Sealm 81 - Anglo-Saxon Psalms c.890-950 AD

Sealm 80

^1-7 [Missing from manuscript]

⁸ ... gif þu, Israhel, a wylt ­ ­ ­ ­ ­elne gehyran.

⁹ Gif þu, Israhel, ­ ­ ­ ­ ­me anum gehyrst, ne byð god on þe ­ ­ ­ ­ ­niwe gemeted, ne þu fremedne god ­ ­ ­ ­ ­sylfa gebiddest.

¹⁰ Ic eom þin god, ­ ­ ­ ­ ­ðe geara þe of Ægypta ­ ­ ­ ­ ­eorþan alædde. Ontyn þinne muð ­ ­ ­ ­ ­and ic hine teala fylle;

¹¹ nele min folc mine stefne ­ ­ ­ ­ ­æfre gehyran, ne me Israhel behealdan ­ ­ ­ ­ ­holde mode.

¹² Ac hi lifian het ­ ­ ­ ­ ­lustum heortena swa him leofust wæs, ­ ­ ­ ­ ­leode þeodum, æfter hiora willum ­ ­ ­ ­ ­wynnum miclum.

¹³ Þær min agen folc, ­ ­ ­ ­ ­Israhela cynn, me mid gehygde ­ ­ ­ ­ ­hyran cuðan, oþþe on wegas mine ­ ­ ­ ­ ­woldan gangan,

¹⁴ þonne ic hiora fynd ­ ­ ­ ­ ­fylde and hynde, and þæt mycle mægen ­ ­ ­ ­ ­minra handa heora ehtendas ­ ­ ­ ­ ­ealle fornam.

¹⁵ Him fynd godes ­ ­ ­ ­ ­fæcne leogað; byð hiora yfele tid ­ ­ ­ ­ ­awa to feore.

¹⁶ He hi fedde ­ ­ ­ ­ ­mid fætre lynde, hwæte and hunige, ­ ­ ­ ­ ­þæt him halig God sealde of stane, ­ ­ ­ ­ ­oþþæt hi sæde wæron.