1 Samuel 30 - New Revised Asante Twi Bible

Dawid tɔ Amalekfoɔ so were

¹ Na Dawid ne ne mmarima no duruu Siklag da a ɛtɔ so mmiɛnsa no, na Amalekfoɔ abɛtua anafoɔ fam ne Siklag, na wɔabɔ Siklag, na wɔde ogya ahye.

² Na wɔafa mmaa a wɔwɔ mu no nnommum, firi mmɔfra so kɔsi mpanin so, wɔankum obiara, na wɔsoaa wɔn sii kwan so kɔeɛ.

³ Na Dawid ne ne mmarima no duruu kuro no mu no, na hwɛ, wɔde ogya ahye, na wɔn yerenom ne wɔn mmammarima ne wɔn mmammaa no, wɔafa wɔn nnommum kɔ.

⁴ Ɛnna Dawid ne dɔm a wɔka ne ho no memaa wɔn nne so sui ara kɔsii sɛ wɔannya ahoɔden ansu bio.

⁵ Na Dawid yerenom baanu no, Yesreelni Ahinoam ne Karmelni Abigail, Nabal yere no, nso wɔafa wɔn nnommum bi.

⁶ Na Dawid ho kyeree no papaapa, ɛfiri sɛ ɛdɔm no kaa sɛ wɔbɛsi no aboɔ, na ɛdɔm no nyinaa kra botoeɛ, wɔn mmammarima ne wɔn mmammaa nti; nanso Dawid hyɛɛ ne ho den AWURADE Nyankopɔn mu.

⁷ Na Dawid ka kyerɛɛ Ɔsɔfoɔ Ahimelek ba Abiatar sɛ: Fa asɔfotadeɛ no brɛ me. Na Abiatar de asɔfotadeɛ no brɛɛ Dawid.

⁸ Na Dawid bisaa AWURADE sɛ: Menti ɛdɔm yi anaa? Mɛto wɔn? Na ɔka kyerɛɛ no sɛ: Ti wɔn, na wobɛto wɔn, na gyeɛ nso wobɛgye.

⁹ Ɛnna Dawid sii mu kɔeɛ, ɔno ne mmarima ahansia a wɔka ne ho no. Na wɔduruu Besor subonhwa ho no, wɔn a wɔkaa akyire no soo hɔ.

¹⁰ Na Dawid ne mmarima ahanan tii wɔn, na ahanu a wɔabrɛ a wɔantumi antwa Besor subonhwa no soo hɔ.

¹¹ Na wɔhunuu Misraimni bi wiram hɔ, na wɔde no brɛɛ Dawid; na wɔmaa no paanoo diiɛ, na wɔmaa no nsuo nomeeɛ,

¹² na wɔmaa no borɔdɔma ɛtoa sini ne bobe aba ntoa ntoa mmienu; na ɔdiiɛ no, n’ani so baee no, ɛfiri sɛ nnansa awia ne anadwo na ɔnnidiiɛ na ɔnnomee.

¹³ Na Dawid ka kyerɛɛ no sɛ: Hwan nipa ne wo, na ɛhe na wofire? Na ɔse: Meyɛ Misraimni ba, Amalekni bi akoa, na me wura gyaa me hɔ, ɛfiri sɛ yadeɛ bɔɔ me nnaano.

¹⁴ Yɛkɔtuaa Keretifoɔ anafoɔ fam ne deɛ ɛyɛ Yuda dea no ne Kaleb anafoɔ fam, na yɛde ogya hyee Siklag.

¹⁵ Na Dawid ka kyerɛɛ no sɛ: Wode me bɛsiane akɔ ɛdɔm no nkyɛn? Na ɔse: Ka me Onyankopɔn sɛ worenku me, nso woremfa me nhyɛ me wura nsa, na mede wo bɛsiane akɔ ɛdɔm no nkyɛn.

