Sealm 92 - Anglo-Saxon Psalms c.890-950 AD

Sealm 91

¹ Gōd is þæt man Drihtne ­ ­ ­ ­ ­geara andette and neodlice ­ ­ ­ ­ ­his naman asinge, þone heahestan ­ ­ ­ ­ ­hæleða cynnes;

² And þonne on morgene ­ ­ ­ ­ ­mægene sæcge, hu he milde wearð ­ ­ ­ ­ ­manna cynne, and his soðe ­ ­ ­ ­ ­sæcge nihtes.

³ Hwæt, ic on tyn strengum ­ ­ ­ ­ ­getogen hæfde, hu ic þe on psalterio ­ ­ ­ ­ ­singan mihte oððe þe mid hearpan ­ ­ ­ ­ ­hlyste cweman,

⁴ forðon þu me on þinum weorcum ­ ­ ­ ­ ­wisum lufadest; hihte ic to þinra handa ­ ­ ­ ­ ­halgum dædum.

⁵ Hu micle synt þine mægenweorc, ­ ­ ­ ­ ­mihtig Drihten; wærun þine geðancas ­ ­ ­ ­ ­þearle deope.

⁶ Wonhydig wer ­ ­ ­ ­ ­þæs wiht ne cann, ne þæs andgit hafað ­ ­ ­ ­ ­ænig dysigra.

⁷ Þonne forð cumað ­ ­ ­ ­ ­fyrenfulra ðreat, heap synnigra ­ ­ ­ ­ ­hige onlic; ealle þær ætywað, ­ ­ ­ ­ ­þa ðe unrihtes on weoruldlife ­ ­ ­ ­ ­worhtan geornast, þæt hi forwordene ­ ­ ­ ­ ­weorðen syþþan on worulda woruld ­ ­ ­ ­ ­and to widan feore.

⁸ Þu on ecnesse ­ ­ ­ ­ ­awa, Drihten, heahesta bist, ­ ­ ­ ­ ­heofonrices weard.

⁹ Þi nu ðine feond ­ ­ ­ ­ ­fæcne, Drihten, on eorðwege ­ ­ ­ ­ ­ealle forweorþað, and weorðað towrecene ­ ­ ­ ­ ­wide ealle, þa þe unrihtes ­ ­ ­ ­ ­æror worhtan.

¹⁰ Þonne anhorna ­ ­ ­ ­ ­ealra gelicost, min horn weorðeð ­ ­ ­ ­ ­ahafen swiðe and mine yldo beoð ­ ­ ­ ­ ­æghwær genihtsum.

¹¹ And eage þin ­ ­ ­ ­ ­eac sceawode, hwær fynd mine ­ ­ ­ ­ ­fæcne wæran, and mine wergend ­ ­ ­ ­ ­wraðe gehyrde efne þin agen ­ ­ ­ ­ ­eare swylce.

¹² Se soðfæsta ­ ­ ­ ­ ­samed anlicast beorht on blædum ­ ­ ­ ­ ­bloweð swa palma, and swa Libanes beorh ­ ­ ­ ­ ­lideð and groweð.

¹³ Settað nu georne ­ ­ ­ ­ ­on Godes huse, þæt ge on his wicum ­ ­ ­ ­ ­wel geblowan.

¹⁴ Nu gyt syndan manige ­ ­ ­ ­ ­manna swylce, þe hiom yldo gebidan ­ ­ ­ ­ ­ær to genihte, and þa mid geþylde ­ ­ ­ ­ ­þenden sægdan,

¹⁵ Cwædon, þæt wære soðfæst ­ ­ ­ ­ ­sylfa Drihten and hine unrihtes ­ ­ ­ ­ ­awyht ne heolde.