Sealm 85 - Anglo-Saxon Psalms c.890-950 AD

Sealm 84

¹ Ðu bletsadest, ­ ­ ­ ­ ­bliðe Drihten, foldan fæle, ­ ­ ­ ­ ­and afyrdest eac of Iacobe ­ ­ ­ ­ ­þa graman hæftned.

² Unriht þu forlete ­ ­ ­ ­ ­eallum þinum folce, and heora fyrene ­ ­ ­ ­ ­fæste hæle.

³ Eall þu þin yrre ­ ­ ­ ­ ­eðre gedydest, na ðu ure gyltas ­ ­ ­ ­ ­egsan gewræce.

⁴ Gehweorf us hraðe, ­ ­ ­ ­ ­hælend Drihten, and þin yrre fram us ­ ­ ­ ­ ­eac oncyrre,

⁵ þæt ðu us ne weorðe ­ ­ ­ ­ ­wrað on mode. Ne wrec þu þin yrre ­ ­ ­ ­ ­wraðe mode of cynne on cynn ­ ­ ­ ­ ­and on cneorisse;

⁶ gecyr us georne to ðe, ­ ­ ­ ­ ­Crist ælmihtig, and ðin folc on ðe ­ ­ ­ ­ ­gefeo swiðe.

⁷ Æteow us milde mod, ­ ­ ­ ­ ­mihtig Drihten, and us þine hæle syle ­ ­ ­ ­ ­her to genihte.

⁸ Syþþan ic gehyre, ­ ­ ­ ­ ­hwæt me halig God on minum modsefan ­ ­ ­ ­ ­mælan wille; sybbe he his folces ­ ­ ­ ­ ­seceð geornast, and swiðust to þam ­ ­ ­ ­ ­þe hine seceað.

⁹ Hwæðere he is mid soðe ­ ­ ­ ­ ­forswiðe neah þam þe egsan his ­ ­ ­ ­ ­elne healdað, hæleð mid hyldo, ­ ­ ­ ­ ­and him her syleð ure eorðan ­ ­ ­ ­ ­æðele wuldor.

¹⁰ Him gangað ongean ­ ­ ­ ­ ­gleawe cræftas, mildheortnesse mod ­ ­ ­ ­ ­and mihte soð, and hine sybbe lufu ­ ­ ­ ­ ­swylce clyppeð.

¹¹ Up of eorðan cwom ­ ­ ­ ­ ­æþelast soða, beseah soðfæstnes ­ ­ ­ ­ ­samod of heofenum.

¹² Syleð us fremsum gōd ­ ­ ­ ­ ­fægere Drihten, þonne us eorðe syleð ­ ­ ­ ­ ­æðele wæstmas.

¹³ Hine soðfæstnes ­ ­ ­ ­ ­symble foregangeð and on weg setteð ­ ­ ­ ­ ­wise gangas.