Sealm 84 - Anglo-Saxon Psalms c.890-950 AD

Sealm 83

¹ Synd me wic þine ­ ­ ­ ­ ­weorðe and leofe, mægena Drihten; ­ ­ ­ ­ ­

² a ic on mode þæs willum hæfde, ­ ­ ­ ­ ­þet ic him wunude onn. Heorte min and flæsc ­ ­ ­ ­ ­hyhtað georne on þone lifigendan ­ ­ ­ ­ ­leofan Drihten;

³ him eac spedlice ­ ­ ­ ­ ­spearuwa hus begyteð, and tidlice ­ ­ ­ ­ ­turtle nistlað, þær hio afedeð ­ ­ ­ ­ ­fugelas geonge. Wærun wigbedu þin, ­ ­ ­ ­ ­weoruda Drihten; þu eart Drihten min ­ ­ ­ ­ ­and deore cynincg.

⁴ Eadige weorðað, ­ ­ ­ ­ ­þa þe eardiað on þinum husum, ­ ­ ­ ­ ­halig Drihten, and þe on worulda woruld, ­ ­ ­ ­ ­wealdend, heriað.

⁵ Þæt byð eadig wer, ­ ­ ­ ­ ­se þe him oðerne fultum ne seceð ­ ­ ­ ­ ­nymþe fælne God, and þæt on heortan hige ­ ­ ­ ­ ­healdeð fæste,

⁶ geseteð him þæt sylfe ­ ­ ­ ­ ­on ðisse sargan dene, þær hi teara ­ ­ ­ ­ ­teonan cnyssað on þam sylfan stede ­ ­ ­ ­ ­þe þu him settest her.

⁷ Brohte him bletsunge ­ ­ ­ ­ ­se ðe him beorhte æ soðe sette; ­ ­ ­ ­ ­syþþan eodan of mægene on mægen; ­ ­ ­ ­ ­þær wæs miht gesawen on Sionbeorge ­ ­ ­ ­ ­soðes Drihtnes.

⁸ Gehyr min gebed, ­ ­ ­ ­ ­halig Drihten, þu eart mære God, ­ ­ ­ ­ ­mildum earum, and Iacobes ­ ­ ­ ­ ­God se mæra.

⁹ Beseoh Drihten nu, ­ ­ ­ ­ ­scyldend usser; oncnaw onsyne ­ ­ ­ ­ ­cristes þines.

¹⁰ Betere is micle ­ ­ ­ ­ ­to gebidanne anne dæg mid þe ­ ­ ­ ­ ­þonne oðera on þeodstefnum ­ ­ ­ ­ ­þusend mæla. Ic me þæs wyrce ­ ­ ­ ­ ­and wel ceose, þæt ic hean gange ­ ­ ­ ­ ­on hus Godes, þonne ic on fyrenfulra ­ ­ ­ ­ ­folce eardige.

¹¹ For þon God lufað ­ ­ ­ ­ ­geornast ealles, þæt man si mildheort ­ ­ ­ ­ ­mode soðfæst, þonne him God gyfeð ­ ­ ­ ­ ­gyfe and wuldur. Nele God æfre ­ ­ ­ ­ ­gōde bedælan, þa ðe heortan gehygd ­ ­ ­ ­ ­healdað clæne;

¹² þæt bið eadig mann, ­ ­ ­ ­ ­se þe him ecean Godes to mundbyrde ­ ­ ­ ­ ­miht gestreoneð.