2 Samuel 22 - New Revised Asante Twi Bible

Dawid aseda ne nkonimdie dwom

¹ Na da a AWURADE yii Dawid firii n’atamfo nyinaa ne Saulo nsam no, ɔkaa dwom yi mu nsɛm kyerɛɛ AWURADE,

² na ɔse: AWURADE, ne me botan, m’abankɛseɛ ne me gyefoɔ,

³ me botantim Nyankopɔn a medwane mekɔtoa no. Me kyɛm ne me nkwagyeɛ abɛn, m’abantenten ne me dwanekɔbea, m’agyenkwa a wogyee me firii akakabensɛm mu.

⁴ AWURADE a ɔfata sɛ wɔyi no ayɛ no na mesu mefrɛ no, na ɔgye me m’atamfoɔ nsam.

⁵ Na owuo asorɔkyeɛ twaa me ho hyiae, na sɛeɛ asuasu woro yii me hu.

⁶ Asamando nhoma kyekyeree me, owuo fidie bɛhyiaa me rebɛyi me.

⁷ M’ahohiahia mu mesu mefrɛɛ AWURADE, me Nyankopɔn na meteaa mu mefrɛɛ no. Na ɔtee me nne n’asɔrefie, na me nteamu duruu n’aso mu.

⁸ Ɛnna asase hinhimiiɛ, na ɛwosoe, ɔsoro nnyinasoɔ nso popoe, na ɛhinhimii, ɛfiri sɛ na ne bo afu.

⁹ Wisie tu firii ne hwenem, na ogya firii n’anomu hyee adeɛ, na nnyansramma a wɔasɔ ne mu.

¹⁰ Ɔkuntunuu ɔsoro na ɔdurui fam, na esum kabii wɔ ne nan ase.

¹¹ Na ɔtenaa Kerub so tui, na wɔhunuu no mframa ntaban so.

¹² Na ɔde esum yɛɛ ne ho asese, nsuo mmoaano, danee mununkum kusuu.

¹³ Ne ho haran mu na nnyansramma dɛreeɛ.

¹⁴ AWURADE bɔɔ mu firii soro, na ɔsorosoroni no maa wɔtee ne nne.

¹⁵ Na ɔtotoo agyan de bɔɔ wɔn petee, aprannaa na ɔde tuu wɔn ase.

¹⁶ Na ɛpo mu aka yiyii adi, wiase nnyinasoɔ ho daa hɔ. Ɛnam AWURADE animuka nti, ɛfiri ne hwene mu home tehyeetehyee mu.

¹⁷ Ɔtenee ne nsa firii soro bɛfaa me, ɔtwee me firii nsuo pii mu.

¹⁸ Ɔgyee me firii me tamfo aniɛdenfoɔ ne wɔn a wɔkyiri me no nsam, ɛfiri sɛ wɔn ho yɛ den sene me.

¹⁹ Wɔbɛtoaa me m’amanehunu da mu, na AWURADE bɛyɛɛ me okyigyinafoɔ,

²⁰ na ɔyii me kɔgyinaa deɛ ɛhɔ trɛ, ɔgyee me, ɛfiri sɛ na ɔpɛ m’asɛm.

²¹ AWURADE tuaa me ka sɛdeɛ me tenenee teɛ, sɛdeɛ me bemdie teɛ na ɔtuaa me ka.

²² Na mehwɛɛ AWURADE akwan, na menyɛɛ bɔne mfirii me Nyankopɔn ho.

²³ Na n’atemmudeɛ nyinaa wɔ m’ani so, na n’ahyɛdeɛ nso, memfirii ho.

²⁴ Na manni fɔ wɔ n’anim, na mahwɛ me ho so afiri m’amumuyɛ ho.

²⁵ Na AWURADE atua me ka sɛdeɛ me tenenee teɛ, sɛdeɛ m’ahoteɛ a ɛda n’anim no teɛ.

²⁶ Ɔnokwafoɔ na wo ne no bɛdi no nokorɛ mu, ɔbarima a ɔdi mu na wo ne no bɛdi no amudie soɔ.

