1 Mose 32 - New Revised Asante Twi Bible

Yakob kɔhyia Esau

¹ Na Yakob sii ne kwan so sɛ ɔrekɔ; na Nyankopɔn abɔfoɔ bɛhyiaa no.

² Na Yakob hunuu wɔn no, ɔkaa sɛ: Nyankopɔn asafo nie. Na ɔtoo hɔ din: Maha-naim.

³ Na Yakob tuu abɔfoɔ dii n’anim kɔɔ ne nua Esau nkyɛn Seir asase so wɔ Edom wiram.

⁴ Na ɔhyɛɛ wɔn sɛ: Sɛdeɛ monka nkyerɛ me wura Esau ne sɛ: W’akoa Yakob se: Mekɔtenaa Laban nkyɛn na ɛhɔ na mewɔ de abɛduru sɛsɛɛ.

⁵ Manya anantwie, mfunumu, nnwan, mmirekyie ne nkoa ne mfenaa; na masoma sɛ wɔmmɛka nkyerɛ me wura, sɛdeɛ mɛnya w’anim adom.

⁶ Na abɔfoɔ no sane baa Yakob nkyɛn bɛkaa sɛ: Yɛakɔ wo nua Esau nkyɛn, na ɔno nso ne mmarima ahanan reba abɛhyia wo.

⁷ Ɛnna Yakob suroo sɛ, na ne ho yeraa no. Na ɔkyɛɛ nkurɔfoɔ a wɔwɔ ne nkyɛn ne nnwan, mmirekyie, anantwie ne yoma no mu akuo mmienu

⁸ kaa sɛ: Sɛ Esau ba kuo baako so bɛku wɔn a, ekuo a ɛbɛka no bɛnya kwan adwane.

⁹ Na Yakob kaa sɛ: M’agya Abraham Nyankopɔn ne m’agya Isak Nyankopɔn, AWURADE a wosee me sɛ: Sane kɔ w’asase so ne w’abusua mu, na mɛyɛ wo yie no,

¹⁰ w’adɔeɛ ne wo nokorɛ a wode akyerɛ w’akoa yi mu biara nsɛ me, ɛfiri sɛ mede me poma na metwaa Yordan yi, na afei mayɛ akuo mmienu.

¹¹ Mesrɛ wo, yi me firi me nua Esau nsam, ɛfiri sɛ mesuro no sɛ ɔbɛba abɛku me, ne ɛnanom ne wɔn mma nyinaa.

¹² Wo na wokaa sɛ: Yie na mɛyɛ woɔ, na mɛma w’asefoɔ ayɛ sɛ mpoano anwea a ne dodoɔ nti wɔntumi nkan.

¹³ Na ɔtenaa hɔ anadwo no; na ɔyii deɛ ɛwɔ ne nsa mu bi sɛ ɔde rekɔkyɛ ne nua Esau,

¹⁴ mmirekyibereɛ ahanu, mpapo aduonu, nnwammereɛ ahanu, adwennini aduonu,

¹⁵ yoma a wɔma nufoɔ ne wɔn mma aduasa, anantwibereɛ aduanan, anantwinini du, mfunumubereɛ aduonu ne mfunumu anini du.

¹⁶ Na ɔde hyɛɛ ne nkoa nsa akuakuo, na ɔka kyerɛɛ ne nkoa no sɛ: Monsene nni m’anim, na momma kuo ne kuo ntam ntwe.

¹⁷ Na ɔhyɛɛ deɛ ɔdi kan no sɛ: Sɛ me nua Esau bɛhyia wo, na ɔbisa wo sɛ: Hwan nipa ne wo, na ɛhe na worekorɔ, na yeinom a ɛdi w’anim yi yɛ hwan dea?

¹⁸ Ka kyerɛ no sɛ: W’akoa Yakob dea; ɛyɛ ayɛyɛdeɛ a wasoma de rebrɛ me wura Esau; na hwɛ, ɔno nso wɔ yɛn akyi.

¹⁹ Na ɔhyɛɛ deɛ ɔtɔ so mmienu ne deɛ ɔtɔ so mmiɛnsa ne wɔn a wɔdi mmoakuo no akyire nyinaa nso sɛ: Sɛ mokɔhunu Esau a, monka asɛm korɔ yi ara nkyerɛ no.

²⁰ Na monka nsi so sɛ: Hwɛ, w’akoa Yakob wɔ yɛn akyi. Afei ɔkaa sɛ: Mede ayɛyɛdeɛ a ɛdi m’anim yi merekɔpata no, ansa na mahunu n’anim; ebia ɔbɛhwɛ m’anim.

²¹ Na ayɛyɛdeɛ no sene dii n’anim; na ɔno deɛ, ɔtenaa nsraban no mu anadwo no.

Yakob ne ɔbɔfoɔ bi tentam

²² Na anadwo no ɔsɔree, na ɔfaa ne yerenom baanu ne ne mmaawa baanu no ne ne mma dubaako no de wɔn kɔtwaa Yabok asutwareeɛ.

²³ Na ɔde wɔn twaa asubɔnten no, na ɔmaa deɛ ɔwɔ nyinaa twaee.

²⁴ Na ɛkaa Yakob nko ara. Na ɔbarima bi ne no bɛtentamee kɔduruu adekyeeɛ.

²⁵ Na ɔbarima no hunuu sɛ ɔntumi no no, ɔkaa n’asene tokuro mu, na Yakob dwonku hwanee tentam a ɔne no tentameeɛ no mu.

²⁶ Na ɔbarima no kaa sɛ: Ma menkɔ, na adeɛ rekye. Na Yakob buaa sɛ: Meremma wonkɔ gye sɛ wohyira me.

²⁷ Na ɔbarima no bisaa no sɛ: Wo din de sɛn? Na ɔbuaa sɛ: Yakob.

²⁸ Na ɔkaa sɛ: Wɔremfrɛ wo din Yakob bio, na wɔbɛfrɛ no Israel, ɛfiri sɛ wo ne Onyankopɔn ne nnipa ako, na woatumi.

²⁹ Na Yakob bisaa no sɛ: Mesrɛ wo, kyerɛ me wo din. Na ɔse: Adɛn nti na worebisa me din? Na ɔbarima no hyiraa no wɔ hɔ.

³⁰ Na Yakob too ɛhɔ din Peni-el, ɛfiri sɛ ɔse: Me ne Onyankopɔn adi nhunuanimu, nso me kra anya nkwa.

³¹ Na ɔtwaa mu wɔ Peniel berɛ a na owia apue no, na ɔtɔ gu so ne dwonku a ahwan no nti.

³² Enti Israelfoɔ nni ntini a ɛwɔ asene mu akwaa tokuro mu no de bɛduru nnɛ, ɛfiri sɛ ɔkaa Yakob dwonkuo tokuro mu, n’asene mu ntini no so.