4 Mose 22 - New Revised Asante Twi Bible

Balak soma ma wɔkɔhyia Bileam

¹ Na Israelfoɔ no tu kɔkyeree nsraban wɔ Moab mpaperɛ so Yordan fa a ɛbɛn Yeriko agya.

² Na Sipor ba Balak hunuu deɛ Israel yɛɛ Amorifoɔ no nyinaa.

³ Na Moab suroo ɔman no pii, ɛfiri sɛ na wɔdɔɔso, na ehu kaa Moab, Israelfoɔ no nti.

⁴ Na Moab ka kyerɛɛ Midian mpanimfoɔ sɛ: Afei ɛdɔm yi bɛdi yɛn ho adeɛ nyinaa, sɛdeɛ nantwie di asase so wira no. Saa berɛ no mu no Sipor ba Balak na na ɔyɛ Moab hene.

⁵ Na ɔsomaa abɔfoɔ kɔɔ Beor ba Bileam nkyɛn wɔ Petor a ɛda asubɔnten no ano, ne manfoɔ asase so, sɛ wɔnkɔhyia no sɛ: Hwɛ, ɔman bi firi Misraim aba, na hwɛ, wɔabɛkata asase ani, na wɔn ara na wɔgu m’anim yi.

⁶ Na afei bra bɛdome ɔman no ma me, ɛfiri sɛ wɔyɛ den sene me, sɛ ebia mɛtumi maku wɔn, na mapamo wɔn afiri asase yi so anaa; na menim sɛ deɛ wohyira no no, wɔahyira no, na deɛ wodome no no, wɔadome no.

⁷ Na Moab mpanin ne Midian mpanin no sii mu kɔe, na adebisa akatua no kura wɔn nsam; na wɔkɔɔ Bileam nkyɛn de Balak asɛm no kɔtoo n’anim.

⁸ Na ɔka kyerɛɛ wɔn sɛ: Montena ha anadwo yi, na mede mmuaeɛ bɛbrɛ mo, sɛdeɛ AWURADE bɛkasa akyerɛ me no. Na Moab asafohene no ne Bileam tenaa hɔ.

⁹ Na Onyankopɔn baa Bileam nkyɛn bɛkaa sɛ: Mmarima bɛn na wɔne wo wɔ hɔ yi?

¹⁰ Na Bileam ka kyerɛɛ Onyankopɔn sɛ: Moabhene Sipor ba Balak na ɔsoma maa wɔbaa me nkyɛn bɛkaa sɛ:

¹¹ Hwɛ, ɔman a wɔfiri Misraim baeɛ no abɛkata asase ani. Afei bra bɛdome wɔn ma me, sɛ ebia mɛtumi ne wɔn ako na mapam wɔn anaa.

¹² Na Onyankopɔn ka kyerɛɛ Bileam sɛ: Ɛne wɔn nnkɔ; nkɔdome ɔman no, na wɔahyira wɔn.

¹³ Na Bileam sɔree anɔpa, na ɔka kyerɛɛ Balak asafohene no sɛ: Monkɔ mo asase so, na AWURADE ampene amma me kwan sɛ me ne mo nkɔ.

¹⁴ Na Moab asafohene no sɔre baa Balak nkyɛn bɛkaa sɛ: Bileam ampene sɛ ɔne yɛn bɛba.

¹⁵ Na Balak sane somaa atitire a wɔdɔɔso na wɔn anim yɛ nyam sene wɔn.

¹⁶ Na wɔkɔɔ Bileam nkyɛn kɔka kyerɛɛ no sɛ: Sɛ Sipor ba Balak seɛ nie: Afei deɛ, mma biribi nnsi wo me nkyɛn ba kwan,

¹⁷ na mɛhyɛ wo animuonyam pii, na biribiara a wobɛka akyerɛ me no, mɛyɛ: Enti bra ara na bɛdome ɔman yi ma me.

¹⁸ Na Bileam buaa see Balak nkoa no sɛ: Sɛ Balak de ne fie a dwetɛ ne sika ahyɛ mu ma, ma me mpo a, merentumi memmu AWURADE me Nyankopɔn asɛm so menkɔyɛ biribi ketewa anaa kɛseɛ.

¹⁹ Na afei mo nso montena ha anadwo yi, na menhunu deɛ AWURADE bɛsane aka akyerɛ me.

²⁰ Na Onyankopɔn baa Bileam nkyɛn anadwo bɛka kyerɛɛ no sɛ: Sɛ hyia na mmarima yi bɛhyiaa woɔ a, sɔre na ɛne wɔn nkɔ; nanso asɛm a mɛka makyerɛ woɔ no nko na di soɔ.

N’afunumu gye no nkwa

²¹ Ɛnna Bileam sɔree anɔpa hyehyɛɛ n’afunumu na ɔne Moab atitire no sii mu kɔe.

