Sealm 86 - Anglo-Saxon Psalms c.890-950 AD

Sealm 85

¹ Ahyld me þin eare, ­ ­ ­ ­ ­halig Drihten; forðon ic eom wædla, ­ ­ ­ ­ ­þu me wel gehyr, and ic sylfa eom ­ ­ ­ ­ ­sorhfull þearfa.

² Geheald mine sawle, ­ ­ ­ ­ ­forðon ic halig eom; hæl þinne scealc, ­ ­ ­ ­ ­for þon ic ðe hihte to.

³ Miltsa me Drihten, ­ ­ ­ ­ ­þonne ic mægene to ðe þurh ealne dæg ­ ­ ­ ­ ­elne cleopade;

⁴ do þines scealces ­ ­ ­ ­ ­sawle bliðe, forðon ic hi to ðe ­ ­ ­ ­ ­hebbe genehhige.

⁵ Forðon þu eart wynsum, ­ ­ ­ ­ ­wealdend Drihten; is þin milde mod ­ ­ ­ ­ ­mycel and genihtsum eallum þam þe þe ­ ­ ­ ­ ­elne cigeað.

⁶ Þu mid earum onfoh, ­ ­ ­ ­ ­ece Drihten, min agen gebed, ­ ­ ­ ­ ­and eac beheald, hu ic stefne to ðe ­ ­ ­ ­ ­stundum cleopige.

⁷ Þonne me on dæge ­ ­ ­ ­ ­deorc earfoðe carelice cnyssedan, ­ ­ ­ ­ ­þonne ic cleopode to ðe; for þon þu me gehyrdest ­ ­ ­ ­ ­holde mode.

⁸ Nis þe goda ænig ­ ­ ­ ­ ­on gumrice ahwær efne gelic, ­ ­ ­ ­ ­ece Drihten, ne ðe weorc magon ­ ­ ­ ­ ­wyrcean anlic.

⁹ Ealle þu geworhtest ­ ­ ­ ­ ­wera cneorissa, þa þe weorðiað, ­ ­ ­ ­ ­wuldres aldor, and naman Drihtnes ­ ­ ­ ­ ­neode cigeað.

¹⁰ For ðan ðu eart se mycla ­ ­ ­ ­ ­mihtiga Drihten, þe wundor miht ­ ­ ­ ­ ­wyrcean ana.

¹¹ Gelæd, Drihten, me ­ ­ ­ ­ ­on þinne leofne weg, and ic on þinum soðe ­ ­ ­ ­ ­syþþan gancge. Heorte min ahlyhheð, ­ ­ ­ ­ ­þonne ic ðinne halgan naman forhtige me on ferhðe, ­ ­ ­ ­ ­

¹² forð andette mid ealre heortan hyge, ­ ­ ­ ­ ­þæt þu eart, halig God, nemned Drihten, ­ ­ ­ ­ ­and we naman þinne on ecnesse ­ ­ ­ ­ ­a weorðien.

¹³ Ys þin mildheortnes mycel ­ ­ ­ ­ ­ofer me, Drihten, and þu mine sawle ­ ­ ­ ­ ­swylce alysdest of helwarena ­ ­ ­ ­ ­hinderþeostrum.

¹⁴ God min se leofa, ­ ­ ­ ­ ­gramhydige me mid unrihte ­ ­ ­ ­ ­oft onginnað, and gesamnincge ­ ­ ­ ­ ­swiðmihtigra sohton mine sawle ­ ­ ­ ­ ­swyþe geneahhe; ne doð him for awiht ­ ­ ­ ­ ­egsan Drihtnes.

¹⁵ Hwæt, þu eart, min Drihten God, ­ ­ ­ ­ ­dædum mildheort, þenden geðyldig, ­ ­ ­ ­ ­þearle soðfæst.

¹⁶ Beseoh nu on me, ­ ­ ­ ­ ­and me syþþan weorð milde on mode, ­ ­ ­ ­ ­mihtig Drihten; geteoh hrore meaht ­ ­ ­ ­ ­hysse þinum; do þinre þeowan sunu, ­ ­ ­ ­ ­Drihten, halne.

¹⁷ Do gedefe mid me, ­ ­ ­ ­ ­Drihten, tacen, and þæt gōd ongitan, ­ ­ ­ ­ ­þa me georne ær fæste feodan, ­ ­ ­ ­ ­habban forð sceame. For þon þu me wære fultum ­ ­ ­ ­ ­fæste, Drihten, and me frefredest, ­ ­ ­ ­ ­frea ælmihtig.