2 Mose 25 - New Revised Asante Twi Bible

Ntomadan ho afɔrebɔdeɛ

¹ Na AWURADE kasa kyerɛɛ Mose sɛ:

² Ka kyerɛ Israelfoɔ no na wɔmmɛma me mmasoɔ afɔrebɔdeɛ. Obiara a n’akoma pɛ no nkyɛn na monnye me mmasoɔ afɔrebɔdeɛ.

³ Na yei ne mmasoɔ afɔrebɔdeɛ a monnye no wɔn nkyɛn no: Sika, dwetɛ, kɔbere mfrafraeɛ,

⁴ bibire, asaawa a ɛbere dum, koogyan, asaawa fufuo, mmirekyie nwi,

⁵ adwennini nwoma a wɔahyɛ no kɔkɔɔ, sukraman nwoma ne okuo nnua;

⁶ kanea ho ngo, ɔsra ngo ne nnuhwam a wɔhyeɛ ho aduro,

⁷ apopobibire aboɔ ne aboɔ a wɔde bɛsisi asɔfotadeɛ no ne adaaboɔ no mu no.

⁸ Na ma wɔnyɛ tenabea kronkron mma me na mentena wɔn mu.

⁹ Sɛdeɛ me ara merebɛkyerɛ wo tenabea no tebea ne ɛho nnoɔma nyinaa tebea no, saa ara na monyɛ no.

Apam adaka no yɛbea

¹⁰ Na wɔmfa okuo nyɛ adaka a ne tentene bɛyɛ basafa baako ne fa, na ne tɛtrɛtɛ bɛyɛ anammɔn mmienu ne fa, na ne korɔn bɛyɛ anammɔn mmienu ne fa.

¹¹ Na fa sika amapa dura ho, emu ne ɛho nyinaa na dura, na yɛ sika hankra twa ho hyia.

¹² Na gu sika nkaa nnan, na fa tuatua ne nan nnan no ho; nkaa mmienu nni fa ha, na nkaa mmienu nni fa ha.

¹³ Na fa okuo sene mpoma, na fa sika dura ho.

¹⁴ Na fa poma no wurawura nkaa no mu wɔ adaka no nkyɛn mu, na wɔmfa nsoa adaka no.

¹⁵ Mpoma no nwurawura adaka no ho nkaa no mu; wɔnnyiyi mmfiri mu.

¹⁶ Na fa Adanseɛ a mede bɛma woɔ no hyɛ adaka no mu.

¹⁷ Na fa sika amapa yɛ mpata adwa, ne tentene bɛyɛ basafa baako ne fa, na ne tɛtrɛtɛ bɛyɛ anammɔn mmienu ne fa.

¹⁸ Na sika a waboro na fa yɛ Kerubim mmienu no, na fa sisi mpata adwa no tiri mmienu no so.

¹⁹ Na yɛ kerub baako wɔ etire ha ne kerub baako wɔ etire ha. Mpata adwa no mu na momma kerubim no nyi adie wɔ ne tiri mmienu so soɔ.

²⁰ Na kerubim no ntrɛtrɛ wɔn ntaban mu ɔsoro mfa wɔn ntaban no nkata mpata adwa no so, na wɔn ani nkyerɛkyerɛ wɔn ho; mpata adwa no so na kerubim no ani nkyerɛkyerɛ.

²¹ Na fa mpata adwa no si adaka no so, na adaka no mu na fa Adanseɛ a mede bɛma woɔ no hyɛ.

²² Na ɛhɔ na me ne wo bɛhyia, na mafiri mpata adwa no so wɔ kerubim mmienu a wɔwɔ Adanseɛ adaka no soɔ no ntam maka wo nnoɔma a mɛhyɛ wo sɛ fa kyerɛ Israelfoɔ no nyinaa.

Ɛpono no ho nhyehyɛɛ

²³ Na fa okuo yɛ ɛpono, ne tentene basafa baako, na ne tɛtrɛtɛ anammɔn baako ne fa, na ne korɔn bɛyɛ anammɔn mmienu ne fa.

²⁴ Na fa sika amapa dura ho, na fa sika hankra twa ho hyia.

²⁵ Na yɛ ɛho mfemfamho a ne trɛ te sɛ nsam hyia, na fa sika hankra twa mfemfamho no ho hyia.

²⁶ Na yɛ sika nkaa nnan, na fa nkaa no sisi ntweaso nnan a ɛwowɔ ne nan ho no so.

²⁷ Mfemfamho no ase pa ara na nkaa no nnie, na ɛnyɛ deɛ wɔde mpoma bɛwurawura mu de asoa ɛpono no.

²⁸ Na fa okuo sene mpoma no, na fa sika duradura ho, na wɔde asoa ɛpono no.

²⁹ Na yɛ ɛso nyowa ne nyowaa ne nkoraa ne nkuruwa a wɔde bɛhwie; sika amapa na fa yɛ.

³⁰ Na fa kyerɛ paanoo sisi ɛpono no so wɔ m’anim daa.

Kaneadua no

³¹ Na fa sika amapa a waboro yɛ kaneadua; ne nan ne ne dua; ɛho nhwiren nkuramu, ne kukuduuduu ne ne nhwiren no mfiri ɛno ara mu.

³² Na nsa nsia ntuatua ho, kaneadua no nsa mmiɛnsa ntuatua fa ha, na kaneadua no nsa mmiɛnsa nso ntuatua fa ha.

³³ Nhwiren nkuramu mmiɛnsa a ɛte sɛ sorɔno deɛ wɔ nsa baako ho, ne kukuduuduu ne ne nhwiren, na nhwiren nkuramu mmiɛnsa a ɛte sɛ sorɔno deɛ wɔ nsa baako ho, ne kukuduuduu ne ne nhwiren. Saa ara na yɛ wɔ nsa nsia a ɛtuatua kaneadua no ho no ho.

³⁴ Na kaneadua no ho nhwiren nkuramu a ɛte sɛ sorɔno deɛ nnan, ne kukuduuduu ne ne nhwiren.

³⁵ Na kukuduuduu nsisi nsa mmienu mmienu a ɛtuatua ho no ase, wɔ nsa nsia a ɛtuatua kaneadua no mu no ase.

³⁶ Ɛho kukuduuduu ne ɛho nsa no mfiri mu ara; ne nyinaa na wɔmfa sika amapa a waboro nyɛ no baako.

³⁷ Na yɛ ɛso nkanea nson, na wɔmfa ne nkanea no nsisi so, na ɛnnɛre wɔ anim nkyerɛ fa hɔ.

³⁸ Na ɛho daawa ne ɛho nso nkuruwa nyɛ sika amapa.

³⁹ Sika amapa dwetikɛseɛ baako na wɔmfa nyɛ, ne ɛho nnoɔma yi nyinaa.

⁴⁰ Na hwɛ na yɛ no sɛdeɛ ne nsususoɔ a wɔde akyerɛ wo bepɔ no soɔ no teɛ no.