Sealm 88 - Anglo-Saxon Psalms c.890-950 AD

Sealm 87

¹ Þu eart me, Drihten God, ­ ­ ­ ­ ­dyre hælend; ic on dæge to ðe ­ ­ ­ ­ ­dygle cleopode, and on niht fore þe ­ ­ ­ ­ ­neode swylce.

² Gange min ingebed ­ ­ ­ ­ ­on þin gleawe gesihð; ahyld eare þin ­ ­ ­ ­ ­and gehyr min gebed.

³ Forðon is sawl min ­ ­ ­ ­ ­sares and yfeles fæste gefylled; ­ ­ ­ ­ ­is min feorh swylce to helldore ­ ­ ­ ­ ­hylded geneahhe.

⁴ Wenað þæs sume, ­ ­ ­ ­ ­þæt ic on wraðne seað mid fyrenwyrhtum ­ ­ ­ ­ ­feallan sceolde; ic eom men gelic ­ ­ ­ ­ ­mære geworden, þe mid deadum bið ­ ­ ­ ­ ­betweox deaðe freo.

⁵ Swa gewundade ­ ­ ­ ­ ­wraðe slæpe syn þonne geworpene ­ ­ ­ ­ ­on widne hlæw, þær hiora gymynde ­ ­ ­ ­ ­men ne wænan, swa hi syn fram þinre handa ­ ­ ­ ­ ­heane adrifene.

⁶ Hi me asetton ­ ­ ­ ­ ­on seað hinder, þær wæs deorc þeostru ­ ­ ­ ­ ­and deaþes scua.

⁷ Þær me wæs yrre þin ­ ­ ­ ­ ­on acyþed, and þu me oferhige on ­ ­ ­ ­ ­ealle gelæddest.

⁸ Feor ðu me dydest ­ ­ ­ ­ ­freondas cuþe; settan me symble, ­ ­ ­ ­ ­þær me unswæsost wæs; eam ic swære geseald, ­ ­ ­ ­ ­þær ic ut swican ne mæg.

⁹ Eagan me syndon ­ ­ ­ ­ ­unhale nu geworden for wædle; ­ ­ ­ ­ ­ic me to wuldres gode þuruh ealne dæg ­ ­ ­ ­ ­elne clypige and mine handa to þe ­ ­ ­ ­ ­hebbe and ðenige.

¹⁰ Ne huru wundur ­ ­ ­ ­ ­wyrceað deade, oþþe hi listum ­ ­ ­ ­ ­læceas weccean and hi andettan þe ­ ­ ­ ­ ­ealle syþþan.

^11-12 Ne on ðeostrum ne mæg ­ ­ ­ ­ ­þances gehygdum ænig wislicu ­ ­ ­ ­ ­wundur oncnawan, oððe þin soðfæstnes ­ ­ ­ ­ ­si on þam lande þe ofergytnes ­ ­ ­ ­ ­on eardige. Cwist þu, oncnawað hi ­ ­ ­ ­ ­wundru ðine on ðam dimmum ­ ­ ­ ­ ­deorcan ðystrum, oððe ðine rihtwisnesse ­ ­ ­ ­ ­recene gemeteð on ofergyttolnesse ­ ­ ­ ­ ­manna ænig?

¹³ Ic me to ðe, ­ ­ ­ ­ ­ece Drihten, mid modgehygde ­ ­ ­ ­ ­mægene clypade, and min gebed ­ ­ ­ ­ ­morgena gehwylce fore sylfne þe ­ ­ ­ ­ ­soðfæst becume.

¹⁴ Forhwan ðu min gebed ­ ­ ­ ­ ­æfre woldest, soð god, wiðsacan, ­ ­ ­ ­ ­oððe þinre gesihðe me on þissum ealdre ­ ­ ­ ­ ­æfre wyrnan?

¹⁵ Wædla ic eom on gewinne, ­ ­ ­ ­ ­worhte swa on geoguðe; ahafen ic wæs and gehyned, ­ ­ ­ ­ ­hwæðere næs gescended.

¹⁶ Oft me þines yrres ­ ­ ­ ­ ­egsa geðeowde, and me broga þin ­ ­ ­ ­ ­bitere gedrefde.

¹⁷ Hi me ealne dæg ­ ­ ­ ­ ­utan ymbsealdan, swa wæterflodas ­ ­ ­ ­ ­wæron ætsomne.

¹⁸ Þu me afyrdest ­ ­ ­ ­ ­frynd þa nehstan and mine cuðe eac ­ ­ ­ ­ ­cwicu geyrmdest.