1 Mose 35 - New Revised Asante Twi Bible

Onyankopɔn hyira Yakob wɔ Betel

¹ Na Onyankopɔn ka kyerɛɛ Yakob sɛ: Sɔre kɔ Betel kɔtena hɔ, na si afɔrebukyia wɔ hɔ ma Onyankopɔn a ɔyii ne ho kyerɛɛ wo ɛda a woredwane afiri wo nua Esau anim no.

² Ɛnna Yakob ka kyerɛɛ ne fiefoɔ ne wɔn a wɔka ne ho nyinaa sɛ: Montoto anyame ananafoɔ a ɛwɔ mo mu no ngu, na monnwira mo ho, na monsakyera mo ntadeɛ.

³ Na momma yɛnsɔre nkɔ Betel, na menkɔsi afɔrebukyia wɔ hɔ memma Onyankopɔn a m’ahohiahia da ɔtiee me na ɔdii m’akyi wɔ kwan a mekɔeɛ no mu no.

⁴ Ɛnna wɔde wɔn anyame ananafoɔ a ɛwɔ wɔn nsam nyinaa ne wɔn aso mu nkaa maa Yakob, na ɔde siee dupɔn bi a ɛwɔ Sekem ho no ase.

⁵ Na wɔsii mu sɛ wɔrekorɔ no, Nyankopɔn ho hu baa nkuro a atwa wɔn ho ahyia no so, na wɔanti Yakob mma no.

⁶ Na Yakob ne nkurɔfoɔ a wɔka ne ho nyinaa duruu Lus a ɛwɔ Kanaan asase soɔ (a ɛne Betel).

⁷ Na ɔsii hɔ afɔrebukyia, na ɔfrɛɛ hɔ: El-betel, ɛfiri sɛ da a ɔredwane afiri ne nua anim no, ɛhɔ na Onyankopɔn yii ne ho kyerɛɛ no.

⁸ Na Rebeka abaawa panin Debora wui, na wɔsiee no Betel aseɛ fam wɔ odum bi ase, na ɔtoo dua no din Alon-bakut.

⁹ Na Onyankopɔn yii ne ho kyerɛɛ Yakob bio, ne ba a ɔfirii Mesopotamia baeɛ no mu, na ɔhyiraa no.

¹⁰ Na Onyankopɔn ka kyerɛɛ no sɛ: Wo din de Yakob, nanso wɔremfrɛ wo Yakob bio, na mmom Israel ne wo din; na ɔtoo no din Israel.

¹¹ Na Onyankopɔn ka kyerɛɛ no sɛ: Mene Onyankopɔn Tweaduampɔn, dɔre na yɛ bebree; ɔman ne aman asafo bɛfiri wo mu aba, na ahemfo firi w’asene mu bɛba.

¹² Na asase a mede mama Abraham ne Isak no, wo na mede bɛma woɔ; na w’asefoɔ a wɔbɛdi w’akyire no na mede asase no bɛma wɔn.

¹³ Na Onyankopɔn firii ne nkyɛn wɔ deɛ ɔne no kasaeɛ hɔ kɔɔ ɔsoro.

¹⁴ Na Yakob de odum sii deɛ ɔne no kasaeɛ hɔ, ɔboɔ dum, na ɔhwiee ɔnom afɔdeɛ guu so, na ɔde ngo guu so.

¹⁵ Na Yakob frɛɛ deɛ ɔne Onyankopɔn kasaeɛ hɔ Betel.

Rahel wuo

¹⁶ Na wɔtutu firi Betel kɔe. Na aka kwan tiaa bi na wɔaduru Efrat no, awoɔ kaa Rahel, na awoɔ no denee no.

¹⁷ Na n’awoɔ mu yɛɛ den no, awogyefoɔ no ka kyerɛɛ no sɛ: Nsuro, na yei nso wobɛwo ɔbabarima.

¹⁸ Na ne kra refiri ne mu na ɔreyɛ awuo no, ɔtoo no din Ben-oni, na n’agya deɛ, ɔfrɛɛ no Benyamin.

¹⁹ Na Rahel wui, na wɔsiee no ɛkwan a ɛde Efrat (a ɛne Betlehem) no nkyɛn.

²⁰ Na Yakob sii ne da so dum, ɛne Rahel da so dum de bɛsi nnɛ.

²¹ Na Israel tutu kɔsii ne ntomadan wɔ Eder abantenten akyiri nohoa.

²² Na ɛbaa sɛ Israel te asase no soɔ no, Ruben ne n’agya abaawayerɛ Bilha kɔdae, na Israel tee.

Yakob mmammarima

²³ Nso Yakob mmammarima yɛ dummienu: Lea mma ne Ruben (Yakob abakan), Simeon, Lewi, Yuda, Isakar ne Sebulon.

²⁴ Rahel mma ne Yosef ne Benyamin.

²⁵ Na Rahel abaawa Bilha mma ne Dan ne Naftali.

²⁶ Na Lea abaawa Silpa mma ne Gad ne Aser. Yeinom ne Yakob mmammarima a wɔwoo wɔn wɔ Mesopotamia.

Isak wuo

²⁷ Na Yakob baa n’agya Isak nkyɛn wɔ Mamre, wɔ Kiriat-arba (a ɛne Hebron), deɛ Abraham ne Isak tenaeɛ sɛ ahɔhoɔ no.

²⁸ Na Isak nna nyinaa yɛ mfirinhyia ɔha aduɔwɔtwe.

²⁹ Na Isak gyaa ne honhom mu, na ɔwui, na ɔtii ne nananom wɔ asamando, berɛ a na wabɔ akora, na nna amee no. Na ne mma Esau ne Yakob siee no.