Sealm 91 - Anglo-Saxon Psalms c.890-950 AD

Sealm 90

¹ Me eardað æt ­ ­ ­ ­ ­æþele fultum þæs hehstan ­ ­ ­ ­ ­heofonrices weard, þe me æt wunað ­ ­ ­ ­ ­awa to feore.

² Ic to Drihtne cwæð: ­ ­ ­ ­ ­“Þu me dyre eart fæle fultum; ­ ­ ­ ­ ­hæbbe ic freond on him, min se gōda God, ­ ­ ­ ­ ­and ic on ðe geare hycge.”

³ Forðon he me alysde ­ ­ ­ ­ ­of laðum grine, huntum unholdum, ­ ­ ­ ­ ­hearmum worde.

⁴ He me mid his gesculdrum ­ ­ ­ ­ ­sceade beþeahte; for þon ic under fiðrum ­ ­ ­ ­ ­fæle hihte.

⁵ Hwæt, me soðfæstnes min ­ ­ ­ ­ ­scylde wið feondum, ne ðu þe nihtegsan ­ ­ ­ ­ ­nede ondrædest.

⁶ Ne forhtast þu ðe on dæge ­ ­ ­ ­ ­flan on lyfte, þæt þe þurhgangan ­ ­ ­ ­ ­garas on ðeostrum, oððe on midne dæg ­ ­ ­ ­ ­mære deoful.

⁷ Fealleð þe on þa wynstran ­ ­ ­ ­ ­wergra þusend, and eac geteledra ­ ­ ­ ­ ­tyn þusendo on þine þa swiðran, ­ ­ ­ ­ ­and þe ne sceaðeð ænig.

⁸ Hwæðere þu ðæs eagan ­ ­ ­ ­ ­eall sceawadest, gesege fyrenfulra ­ ­ ­ ­ ­frecne wite.

⁹ Þu me eart se hehsta hyht, ­ ­ ­ ­ ­halig Drihten; þu me friðstol on ðe ­ ­ ­ ­ ­fæstne settest.

¹⁰ Ne mæg þe ænig yfel ­ ­ ­ ­ ­egle weorðan, ne heard sweopu ­ ­ ­ ­ ­huse þinum on neaweste ­ ­ ­ ­ ­nahwær sceþþan.

¹¹ For þon he his englum bebead, ­ ­ ­ ­ ­þæt hi mid earmum þe on heora handum ­ ­ ­ ­ ­heoldan georne, þæt þu wilwega ­ ­ ­ ­ ­wealdan mostest.

¹² And þe on folmum ­ ­ ­ ­ ­feredan swylce, þe læs þu fræcne on stan ­ ­ ­ ­ ­fote spurne.

¹³ Þu ofer aspide miht ­ ­ ­ ­ ­eaðe gangan, and bealde nu ­ ­ ­ ­ ­basiliscan tredan, and leon and dracan ­ ­ ­ ­ ­liste gebygean.

¹⁴ For ðon he hyhte to me, ­ ­ ­ ­ ­ic hine hraðe lyse, niode hine scylde, ­ ­ ­ ­ ­nu he cuðe naman minne.

¹⁵ He cigde me, ­ ­ ­ ­ ­and ic hine cuðlice hold gehyrde, ­ ­ ­ ­ ­and hine hraðe syþþan of earfoþum ­ ­ ­ ­ ­ut alysde.

¹⁶ Ic hine generige ­ ­ ­ ­ ­and his naman swylce gewuldrige ­ ­ ­ ­ ­geond ealle werðeoda, and him lifdagas ­ ­ ­ ­ ­lange sylle, swylce him mine hælu ­ ­ ­ ­ ­holde ætywe.