Sealm 96 - Anglo-Saxon Psalms c.890-950 AD

PSALM 9 Sealm 95

¹ Singað nu Drihtne ­ ­ ­ ­ ­sangas neowe; singe þeos eorðe eall ­ ­ ­ ­ ­eceum Drihtne.

² Singað nu Drihtne, ­ ­ ­ ­ ­and his soðne naman bealde bletsiað; ­ ­ ­ ­ ­beornas sæcgeað fram dæge to dæge ­ ­ ­ ­ ­Drihtnes hælu.

³ Secgeað his wuldor ­ ­ ­ ­ ­geond sigeþeode, and on eallum folcum ­ ­ ­ ­ ­his fægere wundor.

⁴ He is se mycla god; ­ ­ ­ ­ ­for þon hine mæn sculon elne herian; ­ ­ ­ ­ ­he is egeslic god ofer ealle godu ­ ­ ­ ­ ­eorðbuendra.

⁵ Syndon ealle hæþenu godu ­ ­ ­ ­ ­hildedeoful; heofonas þænne worhte ­ ­ ­ ­ ­halig Drihten.

⁶ Ys on þinre gesihðe ­ ­ ­ ­ ­soð andetnes, fæger halignes ­ ­ ­ ­ ­fæste gebletsad and weorðlic wlite ­ ­ ­ ­ ­wuldres þines.

⁷ Bringað nu Drihtne ­ ­ ­ ­ ­bu ætsomne wlite and are, ­ ­ ­ ­ ­wuldor ðridde,

⁸ and þæt of hiora eðele don ­ ­ ­ ­ ­ealle þeode, þæt hi naman Drihtenes ­ ­ ­ ­ ­neode herigean. Genimað eow arlice lac ­ ­ ­ ­ ­and in gangað on his wictunas; ­ ­ ­ ­ ­weorðiað Drihten

⁹ on his þære halgan ­ ­ ­ ­ ­healle geneahhige. For his ansyne sceal ­ ­ ­ ­ ­eorðe beofian; secgað nu on cynnum ­ ­ ­ ­ ­and on cneorissum, þæt from treowe becwom ­ ­ ­ ­ ­tirfæst rice Drihten ure; ­ ­ ­ ­ ­dome he syþþan eorðan ymbhwyrft ­ ­ ­ ­ ­ealle gesette.

¹⁰ He ferhtlic riht ­ ­ ­ ­ ­folcum demeð and on his yrre ­ ­ ­ ­ ­ealle þeode.

¹¹ Heofenas blissiað, ­ ­ ­ ­ ­hrusan swylce gefeoð fæstlice, ­ ­ ­ ­ ­and floda þrym; sealte sæstreamas ­ ­ ­ ­ ­sælðe habbað.

¹² Habbað feldas eac ­ ­ ­ ­ ­fægere blisse and ealle þa þe on him ­ ­ ­ ­ ­eard weardiað; wærun wudubearuwas ­ ­ ­ ­ ­on wyndagum

¹³ for andwlitan ­ ­ ­ ­ ­ecean Drihtnes, for þon he cwom ­ ­ ­ ­ ­on cyneðrymme, þæt he þas eorðan ­ ­ ­ ­ ­ealle demde. Þonne he ymbhwyrft ­ ­ ­ ­ ­eorðan folca soðe and rihte ­ ­ ­ ­ ­syþþan demeð.