Sealm 80 - Anglo-Saxon Psalms c.890-950 AD

Sealm 79

¹ Þu þe Israela ­ ­ ­ ­ ­æðelum cynne reccest and rædest, ­ ­ ­ ­ ­ðu nu recene beheald, þu ðe Ioseph swa sceap ­ ­ ­ ­ ­gramum wiðlæddest. Ðu ðe sylfa nu ­ ­ ­ ­ ­sittest ofer cherubin, æteow

² fore Effraim ­ ­ ­ ­ ­eac Mannasse and Beniamin, ­ ­ ­ ­ ­nu we biddað þe. Awece þine mihte ­ ­ ­ ­ ­and mid wuldre cum, and us hale do ­ ­ ­ ­ ­her on eorðan.

³ Gehweorf us, mægena god, ­ ­ ­ ­ ­and us mildne æteow þinne andwlitan; ­ ­ ­ ­ ­ealle we beoð hale.

⁴ Eala ðu, mægena god, ­ ­ ­ ­ ­mære Drihten, hu lange yrsast þu ­ ­ ­ ­ ­on þines esnes gebed?

⁵ tyhst us and fedest ­ ­ ­ ­ ­teara hlafe, and us drincan gifest ­ ­ ­ ­ ­deorcum tearum manna gehwylcum ­ ­ ­ ­ ­on gemet rihtes.

⁶ Þu us asettest ­ ­ ­ ­ ­on sarcwide urum neahmannum; ­ ­ ­ ­ ­nu we cunnion, hu us mid fraceðum ­ ­ ­ ­ ­fynd bysmriað.

⁷ Gehweorf us, mægena god, ­ ­ ­ ­ ­and us mildne æteow þinne andwlitan; ­ ­ ­ ­ ­ealle we beoð hale.

⁸ Þu of Ægyptum ­ ­ ­ ­ ­ut alæddest wræstne wingeard, ­ ­ ­ ­ ­wurpe þeode and þone ylcan ðær ­ ­ ­ ­ ­eft asettest.

⁹ Þu him weg beforan ­ ­ ­ ­ ­worhtest rihtne, and his wyrtruman ­ ­ ­ ­ ­wræstne settest, þanon eorðe wearð ­ ­ ­ ­ ­eall gefylled.

¹⁰ His se brada scua ­ ­ ­ ­ ­beorgas þeahte, and his tanas astigun ­ ­ ­ ­ ­godes cedderbeam.

¹¹ Ealle þa telgan ­ ­ ­ ­ ­ðe him of hlidað, þu æt sæstreamas ­ ­ ­ ­ ­sealte gebræddest, and hi to flodas ­ ­ ­ ­ ­forð aweaxað.

¹² Forhwan þu towurpe ­ ­ ­ ­ ­weallfæsten his? wealdeð his winbyrig ­ ­ ­ ­ ­eall þæt on wege færð.

¹³ Hine utan of wuda ­ ­ ­ ­ ­eoferas wrotað, and wilde deor ­ ­ ­ ­ ­westað and frettað.

¹⁴ Gehweorf nu, mægena god, ­ ­ ­ ­ ­milde and spedig þine ansyne ­ ­ ­ ­ ­ufan of heofenum;

¹⁵ gewite and beseoh ­ ­ ­ ­ ­wingeard þisne, þæt he mid rihte ­ ­ ­ ­ ­ræde gange, þæne ðin seo swiðre ­ ­ ­ ­ ­sette æt frymðe, and ofer mannes sunu, ­ ­ ­ ­ ­þe þu his mihte ær under ðe getrymedest, ­ ­ ­ ­ ­tires wealdend.

¹⁶ Fyr onbærneð, ­ ­ ­ ­ ­folm þurhdelfeð; fram ansyne ­ ­ ­ ­ ­egsan ðines ealle þa on ealdre ­ ­ ­ ­ ­yfele forweorðað.

¹⁷ Si þin seo swiðre hand ­ ­ ­ ­ ­ofer soðne wer and ofer mannes sunu; ­ ­ ­ ­ ­þu his mihta ðe geagnadest, ­ ­ ­ ­ ­ealle getrymedest, weoruda Drihten; ­ ­ ­ ­ ­

¹⁸ ne gewitað we fram ðe. Ac þu us wel cwica, ­ ­ ­ ­ ­wealdend mihtig; we naman þinne ­ ­ ­ ­ ­neode cigeað.

¹⁹ Gehweorf us, mægena ­ ­ ­ ­ ­[and us mildne æteow þinne andwlitan; ­ ­ ­ ­ ­ealle we beoð hale.]