Sealm 94 - Anglo-Saxon Psalms c.890-950 AD

Sealm 93

¹ Þu eart wracena god ­ ­ ­ ­ ­and þu miht wrecan swylce, ana gefreogan ­ ­ ­ ­ ­æghwylcne mann.

² Ahefe þe on ellen, ­ ­ ­ ­ ­eorþan dema, gyld oferhydigum, ­ ­ ­ ­ ­swa hi ær grame worhton.

³ Hu lange fyrenwyrhtan ­ ­ ­ ­ ­foldan wealdað oþþe manwyrhtan ­ ­ ­ ­ ­morðre gylpað?

⁴ Hi oftust sprecað, ­ ­ ­ ­ ­unnyt sæcgeað and woh meldiað, ­ ­ ­ ­ ­wyrceað unriht.

⁵ Folc hi þin, Drihten, ­ ­ ­ ­ ­fæcne gehyndan, and yrfe þin ­ ­ ­ ­ ­eall forcoman.

⁶ Ælðeodige men, ­ ­ ­ ­ ­earme wydewan, steopcilda feala ­ ­ ­ ­ ­stundum acwealdon.

⁷ Sægdan and cwædan, ­ ­ ­ ­ ­þæt ne gesawe Drihten æfre, ­ ­ ­ ­ ­dyde swa he wolde, ne þæt Iacobes God ­ ­ ­ ­ ­ongitan cuðe.

⁸ Onfindað þæt and ongeotað ­ ­ ­ ­ ­þe on folce nu unwiseste ­ ­ ­ ­ ­ealra syndon; dysige hwæthwygu ­ ­ ­ ­ ­deope þæt oncnawan.

⁹ Se ðe ærest ealdum ­ ­ ­ ­ ­earan worhte, hu se oferhleoður ­ ­ ­ ­ ­æfre wurde? and him eagena gesyhð ­ ­ ­ ­ ­eallum sealde and he scearpe ne mæge ­ ­ ­ ­ ­gesceawian?

¹⁰ And se þe ege healdeð ­ ­ ­ ­ ­eallum þeodum, and his þrea ne si ­ ­ ­ ­ ­þær for awiht, se þe men læreð ­ ­ ­ ­ ­micelne wisdom?

¹¹ God ealle cann ­ ­ ­ ­ ­guman geðancas eorðbuendra, ­ ­ ­ ­ ­for ðon hi idle synt.

¹² Þæt bið eadig mann, ­ ­ ­ ­ ­þe þu hine, ece God, on þinre soðre æ ­ ­ ­ ­ ­sylfa getyhtest and hine þeodscipe ­ ­ ­ ­ ­ðinne lærest

¹³ and him yfele dagas ­ ­ ­ ­ ­ealle gebeorgest, oð þæt bið frecne seað ­ ­ ­ ­ ­þam fyrenfullan deop adolfen ­ ­ ­ ­ ­deorc and ðystre.

¹⁴ Næfre wiðdrifeð ­ ­ ­ ­ ­Drihten ure his agen folc, ­ ­ ­ ­ ­ne his yrfe þon ma on ealdre wile ­ ­ ­ ­ ­æfre forlætan.

¹⁵ Hwylc þonne gena ­ ­ ­ ­ ­gehwyrfed byð, þæt he on unriht ­ ­ ­ ­ ­eft ne cyrre; oððe hwylc nymeð me, ­ ­ ­ ­ ­þæt ic mān fleo and mid rihtheortum ­ ­ ­ ­ ­rædes þence?

¹⁶ Hwylc ariseð mid me, ­ ­ ­ ­ ­þæt ic riht fremme and wið awyrgedum ­ ­ ­ ­ ­winne and stande, þe unrihtes ­ ­ ­ ­ ­ealle wyrceað?

¹⁷ Nymðe me Drihten, ­ ­ ­ ­ ­dema usser, gefultumede ­ ­ ­ ­ ­fægere æt þearfe, wenincga min sawl ­ ­ ­ ­ ­sohte helle.

¹⁸ Gif ic þæs sægde, ­ ­ ­ ­ ­þæt min sylfes fot ful sarlice ­ ­ ­ ­ ­asliden wære, þa me mildheortnes ­ ­ ­ ­ ­mihtigan Drihtnes gefultumede, ­ ­ ­ ­ ­þæt ic feorh ahte.

¹⁹ Æfter þære menigeo ­ ­ ­ ­ ­minra sara þe me ær on ferhðe ­ ­ ­ ­ ­fæste gestodan, þa me þine frofre ­ ­ ­ ­ ­fægere, Drihten, gesibbedan ­ ­ ­ ­ ­sawle mine.

²⁰ Ne ætfyligeð þe ahwær ­ ­ ­ ­ ­facen ne unriht; ðu gefæstnast ­ ­ ­ ­ ­facen sares;

²¹ hi soðfæste ­ ­ ­ ­ ­sneome gehæftað and heora sawle ­ ­ ­ ­ ­ofslean þenceað, blod soðfæstra ­ ­ ­ ­ ­bitere ageotan.

²² For ðon me is geworden ­ ­ ­ ­ ­wealdend Drihten to friðstole ­ ­ ­ ­ ­fæst and gestaðelad; is me fultum his ­ ­ ­ ­ ­fæst on Drihtne.

²³ Þonne him gyldeð ­ ­ ­ ­ ­god ælmihtig ealle þa unriht ­ ­ ­ ­ ­ðe hi geearnedan, and on heora facne ­ ­ ­ ­ ­fæste todrifeð Drihten eallmihtig, ­ ­ ­ ­ ­dema soðfæst.