²² Na ɔrekorɔ no, Onyankopɔn bo fui, na AWURADE bɔfoɔ bɛgyinaa ɔkwan no so sɛ ɔbɛsi no kwan; nso na ɔte n’afunumu so, na ne nkoa baanu ne no na ɛnam.

²³ Na afunumu no hunuu AWURADE bɔfoɔ no sɛ ɔgyina ɔkwan mu kura nkrantɛ a watwe wɔ ne nsam na afunumu no mane firii kwan no so kɔfaa wiram; na Bileam hwee afunumu no sɛ ɔredane no aba ɔkwan mu.

²⁴ Ɛnna AWURADE bɔfoɔ no kɔgyinaa bobe nturo ntam nammɔnkorɔ kwan mu a ɔfasuo wɔ ha ne ha.

²⁵ Na afunumu no hunuu AWURADE bɔfoɔ no no, ɔde ne ho miaa ɔfasuo no, na ɔkaa Bileam nan miaa ɔfasuo no ho; na ɔkɔɔ so hwee no ara.

²⁶ Na AWURADE bɔfoɔ no twe kɔɔ anim kɔgyinaa deɛ ɛhɔ yɛ hihiaa a ɔkwan nni hɔ a wɔbɛdane akɔ nifa anaa benkum.

²⁷ Na afunumu no hunuu AWURADE bɔfoɔ no no, ɔbutuu fam, Bileam ase; na Bileam bo fui, na ɔde abaa bɔɔ afunumu no.

²⁸ Ɛnna AWURADE buee afunumu no ano, na ɔka kyerɛɛ Bileam sɛ: Ɛdeɛn na mayɛ woɔ a woabɔ me mprɛnsa yi?

²⁹ Na Bileam ka kyerɛɛ afunumu no sɛ: Sɛ woagoro me ho ntira. Sɛ mekura nkrantɛ a, anka sɛsɛɛ maku wo.

³⁰ Na afunumu no ka kyerɛɛ Bileam sɛ: Ɛnyɛ w’afunumu ne me a woatena me so ara de abɛsi nnɛ da yi? Mayɛ wo sei pɛn anaa? Na ɔse: Dabi.

³¹ Ɛnna AWURADE buee Bileam ani, na ɔhunuu AWURADE bɔfoɔ no sɛ ɔgyina ɔkwan mu kura nkrantɛ a watwe wɔ ne nsam, na ɔkoto de n’anim butuu fam tim.

³² Na AWURADE bɔfoɔ no ka kyerɛɛ no sɛ: Adɛn nti na wobɔɔ w’afunumu no mprɛnsa yi? Hwɛ, maba sɛ merebɛsi wo kwan, ɛfiri sɛ wo kwan no ntene wɔ m’anim;

³³ na afunumu no hunuu me, na ɔmane firii m’anim mprɛnsa yi; sɛ wammane amfiri m’anim a, anka sɛsɛɛ maku wo dada, na ɔno deɛ, magye no nkwa.

³⁴ Na Bileam ka kyerɛɛ AWURADE bɔfoɔ no sɛ: Mayɛ bɔne na mennim sɛ wo na wogyina ɔkwan mu rehyia me; na afei, sɛ ɛyɛ bɔne w’ani so deɛ a, mɛsane m’akyi.

³⁵ Na AWURADE bɔfoɔ no ka kyerɛɛ Bileam sɛ: Ɛne mmarima no nkɔ; na asɛm a mɛka makyerɛ woɔ no nko na ka. Na Bileam ne Balak atitire no sii mu kɔe.

³⁶ Na Balak tee sɛ Bileam reba no, ɔfiri kɔhyiaa no, Moab kuro a ɛda Arnon a ɛyɛ ɛhyeɛ no soɔ no mu, wɔ nhyenoa hɔ pɛɛ.

³⁷ Na Balak ka kyerɛɛ Bileam sɛ: Ɛnyɛ soma na mesomaa sɛ wɔmmɛhyia wo mmra? Adɛn nti na woamma me nkyɛn? Wonnye nni sɛ mɛtumi ahyɛ wo animuonyam anaa?

³⁸ Na Bileam ka kyerɛɛ Balak sɛ: Hwɛ, afei maba wo nkyɛn. Mɛtumi maka asɛm bi anaa? Asɛm a Onyankopɔn de hyɛ m’anomu no, ɛno na mɛka.

³⁹ Na Bileam ne Balak kɔe, na wɔduruu Kiriat-husot.

⁴⁰ Na Balak de anantwie ne nnwan bɔɔ afɔdeɛ, maa wɔde kɔmaa Bileam atitire a wɔne no wɔ hɔ no.

⁴¹ Na adeɛ kyeeɛ no, Balak faa Bileam, na ɔde no foro kɔɔ Baal sorɔnsorɔmmea so; na ɔfiri hɔ hunuu ɔman no ano.