²⁷ Deɛ ne ho teɛ na wobɛte wo ho akyerɛ no, na ɔkontonkyini deɛ, wobɛkyinkyim wo ho akyerɛ no.

²⁸ Na ɔman a wɔbrɛ wɔn ho aseɛ no, wogye wɔn, na w’ani sa ahantanfoɔ na woabrɛ wɔn ase.

²⁹ Na wo, AWURADE, wone me kanea, na AWURADE haran me sum mu ma me.

³⁰ Na wo na mede wo tu dɔm, na mede me Nyankopɔn mehuri metra ɔfasuo.

³¹ Onyankopɔn deɛ, ne kwan yɛ pɛ, AWURADE bɔhyɛ yɛ nokorɛ, ɔyɛ ɛkyɛm ma wɔn a wɔde wɔn ho to ne soɔ nyinaa.

³² Na hwan ne onyame? Gye sɛ AWURADE nko. Na hwan na ɔyɛ ɔbotan? Gye sɛ yɛn Nyankopɔn.

³³ Saa Onyankopɔn yi ne m’aban a ɛyɛ den, na ɔma me kwan yɛ dwoodwoo.

³⁴ Ɔyɛɛ me nan sɛ aforotebereɛ deɛ, na ɔmaa megyinaa me mmepɔ so pintinn.

³⁵ Ɔkyerɛ me nsa akodie, na m’abasa akuntunu kɔbere mfrafraeɛ tadua mu.

³⁶ Na wode wo nkwagye kyɛm maa me, na wo mmoa ma meyɛɛ kɛseɛ.

³⁷ Wotrɛ m’anammɔn tutuo mu wɔ m’ase na me nan anwatiri.

³⁸ Metii m’atamfoɔ na mesɛee wɔn, na mansane de kɔsii sɛ mehyee wɔn,

³⁹ na memenee wɔn, na mebobɔɔ wɔn na wɔansɔre, na wɔtotɔe wɔ me nan ase.

⁴⁰ Na wode ahoɔden bɔɔ me abɔsoɔ maa akodie, wobrɛɛ wɔn a wɔsɔre tiaa me no ase hyɛɛ m’ase.

⁴¹ Na womaa m’atamfoɔ danee wɔn akyi kyerɛɛ me, wɔn a na wɔkyiri me no, na mesɛee wɔn.

⁴² Wɔhwɛe, na ɔgyefoɔ biara nni hɔ, wɔsu frɛɛ AWURADE, na wammua wɔn.

⁴³ Na mepɛkyɛɛ wɔn pasaa sɛ fam mfuturo, metiatiaa wɔn so mewɔɔ wɔn sɛ mmɔntene so dɔteɛ.

⁴⁴ Woyii me firii m’amanko mu, woahwɛ me sɛ menyɛ amanaman ti. Ɔman a menni wɔn no som me.

⁴⁵ Ananafoɔ bɛbrɛ wɔn ho ase ama me, wɔtee me nka pɛ, wɔtiee me.

⁴⁶ Ananafoɔ bo tui, na wɔde ahopopoɔ firi wɔn aban mu bae.

⁴⁷ AWURADE te ase, na nhyira nka me botantim no. Na me nkwagyeɛ botan Nyankopɔn no, wɔmma no so.

⁴⁸ Onyankopɔn a ɔtɔɔ were maa me, na ɔbrɛɛ aman ase hyɛɛ m’ase,

⁴⁹ deɛ ɔyii me firi m’atamfoɔ nsam, aane, wo na woma me so boro wɔn a wɔsɔre tia me no soɔ, wogyee me firi aniɛdenfoɔ nsam,

⁵⁰ Enti, AWURADE, mɛkamfo wo amanaman mu, na mabɔ wo din mato ayeyie nnwom,

⁵¹ sɛ wone deɛ ɔma ne hene nkwagyeɛ so, na ɔyɛ deɛ wasra no no adɔeɛ, Dawid ne n’asefoɔ daa.