Sealm 99 - Anglo-Saxon Psalms c.890-950 AD

Sealm 98

¹ Rixað Drihten, ­ ­ ­ ­ ­and he reðe folc healdeð on yrre ­ ­ ­ ­ ­ungemete swiðe; sitteð ofer cherubin, ­ ­ ­ ­ ­se þe sona mæg ana eorðware ­ ­ ­ ­ ­ealle onstyrian.

² Drihten is on Sion, ­ ­ ­ ­ ­dema se mæsta, heah and mære ­ ­ ­ ­ ­ofer eall hæleða folc.

³ We andetað þinum ­ ­ ­ ­ ­þam ecean naman, þæt he mid mannum is ­ ­ ­ ­ ­mycel and egeslic, halig on helpe ­ ­ ­ ­ ­hæleþa bearnum, aare cyninges dom ­ ­ ­ ­ ­æghwær lufade.

⁴ Þu gegearwadest ­ ­ ­ ­ ­geara ærest, þæt þu recene, god, ­ ­ ­ ­ ­rihte beeodest; þu on Iacobe ­ ­ ­ ­ ­gōde domas æt fruman worlde ­ ­ ­ ­ ­fægere settest.

⁵ Ahebbað haligne ­ ­ ­ ­ ­heofena Drihten, usserne god ­ ­ ­ ­ ­ellencræfte, and his fota sceamul ­ ­ ­ ­ ­forð weorþiað; for þon he halig is ­ ­ ­ ­ ­hæleða bearnum.

⁶ Moyses et Aaron ­ ­ ­ ­ ­mære gebroðor, soðe sacerdas, ­ ­ ­ ­ ­Samuhel ðridda, þa gōde his naman ­ ­ ­ ­ ­neode cigdan. Hi cymlice ­ ­ ­ ­ ­cigdon Drihten, and he hi gehyrde ­ ­ ­ ­ ­holde mode,

⁷ spræc him wordum to ­ ­ ­ ­ ­þurh wolcnes swyr.

⁸ Hi þa gewitnesse ­ ­ ­ ­ ­wel geheoldon and his bebodu ­ ­ ­ ­ ­beorhte efnedan, þa he him sealde ­ ­ ­ ­ ­and sylfa bebead. Þu gehyrdest hig, ­ ­ ­ ­ ­halig Drihten, and him, meahtig god, ­ ­ ­ ­ ­milde wurde, and heora æfþancan ­ ­ ­ ­ ­ealle gewræce.

⁹ Hebbað urne god, ­ ­ ­ ­ ­hælend Drihten, and hine on halgum ­ ­ ­ ­ ­her weorbiað mærum beorge; ­ ­ ­ ­ ­for ðon his meahte synt and halig is ­ ­ ­ ­ ­heofonrices weard.