Sealm 77 - Anglo-Saxon Psalms c.890-950 AD

Sealm 76

¹ Ic mid stefne ongann ­ ­ ­ ­ ­styrman to Drihtne, and he me gehyrde ­ ­ ­ ­ ­and beheold sona.

² Ic on earfoðdæge ­ ­ ­ ­ ­ecne Drihten sohte mid handum ­ ­ ­ ­ ­swyþe geneahhe, and ic on niht for him ­ ­ ­ ­ ­neode eode; næs ic on þam siðe ­ ­ ­ ­ ­beswicen awiht. And ic swiðe wiðsoc ­ ­ ­ ­ ­sawle minre fælre frofre; ­ ­ ­ ­ ­

³ þa ic fæste god gemyndgade, ­ ­ ­ ­ ­þær ic hæfde mæstne hiht. Swyðe ic begangen wæs ­ ­ ­ ­ ­and min sylfes gast wæs hwonlice ­ ­ ­ ­ ­ormod worden,

⁴ wæron eagan mine ­ ­ ­ ­ ­eac mid wæcceum werded swyþe; ­ ­ ­ ­ ­ne spræc ic worda feala.

⁵ Þa ic ealde dagas ­ ­ ­ ­ ­eft geþohte, hæfde me ece gear ­ ­ ­ ­ ­ealle on mode.

⁶ Ic þa mid heortan ongann ­ ­ ­ ­ ­hycggean nihtes; wæs min gast on me ­ ­ ­ ­ ­georne gebysgad.

⁷ Þa ic sylfa cwæð: ­ ­ ­ ­ ­“Ic to soðe wat, nele þis ece God ­ ­ ­ ­ ­æfre toweorpan ne us witnian ­ ­ ­ ­ ­for his weldædum,

⁸ oððe wiþ ende ­ ­ ­ ­ ­æfre to worulde his milde mod ­ ­ ­ ­ ­mannum afyrran on woruldlife ­ ­ ­ ­ ­wera cneorissum.

⁹ Ne byð æfre god ­ ­ ­ ­ ­ungemyndig, þæt he miltsige ­ ­ ­ ­ ­manna cynne, oþþe on yrre ­ ­ ­ ­ ­æfre wille his milde mod ­ ­ ­ ­ ­mannum dyrnan.”

¹⁰ And ic selfa cwæð: ­ ­ ­ ­ ­“Nu ic sona ongann þas geunwendnes ­ ­ ­ ­ ­wenan ærest þara hean handa ­ ­ ­ ­ ­haligan Drihtnes,

¹¹ weorca wræclicra ­ ­ ­ ­ ­worda gemyndig, þæt he æt fruman wundor ­ ­ ­ ­ ­fæger geworhte.”

¹² Þa ic metegian ongan ­ ­ ­ ­ ­mænigra weorca, hu ic me on eallum þam ­ ­ ­ ­ ­eaðust geheolde; on eallum þinum weorcum ­ ­ ­ ­ ­ic wæs smeagende, swylce ic on þinum gehylde ­ ­ ­ ­ ­sylf begangen.

¹³ Ys weruda god ­ ­ ­ ­ ­on wege halgum; hwylc is mihtig god ­ ­ ­ ­ ­butan ure se mæra god?

¹⁴ þu eart ana god, ­ ­ ­ ­ ­þe æghwylc miht wundor gewyrcean ­ ­ ­ ­ ­on woruldlife. Eft þu þine mihte ­ ­ ­ ­ ­mænige cyðdest folcum on foldan; ­ ­ ­ ­ ­

¹⁵ þu wiðferedes eac Israhela bearn ­ ­ ­ ­ ­of Ægyptum.

¹⁶ Hwæt, þe, wuldres god, ­ ­ ­ ­ ­wæter sceawedon and þe gesawon ­ ­ ­ ­ ­sealte yþa; forhte wurdan ­ ­ ­ ­ ­flodas gedrefde, wæs sweg micel ­ ­ ­ ­ ­sealtera wætera.

¹⁷ Sealdon weorðlice ­ ­ ­ ­ ­wolcnas stefne þurh þine stræle ­ ­ ­ ­ ­strange foran;

¹⁸ wæs þunurradstefn ­ ­ ­ ­ ­strang on hweole. Þonne ligette ­ ­ ­ ­ ­lixan cwoman, eall ymbhwyrft ­ ­ ­ ­ ­eorðan onhrerdan.

¹⁹ Wærun wegas þine ­ ­ ­ ­ ­on widne sæ and þine stige ­ ­ ­ ­ ­ofer strang wæter; ne bið þær eþe þin spor ­ ­ ­ ­ ­on to findanne.

²⁰ Folc þin ðu feredest ­ ­ ­ ­ ­swa fæle sceap þurh Moyses ­ ­ ­ ­ ­mihtige handa and Aarones ­ ­ ­ ­ ­ealle gesunde.