1 Mose 10 - New Revised Asante Twi Bible

Noa awoɔ ntoatoasoɔ

¹ Na yeinom ne Noa mma Sem, Ham ne Yafet awoɔ ntoatoasoɔ. Na nsuyire no akyi, wɔwoo mma.

² Yafet mma nie: Gomer, Magog, Madai, Yawan, Tubal, Mesek ne Tiras.

³ Na Gomer mma ne Askenas, Rifat ne Togarma.

⁴ Na Yawan mma ne Elisa, Tarsis, Kitim ne Dodanim.

⁵ Yeinom mu na nsuano amanaman no firi kɔpetee wɔn nsase soɔ, sɛdeɛ wɔn mu biara kasa ne wɔn mmusua teɛ, wɔn amanaman mu.

⁶ Na Ham mma ne Kus, Misraim, Put ne Kanaan.

⁷ Na Kus mma ne Seba, Hawila, Sabta, Raama ne Sabteka. Na Raama mma ne Saba ne Dedan.

⁸ Na Kus woo Nimrod. Ɔno na ɔdii kan yɛɛ ɔkatakyie wɔ asase soɔ.

⁹ Na ɔyɛ ɔbɔmmɔfoɔ wɔ AWURADE anim; enti na wɔka sɛ: Ɔbɔmmɔfoɔ kɛseɛ a ɔwɔ tumi AWURADE anim te sɛ Nimrod nie.

¹⁰ Na n’ahennie mfitiaseɛ ne Babel, Erek, Akad ne Kalne a ɛwɔ Sinear asase soɔ.

¹¹ Asase no so na ɔfiri kɔɔ Asiria kɔkyekyeree Ninewe ne Rehobot-ir ne Kala,

¹² ne Resen kuro kɛseɛ a ɛda Ninewe ne Kala ntam no.

¹³ Na Misraim woo Ludim, Anamim, Lehabim, Naftuhim,

¹⁴ Patrusim, Kasluhim (a Filistifoɔ firii wɔn mu), ne Kaftorim.

¹⁵ Kanaan woo n’abakan Sidon, ne Het,

¹⁶ Yebusifoɔ, Amorifoɔ, Girgasifoɔ,

¹⁷ Hiwifoɔ, Arkifoɔ, Sinifoɔ,

¹⁸ Arwadfoɔ, Semarifoɔ ne Hamatfoɔ. Ɛno akyi na Kanaanfoɔ mmusua peteeɛ.

¹⁹ Na Kanaanfoɔ hyeɛ firi Sidon kɔduru Gerar de kɔsi Gasa kɔduru Sodom, Gomora, Adma ne Seboim de kɔsi Lasa.

²⁰ Yeinom ne Ham mma, sɛdeɛ wɔn mmusua ne wɔn kasa, wɔn nsase ne wɔn amanaman teɛ.

²¹ Sem a ɔyɛ Yafet nua panin no mu na Eber mma nyinaa firie.

²² Sem mma ne Elam, Asur, Arfaksad, Lud ne Aram.

²³ Na Aram mma ne Us, Hul, Geter ne Mas.

²⁴ Na Arfaksad woo Sela, na Sela woo Eber.

²⁵ Na Eber woo mma baanu. Deɛ ɔdi kan no din de Peleg, ɛfiri sɛ ne nna mu na wɔkyekyɛɛ asase mu; na ne nua din de Yoktan.

²⁶ Na Yoktan woo Almodad, Selef, Hasarmawet, Yera,

²⁷ Hadoram, Usal, Dikla,

²⁸ Obal, Abimael, Saba,

²⁹ Ofir, Hawila ne Yobab. Yeinom nyinaa ne Yoktan mma.

³⁰ Na wɔn tenabea firi Mesa kɔduru Sefar, apueeɛ bepɔ so.

³¹ Yeinom ne Sem mma, sɛdeɛ wɔn mmusua ne wɔn kasa, wɔn nsase ne wɔn amanaman teɛ.

³² Yeinom ne Noa mma mmusua, sɛdeɛ wɔn awoɔ ntoatoasoɔ teɛ wɔ wɔn amanaman mu. Na ɛfiri yeinom mu na nsuyire no akyi amanaman petee asase soɔ.