Sealm 79 - Anglo-Saxon Psalms c.890-950 AD

Sealm 78

¹ Comon on ðin yrfe, ­ ­ ­ ­ ­ece Drihten, fremde þeode, ­ ­ ­ ­ ­þa þin fæle hus, ealh haligne ­ ­ ­ ­ ­yfele gewemdan. Settan Hierusalem ­ ­ ­ ­ ­samod anlicast swa in æppelbearu ­ ­ ­ ­ ­ane cytan;

² swylce hi setton ­ ­ ­ ­ ­swylt þinum esnum, sealdon flæsc heora ­ ­ ­ ­ ­fuglum to mose, haligra lic ­ ­ ­ ­ ­hundum and deorum.

³ Hi þara bearna blod ­ ­ ­ ­ ­on byrig leton swa man gute wæter ­ ­ ­ ­ ­ymb Hierusalem; blodige lagan, ­ ­ ­ ­ ­nahtan byrgendas.

⁴ We synd gewordene ­ ­ ­ ­ ­wera cneorissum eallum edwitstæf ­ ­ ­ ­ ­ymbsittendum, þe us ahwær neah ­ ­ ­ ­ ­nu ða syndon.

⁵ Hu wilt þu, wuldres god, ­ ­ ­ ­ ­wrað yrre þin on ende fram us ­ ­ ­ ­ ­æfre oncyrran? is nu onbærned ­ ­ ­ ­ ­biter þin yrre on ðinum folce ­ ­ ­ ­ ­fyre hatre.

⁶ Ageot yrre þin ­ ­ ­ ­ ­on þæt rice and on cneowmagas ­ ­ ­ ­ ­þe ne cunnan ðe, ne naman þinne ­ ­ ­ ­ ­neode cigeað.

⁷ For þon hi Iacob ­ ­ ­ ­ ­geara ætan, and his wicstede ­ ­ ­ ­ ­westan gelome.

⁸ Ne gemune þu to oft, ­ ­ ­ ­ ­mihta wealdend, ealdra unrihta ­ ­ ­ ­ ­þe we oft fremedon, ac we hraðe begytan ­ ­ ­ ­ ­hyldo ðine, for þon we ðearfende ­ ­ ­ ­ ­þearle syndon.

⁹ Gefultuma us, ­ ­ ­ ­ ­frea ælmihtig, and alys us, ­ ­ ­ ­ ­lifigende god; weorð urum synnum ­ ­ ­ ­ ­sefte and milde for naman þinum ­ ­ ­ ­ ­neode and aare.

¹⁰ Þy læs æfre cweðan ­ ­ ­ ­ ­oðre þeoda, hæðene herigeas, ­ ­ ­ ­ ­“Hwær com eower halig God?” and us þæt on eagum ­ ­ ­ ­ ­oftust worpen, þær manna wese ­ ­ ­ ­ ­mæst ætgædere. Wrec agen blod ­ ­ ­ ­ ­esna þinra, þæt wæs sarlice agoten, ­ ­ ­ ­ ­þær þu gesawe to;

¹¹ geonge for ðe ­ ­ ­ ­ ­gnornendra care þara þe on feterum ­ ­ ­ ­ ­fæste wæran. Æfter ðines earmes ­ ­ ­ ­ ­æðelum mægene gegang þa deaða bearn ­ ­ ­ ­ ­þe hi demað nu.

¹² Gyld nu gramhydigum, ­ ­ ­ ­ ­swa hi geearnedan, on sceat hiora ­ ­ ­ ­ ­seofonfealde wrace, for þon hi edwit on þe ­ ­ ­ ­ ­ealle hæfdon.

¹³ We þin folc wærun ­ ­ ­ ­ ­and fæle sceap eowdes þines; ­ ­ ­ ­ ­we ðe andettað, and þe to worulde ­ ­ ­ ­ ­wuldur sæcgeað and þe on worulda woruld ­ ­ ­ ­ ­wordum heriað.