bɔne ho afɔdeɛ papo baako; ɛsono daa ɔhyeɛ afɔdeɛ ne ɛho aduane afɔdeɛ ne ɛho ahwiesa.

³² Na da a ɛtɔ so nson no; anantwinini nson, adwennini mmienu, nnwanten mma a wɔadi afe afe dunan a wɔdi mu;

³³ ne anantwinini, adwennini ne nnwammaa no ho aduane afɔdeɛ ne ahwiesa, wɔn dodoɔ sɛdeɛ ɛteɛ wɔ mmara no mu;

³⁴ ne bɔne ho afɔdeɛ papo baako; ɛsono daa ɔhyeɛ afɔdeɛ ne ɛho aduane afɔdeɛ ne ɛho ahwiesa.

³⁵ Ɛda a ɛtɔ so nwɔtwe no, monhyia afahyɛ nhyiamu; monnyɛ adwumaden biara;

³⁶ na momfa hyeɛ afɔdeɛ a ɛne ogya afɔdeɛ a ɛyi hwa hwanhwam mmrɛ AWURADE: Nantwinini baako, odwennini baako, nnwanten mma a wɔadi afe afe nson a wɔdi mu;

³⁷ nantwinini ne odwennini ne nnwammaa no ho aduane afɔdeɛ ne ahwiesa, wɔn dodoɔ sɛdeɛ ɛteɛ wɔ mmara no mu;

³⁸ ne bɔne ho afɔdeɛ papo baako; ɛsono daa ɔhyeɛ afɔdeɛ ne ɛho aduane afɔdeɛ ne ɛho ahwiesa.

³⁹ Yeinom na monyɛ mma AWURADE, mo afa a mohyɛ no mu; ɛsono mo bɔhyɛ adeɛ ne mo ayamyi afɔdeɛ, mo hyeɛ afɔdeɛ ne mo aduane afɔdeɛ ne mo ahwiesa ne mo asomdwoeɛ afɔdeɛ.

⁴⁰ Na Mose ka kyerɛɛ Israelfoɔ no sɛdeɛ AWURADE hyɛɛ Mose no nyinaa.