¹⁶ Na ɔde no siane kɔeɛ; na hwɛ, asadeɛ bebrebe a wɔakɔfa no Filistifoɔ asase soɔ ne Yuda asase soɔ no nti, wɔboaboa fam hɔ nyinaa a na wɔredidi na wɔrenom na wɔresa.

¹⁷ Na Dawid kunkumm wɔn firi ahemadakye kɔsii da a ɛdi soɔ no anwummerɛ; na wɔn mu biara amfiri mu amfi gye mmeranteɛ ahanan a wɔtenatenaa yoma so dwaneeɛ.

¹⁸ Na Dawid gyee deɛ Amalekfoɔ faeɛ no nyinaa; ne yerenom baanu no nso, Dawid gyee wɔn;

¹⁹ na anka wɔn biribiara, ketewa oo, kɛseɛ oo, mmammarima oo, mmammaa oo, asadeɛ a wɔbɛfaeɛ no mu biara oo, Dawid de ne nyinaa sane bae.

²⁰ Na Dawid faa nnwan ne anantwie no nyinaa, na wɔde wɔn dii mmoa no anim baeɛ, na wɔkaa sɛ: Yei deɛ, Dawid asadeɛ nie!

²¹ Na Dawid duruu mmarima ahanu a wɔabrɛ a wɔantumi anni Dawid akyire a wɔgyaa wɔn tenaa Besor subonhwa ho no nkyɛn. Na wɔfirii adi bɛhyiaa Dawid ne ɛdɔm a wɔne no nam no, na Dawid pinkyɛɛ ɛdɔm no kyeaa wɔn.

²² Ɛnna mmarima a wɔne Dawid kɔeɛ no mu nnipa bɔne ne ahuhufoɔ buaa sɛ: Ɛnam sɛ wɔne yɛn ankɔ nti, wɔremma wɔn asadeɛ a yɛakɔgyeɛ no bi, gye wɔn yerenom ne wɔn mma na wɔmfa wɔn nkorɔ.

²³ Na Dawid kaa sɛ: Anuanom, monnyɛ saa, deɛ AWURADE de ama yɛn ho, na wahwɛ yɛn soɔ, na ɔde dɔm a wɔbaa yɛn soɔ no ahyɛ yɛn nsa.

²⁴ Na hwan na ɔbɛtie mo, asɛm yi mu? Na sɛ deɛ ɔkɔ akono kyɛfa teɛ no, saa ara na deɛ ɔtenaa nnoɔma ho no nso kyɛfa teɛ, wɔnkyɛ mu pɛ.

²⁵ Na ɛfiri da no ara de rekorɔ no, ɔde too hɔ yɛɛ ahyɛdeɛ ne atemmudeɛ maa Israel de bɛsi nnɛ.

²⁶ Na Dawid duruu Siklag no, ɔsoma maa wɔde asadeɛ no bi kɔmaa Yuda mpanin a wɔyɛ ne nnamfo kaa sɛ: Hwɛ, AWURADE atamfoɔ asadeɛ mu akyɛdeɛ a wɔde rebrɛ mo nie.

²⁷ Ɔde kɔmaa wɔn a wɔwɔ Betel ne wɔn a wɔwɔ Ramot a ɛwɔ Negeb ne wɔn a wɔwɔ Yatir,

²⁸ ne wɔn a wɔwɔ Aroer ne wɔn a wɔwɔ Sifmot ne wɔn a wɔwɔ Estemoa,

²⁹ ne wɔn a wɔwɔ Rakal ne wɔn a wɔwɔ Yerahmeelfoɔ nkuro mu, ne wɔn a wɔwɔ Kenifoɔ kuro mu,

³⁰ ne wɔn a wɔwɔ Horma ne wɔn a wɔwɔ Kor-asan ne wɔn a wɔwɔ Atak,

³¹ ne wɔn a wɔwɔ Hebron, ne mmeammea a Dawid ne ne nnipa kyinkyiniiɛ hɔ.