1 Mose 40 - New Revised Asante Twi Bible

Yosef kyerɛ nneduafoɔ daeɛ ase

¹ Na ɛbaa sɛ akyire yi Misraimhene nsahyɛni ne ne paanootoni fom wɔn wura, Misraimhene no.

² Na Farao bo fuu n’apiafoɔ baanu no, nsahyɛfoɔ panin ne paanootofoɔ panin no.

³ Na ɔde wɔn kɔguu afiase wɔ ankɔbeafoɔ panin no fie, faako a Yosef da hɔ.

⁴ Na ankɔbeafoɔ panin no maa Yosef hwɛɛ wɔn so som wɔn; na wɔkyɛree afiase hɔ kakra.

⁵ Na Misraimhene nsahyɛni ne ne paanootoni a na wɔgu afiase hɔ no baanu nyinaa sosoo daeɛ anadwo korɔ, ɛsono oyi daeɛ ne n’asekyerɛ, na ɛsono oyi nso daeɛ.

⁶ Na Yosef kɔɔ wɔn nkyɛn anɔpa kɔhwɛɛ wɔn, na hwɛ, na wɔayeyɛ mosomosoo.

⁷ Na ɔbisaa Farao apiafoɔ a wɔne no gu afiase wɔ ne wura fie no sɛ: Adɛn nti na nnɛ mo anim ayɛ bosabosaa sɛɛ?

⁸ Na wɔka kyerɛɛ no sɛ: Yɛasoso daeɛ, nso obiara nni hɔ a ɔbɛkyerɛ aseɛ. Na Yosef ka kyerɛɛ wɔn sɛ: Nkyerɛaseɛ mfiri Onyankopɔn hɔ anaa? Monka nkyerɛ me ɛ!

⁹ Ɛnna nsahyɛfoɔ panin no kaa ne daeɛ no kyerɛɛ Yosef sɛ: Me daeɛ mu no, na hwɛ, bobe bi si m’anim,

¹⁰ na bobe no apae nkorabata mmiɛnsa, na ayɛ sɛdeɛ ɛrefefɛ, na anyini agu nhyerɛne, na abɔ esia ayɛ aba a abereɛ.

¹¹ Na Farao kuruwa kura me, na metetee bobe aba no mekyi guu Farao kuruwa no mu, na mede kuruwa no hyɛɛ Farao nsa.

¹² Na Yosef ka kyerɛɛ no sɛ: Ne nkyerɛaseɛ nie: Nkorabata mmiɛnsa no yɛ nnansa.

¹³ Na aka nnansa na Farao ayi wo afiri ha de wo asane akɔdi wo dibea bio, na wode Farao kuruwa ahyɛ ne nsa sɛ kane a na woyɛ ne nsahyɛni no.

¹⁴ Nanso sɛ ɛyɛ a, kae me, na sɛ ɛsi wo yie a, yɛ me adɔeɛ, na bɔ me din kyerɛ Farao, na bɛyi me ɛdan yi mu,

¹⁵ ɛfiri sɛ wia na wɔwiaa me Hebrifoɔ asase soɔ, na ɛha nso menyɛɛ hwee a anka ɛsɛ sɛ wɔde me bɛto amena yi mu.

¹⁶ Na paanootofoɔ panin no hunuu sɛ nkyerɛaseɛ no yɛ no, ɔka kyerɛɛ Yosef sɛ: Me nso, me daeɛ mu no, na hwɛ, paanoo nkɛntɛn mmiɛnsa a ɛsisi soɔ wɔ m’atifi.

¹⁷ Na kɛntɛn a ɛdi soro no mu na Farao anomu atɔduane nyinaa bi wɔ; na nnomaa redidi wɔ kɛntɛn no mu wɔ m’atifi.

¹⁸ Na Yosef buaa sɛ: Ne nkyerɛaseɛ nie: Nkyerɛnkyɛ mmiɛnsa no yɛ nnansa;

¹⁹ na aka nnansa na Farao ayi wo afiri ha, na wakɔsɛne wo dua so ma nnomaa adi wo nam afiri wo ho.

²⁰ Na da a ɛtɔ so mmiɛnsa a ɛyɛ Farao awoda no, ɔtoo ne nkoa nyinaa pono, na ɔyii nsahyɛfoɔ panin ne paanootofoɔ mu panin no de wɔn baa ne nkoa anim;

²¹ na ɔsane de nsahyɛfoɔ mu panin no sii ne nsahyɛ so bio a ɔde kuruwa hyɛ Farao nsa.

²² Na paanootofoɔ panin no deɛ, ɔsɛnee no, sɛdeɛ Yosef kyerɛɛ wɔn aseɛ no.

²³ Nanso nsahyɛfoɔ panin no ankae Yosef, na ne werɛ firii no.