Sealm 9 - Anglo-Saxon Psalms c.890-950 AD

Sealm IX [9:1-19]

¹ Ic andete Drihtne on ealre minre heortan. And ic bodige ealle ðine wundra,

² and ic blissige and fægnige and herige þinne naman, ðu hea God,

³ for ðam þu gehwyrfdest mine fynd underbæc, and hi wæron geuntrumode and forwurdon beforan ðinre ansyne;

⁴ for ðam þu demst minne dom and mine spræce, and eall for me dydest þæt ic don sceolde. Ðu sitst on ðam hean setle, þu ðe symle demst swiðe rihte.

⁵ Ðu ðreast and bregst þa ðeoda þe us ðreatigað, and ða unrihtwisan forweorðað; and ðu adilgas heora naman on woruld a woruld.

⁶ Seo redelse and þæt geþeaht urra feonda geteorode, ða hi hit endian sceoldan, and heora byrig þu towurpe ealla. And heora gemynd onweg gewat mid þam myclan hlisan,

⁷ and Drihten þurhwunað on ecnesse. And he gearwað his domsetl,

⁸ and he demð ealre eorþan swyðe emne. He demð folcum mid rihte;

⁹ he ys geworden friðstow ðearfendra. And gefultumend þu eart, Drihten, æt ælcere ðearfe.

¹⁰ For ðy hopiað to þe ealle þa ðe witan þinne naman, for ðam þu ne forlætst nanne þara þe ðe secð.

¹¹ Heriað for ði Drihten, þone ðe eardað on Sion, and bodiað betweoh folcum his wundru,

¹² for ðam he nis na ofergeotol þara gebeda his þearfena, ac he is swyþe gemyndig heora blod to wrecanne.

¹³ Gemiltsa me, Drihten, and geseoh mine eaðmetto (hu earmne me habbað gedon mine fynd), for ðam þu eart se ylca God þe me uppahofe fram deaðes gatum,

¹⁴ to þam þæt ic bodade eall þin lof on ðam geatum þære burge Hierusalem. Ic fægnie on þinre hælo ðe þu me sylest;

¹⁵ and ða ðeoda þe min ehtað syn afæstnode on ðam ylcan earfoðum þe hi me geteohhod hæfdon; and heora fet synt gefangene mid þy ilcan gryne þe hi me gehyd and gehealden hæfdon.

¹⁶ For þam byð Drihten cuð on his rihtum domum, and on his handgeweorce byð gefangen se synfulla;

¹⁷ and þa unrihtwisan beoð gehwyrfede to helle and ælc folc þæra ðe God forgyt;

¹⁸ for þam God ne forgyt his ðearfan oð heora ende, ne heora geþyld ne forweorð oþ ende.

¹⁹ Aris, Drihten, þy læs se yfelwillenda mæge don þæt he wille, and gedo þæt eallum folcum sy gedemed beforan ðe.

²⁰ Gesete, Drihten, ofer hy sumne anwald þæt hig gelære þæt hy witon þæt hi men synt.