Sealm 90 - Anglo-Saxon Psalms c.890-950 AD

Sealm 89

¹ Þu eart friðstol us ­ ­ ­ ­ ­fæste, Drihten, of cynne on cynne ­ ­ ­ ­ ­and on cneorisse.

² Ær ðon munta gesceaft ­ ­ ­ ­ ­ofer middangeard oððe ymbhwyrft ­ ­ ­ ­ ­eorðan wære oþþe world wære, ­ ­ ­ ­ ­þu eart, wuldres god.

³ Ne ahwyrf þu fram mænn ­ ­ ­ ­ ­heah eadmedu; and þu cuðlice ­ ­ ­ ­ ­cwæde sylfa: “Ic manna bearnum ­ ­ ­ ­ ­mod onwende.”

⁴ For þinum eagum, ­ ­ ­ ­ ­ece Drihten, þusend wintra bið ­ ­ ­ ­ ­þon anlicast, swa geostran dæg ­ ­ ­ ­ ­gegan wære; And swa hi on niht hyrdnesse ­ ­ ­ ­ ­neode begangað,

⁵ ne heora winterrim ­ ­ ­ ­ ­for wiht ne doð.

⁶ Morgen gewiteð ­ ­ ­ ­ ­swa gemolsnad wyrt; oðre morgene ­ ­ ­ ­ ­eft gebloweð and geefneð swa, ­ ­ ­ ­ ­oþ þæt æfen cymeð, þonne forwisnað, ­ ­ ­ ­ ­weorðeð to duste.

⁷ For þon we on þinum yrre ­ ­ ­ ­ ­ealle forwurdon, wæron on þinum hathige ­ ­ ­ ­ ­hearde gedrefde.

⁸ Þu ure unriht ­ ­ ­ ­ ­eall asettest, þær þu sylfa ­ ­ ­ ­ ­to eagum locadest, and ure worulde þu ­ ­ ­ ­ ­eac gestaðelodest on alihtincge ­ ­ ­ ­ ­andwlitan þines.

⁹ For þam ðe ure dagas ­ ­ ­ ­ ­ealle geteorudun, and we on þinum yrre synt ­ ­ ­ ­ ­swiðe gewæhte.

¹⁰ Wæran anlicast ­ ­ ­ ­ ­ure winter geongewifran, ­ ­ ­ ­ ­þonne hio geornast bið, þæt heo afære ­ ­ ­ ­ ­fleogan on nette; beoð ure geardagas ­ ­ ­ ­ ­gnornscendende, þeah þe heora hundred seo ­ ­ ­ ­ ­samod ætgædere. Gif on mihtigum ­ ­ ­ ­ ­mannum geweorðeð, þæt hi hundehtatig ­ ­ ­ ­ ­ylda gebiden, ealle þe þær ofer beoð ­ ­ ­ ­ ­æfre getealde wintra on worulde, ­ ­ ­ ­ ­þa beoð gewinn and sar. Us manðwærnes becwom ­ ­ ­ ­ ­micel ofer ealle and we on þam gefean ­ ­ ­ ­ ­forhte gewurdan.

¹¹ Hwa ðæs soð me cann ­ ­ ­ ­ ­sæcgean ænig, hu þines yrres ­ ­ ­ ­ ­egsa standeð and seo micle miht? ­ ­ ­ ­ ­

¹² nis þæt mann ænig þe þa ariman ­ ­ ­ ­ ­rihte cunne. Do us þa þine swiðran hand, ­ ­ ­ ­ ­Drihten, cuðe, þam þe on snytrum syn ­ ­ ­ ­ ­swyðe getyde, and þa heora heortan ­ ­ ­ ­ ­healdað clæne.

¹³ Gehweorf us hwæt hwiga, ­ ­ ­ ­ ­halig Drihten; wes þinum scealcum ­ ­ ­ ­ ­wel eaðbede.

¹⁴ We synd gefyllede ­ ­ ­ ­ ­fægere on mergenne þinre mildheortnesse; ­ ­ ­ ­ ­þæs we on mode nu habbað ealle dagas ­ ­ ­ ­ ­æþele blisse.

¹⁵ We gefeoð swylce ­ ­ ­ ­ ­for þon fægerum dagum, on þam þu us to eadmedum ­ ­ ­ ­ ­ealle gebrohtest, and for ðam gearum þe we on gesawon ­ ­ ­ ­ ­yfela feala.

¹⁶ Beseoh on þine scealcas ­ ­ ­ ­ ­swæsum eagum and on þin agen weorc, ­ ­ ­ ­ ­ece Drihten, and heora bearn gerece ­ ­ ­ ­ ­bliðe mode.

¹⁷ Wese us beorhtnes ofer ­ ­ ­ ­ ­bliðan Drihtnes, ures þæs gōdan Godes ­ ­ ­ ­ ­georne ofer ealle; gerece ure handgeweorc ­ ­ ­ ­ ­heah ofer usic.