1 Berɛsosɛm 15 - New Revised Asante Twi Bible

Wɔde apam adaka no ba Sion bepɔ so

¹ Na Dawid sisii adan maa ne ho wɔ Dawid kuro mu, na ɔsiesiee afa bi maa Nyankopɔn adaka no, na ɔsii ntomadan maa no.

² Afei Dawid kaa sɛ obiara nnsoa Nyankopɔn adaka no sɛ Lewifoɔ no ara nko, na wɔn na AWURADE ayi wɔn sɛ wɔnsoa Nyankopɔn adaka no, na wɔnsom no daa.

³ Na Dawid boaa Israel nyinaa ano bɛhyiaa Yerusalem sɛ wɔrekɔfa AWURADE adaka no de aba n’afa a wasiesie ama no no.

⁴ Na Dawid boaa Aaron mma ne Lewifoɔ no ano:

⁵ Kehat mma no mu: Ɔsafohene Uriel ne ne nuanom, ɔha aduonu.

⁶ Merari mma mu: Ɔsafohene Asaia ne ne nuanom, ahanu aduonu.

⁷ Gersom mma mu: Ɔsafohene Yoel ne ne nuanom, ɔha aduasa.

⁸ Elisafan mma mu: Ɔsafohene Semaia ne ne nuanom, ahanu.

⁹ Hebron mma mu: Ɔsafohene Eliel ne ne nuanom, aduɔwɔtwe.

¹⁰ Usiel mma mu: Ɔsafohene Aminadab ne ne nuanom, ɔha dummienu.

¹¹ Na Dawid frɛɛ Sadok ne Abiatar, asɔfoɔ no, ne Lewifoɔ no: Uriel, Asaia, Yoel, Semaia, Eliel ne Aminadab,

¹² na ɔka kyerɛɛ wɔn sɛ: Mone Lewifoɔ mu agyanom atitire, mo ne mo nuanom nnwira mo ho, na momfa AWURADE Israel Nyankopɔn adaka no mmra deɛ masiesie mama no hɔ.

¹³ Na akane no ɛnyɛ mo na moyɛeɛ nti na AWURADE yɛn Nyankopɔn bu baa yɛn soɔ, sɛ yɛanhwehwɛ no n’atorɔmuadeɛ no soɔ.

¹⁴ Ɛnna asɔfoɔ ne Lewifoɔ no dwiraa wɔn ho sɛ wɔrekɔfa AWURADE Israel Nyankopɔn adaka no aba.

¹⁵ Na Lewifoɔ mma no soaa Nyankopɔn adaka no, sɛdeɛ Mose hyɛeɛ, sɛdeɛ AWURADE asɛm no teɛ no. Wɔde ɛho mpoma no totoo wɔn kɔn ho.

¹⁶ Na Dawid ka kyerɛɛ Lewifoɔ asafohene no sɛ wɔnyiyi wɔn nuanom nnwontofoɔ no mma wɔnkurakura nnwontoɔ nnoɔma: Mmɛnta, mmɛn ne asankuten ne nsambɔ nnawuro nnyinagyina hɔ mma wɔnte wɔn nka na wɔmma wɔn nne so anigyeɛ mu.

¹⁷ Na Lewifoɔ no yii Yoel ba Heman ne ne nuanom mu Berekia ba Asaf ne wɔn nuanom Merari mma mu Kusaia ba Etan de wɔn gyinagyinaa hɔ.

¹⁸ Na wɔde wɔn nuanom a wɔtɔ so mmienu kaa wɔn ho: Sakaria, Ya-asiel, Semiramot, Yehiel, Uni, Eliab, Benaia, Ma-aseia, Matitia, Elifelehu, Mikneia ne Obed-edom ne Ye-iel, apono ano hwɛfoɔ no.

¹⁹ Na nnwontofoɔ Heman, Asaf ne Etan bɔɔ kɔbere mfrafraeɛ nnawuta maa wɔtee nka,

²⁰ na Sakaria, Asiel, Semiramot, Yehiel, Uni, Eliab, Maaseia ne Benaia bɔɔ mmɛnta mmabaa nne so.

²¹ Na Matitia ne Elifelehu ne Mikneia ne Obed-Edom ne Yeiel ne Asaia bɔ asankuten nne a ɛtɔ so nwɔtwe so.

²² Na Kenania, Lewifoɔ safohene wɔ nnwontoɔ no mu, ɔdi nnwontoɔ no so, ɛfiri sɛ na ɔte aseɛ.

²³ Na Berekia ne Elkana ne adaka no apono ano hwɛfoɔ.

²⁴ Na Sebania, Yosafat, Netanel, Amasai, Sakaria, Benaia, Eliesa, asɔfoɔ no, ne ntotorobɛntohyɛnfoɔ a wɔhyɛne ntotorobɛnto, Nyankopɔn adaka no anim. Na Obed-Edom ne Yehia ne adaka no apono ano ahwɛfoɔ.

Wɔde Adaka no kɔ Yerusalem

²⁵ Ɛnna Dawid ne Israel mpanimfoɔ ne mpem mpem so asafohene no sii mu kɔeɛ, sɛ wɔrekɔfa AWURADE apam adaka no afiri Obed-Edom fie aba, anigyeɛ mu.

²⁶ Na Onyankopɔn boaa Lewifoɔ a wɔso AWURADE apam adaka no no, wɔde anantwinini nson ne adwennini nson bɔɔ afɔdeɛ.

²⁷ Na Dawid hyɛ asaawa nwera batakari, ɔno ne Lewifoɔ a wɔso adaka no nyinaa ne nnwontofoɔ no, ne ɔsafohene Kenania a ɔdi nnwontoɔ no soɔ no wɔ nnwontofoɔ no mu. Na nwera asɔfotadeɛ nso hyɛ Dawid.

²⁸ Na Israel nyinaa de AWURADE apam adaka no bae, osebɔ ne mmɛnhyɛne ne ntotorobɛnto ne nsambɔ ne nnawuro mu, wɔde mmɛnta ne nsankutene maa wɔtee nka.

²⁹ Na ɛbaa sɛ, AWURADE apam adaka no duruu Dawid kurom no, Saulo babaa Mikal hwɛɛ mpomma mu, na ɔhunuu Ɔhene Dawid sɛ ɔrehurihuri na ɔregorɔ no, ɔbuu no animtia n’akoma mu.